Read Khiamniungan Naga Ezekiel 39 Bible Online

Ezekiel 39 - Khiamniungan Naga bible

Ezekiel 39

¹Akhengteng APAOU nou ngiom, “Khaiunia thso, Meshek naiuso Tubal meleso ün atengteng nokpao Gog thako alochi kiukü khapiam lüngio, naiuso ngü apa eh noin ta lüchite.

²Ngü ni lemkü phokle-i-e, naiuso ni nialoukü khu-e küta ajenapki athonteng ainou sung-i-e; Israel hai king chiai ngü ni nialoukü shi-e.

³Nungai ngü apa pha tsatai nou uokop pai naiuso apa pha uai nou uokop chon nouso salian-i-e.

⁴Goa naiuso apa süpaiso naiuso apa hachutsünso Israel hai king nouso chiai loian-e, naiuso ngü e-e mea nouso liu thainian naiuso waio nouso hau waowan-e.

⁵Ngüso kengpun nai ean-e ta Ngo Akhengteng APAOU nou ngioji.

⁶Naiuso Magog chi-ai naiuso haiusai nai alolek tsüsunkü kihtsün khaiuniahoi nouso chiai ngü in honge, naiuso nungko khaiunia pungkü nou Ngo APAOU noin ta nge-e.

⁷Ngü jü asio nian jü khaiunia Israel ongko ngekü iula-i-e, naiuso loto Ngo jünian tsülochi-ishi-e. Nungai mele nousoüh Ngo APAOU Israel hai asio Goa ta nge-e.”

⁸Akhengteng APAOU nou ngiom, “Ngü thawaoau ajekhaiu thaiutha ngiotsün nung atsüoteng shi-e.

⁹Israel hai noknio nousoko kihtsün khaiuniahoi nou khuküta chonsiyam leponankü noitsün ajah pai au thaiutha kamlou-e. Ngüsoüh shikhao, uokoppai, uokopchon, laih, naiuso pailai nousoüh pon chinyat ngoikü nyaikü shiokü in jah-e.

¹⁰Ngüsoüh kengpun ainou ajah pai tsükamshi-e, tsüdekünai liutsa ainou pai tsüja-e, tiautenai ngüsoüh leponankü noitsün chonsiyam nou ajah heau the-e. Ngüso pokü aplouwantsünso ngüsoüh aploukü komhean-e,” ta Akhengteng APAOU nou ngioji.

¹¹APAOU nou ngiom, “Tilai nungso chikü thawao-e, Ngü Gog khananau Israel nai gohthang kiuküta Ee- Khiamnok ajepek nai, Atsakeitsünso Tsamei ai Gog naiuso apa süpaihoi khanan-e, nung tü ‘Gog süpaihoi khantsün ta jone.’

¹²Nungai mea nouso khananau Israel haiüh alei chinyat the-e, naiuso nung gohthang loüh losio shi-e.

¹³Nungso khananau khaiunia chikü nou hachu-e, naiuso nung thaiutha jü ashioloutsün ajekhaiu ko nai ngüso hau nianlom asong kiu-e, ta Ngo Akhengteng APAOU nou ngioji.

¹⁴Alei chinyat phiai ngüsoüh nung gohthang losiokü shanshiau goh chiai mea poikü noitsün epsankü khanan au goh thapekkü tsakei au khaiunia nouso chosane.

¹⁵Ngüso nung shingkhannio nai sung saokü tsakei nai ngüsoüh uo eptsün pungkü mea khan thaiutsünso shikü nung Gog süpaihoi Tsamei nai shikü khanan au nungtü ii nou lolutkü lütaiu.

¹⁶(Nung süpaihoi nianphi kiukü taiutsün noksong tsak nung shimkü noi-e.) Naiuso nung gohthang loühjam losio shikü taiu-e.”

¹⁷Akhengteng APAOU nou ngü tü ngiom, “Khaiunia thso, waio naiuso thainian nouso thaiutha Ngü khemtaiukiutsün chaithio he au apem ainou ashikam ta lüjon. Nung Israel hai king nouso chi ai ngüsoüh nyih hekü naiuso she shiukü sümai asongteng tsak noi-e.

¹⁸Onne- mokpong tsüdekünai onnemok thso, on naiuso jangtsopong atsa nouso loattsün khekkü ngüsoüh süpaihoi nouso mea he-e naiuso goumchi nokpao nouso she shiu-e.

¹⁹Tilai ngü nung khaiunia nouso aloat chaithioli loat-e, waio naiuso thainian nouso apemüh ngüsoüh thaloutsün ko yangkü atsah nou he-e, naiuso ngüso she üh motukkün lektso shiu-e.

²⁰Jü thaisam puo ai mokthsoso naiuso nung chiai moknoitsünso, süpaihoi naiuso ehli khaiuniahoi nouso nyih ngüsoüh thalouau shiotsünlitso he-e, ta Ngo Akhengteng APAOU nou ngioji.”

²¹APAOU nou ngiom, “Ngo titi jü asio athalou kankü khuau jü oukong kankeiji, jü ajinka ngüso hau hankü mele nouso hau epi-e.

²²Nungko yakü, Ngo APAOU, ngüso Goa ta Israel haiüh nge-e.

²³Israel hai thaloukü khuwantsün Jü thako ngüsoüh angei suntsün shioko noin ta mele nousoüh nge-e. Ngo ngüso ainou phoklekü khuwan küta ngüso ehso hau ehlithang nai loat-i-e.

²⁴Ngüso tsüyanthsüokün naiuso akausai thaiutha ngüsoüh eptsün ngü ngüso hau kiu, naiuso ngüso ainou ngü phoklekü khuwan.”

²⁵Akhengteng APAOU nou ngiom, “Lüko Ngo lo Israel khaiunia, Yakob thsaosithsoso khako atsüojinyang noi-e, naiuso ngüso tsüomeikü shanshi-e. Ngo jü asio nian solou-e.

²⁶Tilai ngüso loühjam ngüso goum- chi ai aaloukü sauüh tsülohatshikü kihshi-e, ngü kausaiattsün thaiutha ngüso titi amiam noiküla nung ngüsoüh han-e.

²⁷Ngo asio noin ta mele piakü hau hanau Ngü jü khaiuniaso ngüso ehoi kihtsün shingkhannio chikü ainou laokü nialoukü shi-e.

²⁸Nungai jü khaiuniasoüh Ngo APAOU, ngüso me goumchi ai sua au hongantsün ainou lo ngüso niakamkü laokü shin ta nge-e.

²⁹Ngo Israel hai khaiuko jü Onthso kheplutkiu-e, naiuso loto tilaitso müjam ngüso ainou tsükhushi-e, ta Ngo Akhengteng APAOU nou ngioji.”