Read Khiamniungan Naga Ezekiel 38 Bible Online

Ezekiel 38 - Khiamniungan Naga bible

Ezekiel 38

¹APAOU nou ngü tü ngiom,

²“Khaiunia thso,” “Magog hai goumchi nai noitsün Meshek naiuso Tubal mele nouso nokpao ateng Gog lülochi. Apa hau nian lochi lükiu,

³naiuso Ngo Akhengteng APAOU nou apa eh noin ta apa hau lüchite.

⁴Ngü apa son ai chonsiang nou khukü apa phokle-i-e, naiuso apa ün süpai hoi apem tenshi-e. Apa süpaihoi mokthso nouso naiuso nung chiai moknoitsün süpaihoi hakü süpai pungkü nou shikhao tsak tsak naiuso lai semkü noiküla.

⁵Persia, Ethiopia, naiuso Libia ainou süpaihoi nouso apemüh shii naiuso son kandio sunkü apako hakü noiküla.

⁶Ajenapki nai noitsün Gomer naiuso Beth Tagarma hai goumchi ainou ehli khaiuniahoi piakü naiuso mele amao nouso lüko apako hakü noila.

⁷Apaüh süpaihoi apem khemlouau ngiokhem nou kiu.

⁸Khaiuniahoi mele piakü ainou kamkü shikü ehli au tsüngemshikü ahat tsünoikü kihkütün phiai ngü apa tü goumchi shingkhannio tsak lükamhe ta ngiokhem kiu-e. Atao laiukü leankü noitsün Israel hai king nouso apaüh jüolowane, lüko lo khaiunia chikü aaloukü kihkü noin.

⁹Apa naiuso apa süpaihoi mele piakü hakü nung goumchi nou ah-ou-ahsheih tsak shitsün khekkü kome, naiuso nung goumchi nou thengmia tsak khekkü loipok-e.”

¹⁰Akhengteng APAOU nou Gog tü nungti ngioji; “Tilai nungh atao shi-e, ni tsümeikün mongthat tsak that au yachu-e.

¹¹Aaloukü naiuso mongtsamkü noitsün noknio nouso tü pe tsüpekü naiuso ehü tsühükü noitsün shingkhannio tsak komanau ni thatsane.

¹²Pe nai lotheankü noitsün noknio nouso nai kihtsün khaiuniahoi ni kaoatkü yanhean-e. Ngüso amao mele nouso ainou kamshikü noiküla, naiuso loto ngüsoüh thainian, jengtsaiu nouso taim, naiuso ngüso goumchi yamkamtengko kihji.

¹³Ni asüpaiso akamheau si akauloau kamshi taim süne? ta Sheba hai, Dedan hai, naiuso Spain noksong nouso ainou chaile uole hoi nou asam tü sange. Ni nung tangkason, chaiou lakkeng, thainian, naiuso jengtsaiu loau ayang nai nung tsümeikünso ko aikü khuhan süne?”

¹⁴Nungtiphe Akhengteng APAOU nou Gog tü ti ngioji nung ngio ngioau ngü hong: “Jü khaiunia Israel hai aaloukü kihtsün ko,

¹⁵ajenapki nai hoi piakü niakü, naiuso mele piakü ainou süpai akongteng nouso mokthso nouso chiai noitsün niakü ni tsalou-e.

¹⁶Asamüh jü khaiunia Israel tü goumchi yankü shitsün ah-ou-ahsheih tsak khekkü kome. Tilai nung atao nou shi-e, ni ngü chhitsün tsangkü jü asio nou mele nouso hau hanau ngü ni jü goumchi komau honge.

¹⁷Ashiau atao nouko ngü Israel komau khaiunia ajantso niakü shi-e ta jü e-pohoi si jü tsamkiso tsangkü ngiokü shitsün nung ni noin.” Ta Akhengteng APAOU nou ngioji.

¹⁸Akhengteng APAOU nou ngioji, “Gogüh Israel thalouwantsün ajekhaiu ko nai ngü thsüokü mongmat sungi.

¹⁹Nungh ajekhaiu ko ngü thsüokü mongmatkü Israel hai goumchi ai gohhaiu tsak thsüokü sungi-e ta welutji.

²⁰Khiamnok nai noitsün ngou, naiuso aün ai waio nouso, kengpun nai thainian asong ehen apem, naiuso goh chiai khaiu- niahoi ngü lon hatkü ngaongao-e. Naiuso king nouso nyomane, jin nouso thamkü saowane, naiuso dio ai apem goh ai loithiowane.

²¹Akuothe in amomo nou ngü Gog lekkat-i-e, ta Akhengteng APAOU nou ngioji. Apa khaiuniasoüh tsak si tsak thako sah kankei-e.

²²Akia naiuso she lopengtsün tsangkü ngü apa loat-e. Ahthe san nungko in hakü apa süpaihoi naiuso mele nouso chiai ngeshikü sao-e.

²³Nungli ngü mele chikü hau Ngo asong naiuso asio noin ta hane. Nungai ngüsoüh Ngo APAOU noin ta nge-e.”