Read Khiamniungan Naga Ezekiel 4 Bible Online

Ezekiel 4 - Khiamniungan Naga bible

Ezekiel 4

¹Goa nou ngiom, “Khaiunia thso, lungshe tsak lülou, küta nungh akhako lütaiu, naiuso nung lung nou da Yirusalem lüsatlut.

²Naiuso nung athalouwantsün ii hankü nok lemkü ehjiokhan puo poksankü asaothang naiuso athio thiowanau lah lütaiu.

³Sonchio tsak lülou küta nung ni naiuso noknio jetko dioai tsak khekkü lektsakü lütaiu. Akha noknio dongai lüsheilut, nung thalouwankü noin, naiuso nung thaloutsün tsak nou ni noin. Nung Israel mele thaiutha ii tsak noi-e.”

⁴“Küta ni tü tsatai nai sheikü lüsai, naiuso ngo Israel mele aphio nou achiai taiu-e. Tiautenai ngüso aphio shioko ni nungko ajekhaiu 390 ngoikü angja-e. Ngüso angja mothonkün lektso ajekhaiu tsak nou pon tsak tsak thaiutha ngo ni taiuwanji.

⁶Tilai ni nung kheme, ni tü uai nai sheikü ashi küta Yihuda hai thaiutha ajekhaiu tsak nou pon tsak tsak ngüso angja mothonkün lektso ajekhaiu aopülenyi ngüso aphio thaiutha omhe-au noin.”

⁷“Yirusalem thalouwantsün tü aniovei langlutkü lüthap. Noknio dongai sheikü apha jenkü lamshiküta khapiam ngio lüngio.

⁸Athalouwantsün mokhemkün lektso ngo ni kejeikü wanane naiuso ni alemlemao tsüshio-e.

⁹“Naiuso whet tso, barli tso, lapon, chuom, jinyak, nungso ajantso alo küta nungso chikü asutne naiuso laoweküta themtsai lüshan. Ni nung ajekhaiu 390 tsatai sheikü saitsün taoko heau noi-e.

¹⁰Ni hau ajekhaiu tsak ko themtsai gram 230 lu kiu-e, naiuso nungh nungthannyi saokü thaiutha noi-e.

¹¹Naiuso ni khiam ashiuao lüko ajekhaiu tsakko thengkam nimelu thatlinkü noi-e.

¹²Ni khaiunia shhiwon nouko in jah-e, küta nungh in nouko themtsai jekke, naiuso nungh khaiunia pungkü nou epkü he-e.”

¹³APAOU nou ngiom, “Nungüh tilai ngo Israel hai gohmao goumchi nai pengpuni-e nung taoko Goa nou tsümongchiokün eheshiu ngüsoüh heau nou hanji.”

¹⁴Lüko ngo thalan, “Tsüde, Akhengting APAOU! Ngo tilaitso tsüsiokün nou jüpem lochinyankü tsünoi. Methso nai yakü ngo tilaitso yaang eantsün, thainian nou jeiattsün ti nyih tsühede. Naiuso ngo tsüsiokün chihsikhiam tilaitso tsühe.”

¹⁵Nungaih Goa nou ngiom, “Thatü mein. Ngo ni hau khaiunia nou wantsün liko jangshhi nou kankei-i-e, naiuso ni nung chiai themtsai tsai ao shio-e.”

¹⁶Loüh Goa nou ngioshin, “Khaiunia thso, ngo Yirusalem thaiutha eheshiu eptsün yam lophangkü wane. Ngüsoüh hetsün chihsikhiam ngüsoüh tsoi nouko thatlunai ngüso mong kiakü yangelate.

¹⁷Ngüso themtsai naiuso khiam nou khemanne; ngüso angei shioko ngüso lekkatkü pem paiukü wonlüshikü noi-e.”