Read Khiamniungan Naga Ezekiel 40 Bible Online

Ezekiel 40 - Khiamniungan Naga bible

Ezekiel 40

¹Sam akhothiotsün nai kankü khuwantsün phiai pon kheikü pungo nouko naiuso Yirusalem thalouwan küta pon chekü püle nouko nai, Pon Yan ajekhaiu che nyi nouko ngü APAOU oukong hatsün ngesan, naiuso apaüh ngü kankü khu.

²Goa nou ngü Israel hai goumchi ai niakü khutsün atsang- shei tsak nouko, apaüh ngü king atsokteng tsak chiai taiu. Nungko jü khako ngü thapau noknio tsak khekkü tsam ahoi tsak lahtaiukü ep.

³Apaüh ngü shimkü nialoukü shinai, ngo daoson khekkü jeekü khaiunia tsak ep. Apaüh athatlutsün auo tsak semkü bekhan dongko tsakü noiküla.

⁴Apaüh ngü tü ngiom, “Khaiunia thso, tsüokü athap, ngü ni hau hantsün alum tü mong akiu naiuso meikü anglu, tiautenai nung shioko ni nungai niakü shin. Ni eptsün alum nung Israel hai hau chite au noin.”

⁵Ngü Amkham Tsam tsak ep, naiuso nung dio-ai nou pejeikü noiküla. Khaiunia nou athattsün pailai meter süme laiukü noiküla nung loküta dio-ai tü thatlu.

⁶Nungaih apa ajepek nai sheilutkü noitsün bekhan dongai khu. Apa hokthengpho nai sungküta asong- thonteng ainou apaüh bekhan nou thatlu.

⁷Nungphiai anio pungkü nai ehü tsampai noitsün yam tsak noiküla. Nung tsampai anio pungkü meter süme me wewekü, naiuso nungso jetko dio ai nouso meter 2:4 teithamkü noiküla. Nung ehü tsampai nouso yankü Amkham Tsam tü sheilutkü nai tsampai dongai khutsün yam tsak nung alaiu nai meter süme noiküla.

⁸Apaüh nung tsampai thatlu nai nung meter 4:2 aokü epsan. Nung Amkham Tsam ashimteng nou bekhan athon nou noiküla, naiuso nung bekhan nouso meter 1:2 teithamkü noiküla.

⁹

¹⁰(Nung ehü tsampai nouso aniokun tsak yam nou atheng atham wekü noiküla, naiuso nungso jetko noitsün dio ai nouso ateitham nai wekülu noiküla.)

¹¹Nungthanko nung khaiunia nou bekhan aniokun pungkü tü thatlu. Nungko aniokun apem meter 6:6 noiküla, loüh bekhan nouso jetko meter 4:8 noiküla.

¹²Ehü tsampai pungkü nou khako dio ai nyap nyapkü nou atsok nai naiuso ateitham nai millimeter 500 wewekü noiküla. (Tsampai nouso meter süme wekü noiküla.)

¹³Nungaih apaüh tsampai tsak diophi ainou nung yankü noitsün tsampai amao tsak nou jet ta thatlu, naiuso nung meter 12:6 noiküla.

¹⁴Tsampai athonteng ainou mikhem puo tü thalutkü. Apaüh nung tsampai tü thatlu nai nung apun nai meter 10:2 noiküla.

¹⁵Bekhan alaiu kengchi dio ai ainou athonteng tsampai tü thalutkü nouko meter 25:2 noiküla.

¹⁶Tsampai apem kengchi dio ai nou tü naiuso tsampai jetko noitsün akheiteng dio ai nou tü koukhantso satkü noiküla. Nungko yam tü sheilutkü noitsün akheiteng dio ai nouso ta mepai nouso sotsom satlutkü noiküla.

¹⁷Nung khaiunia nou ngü kengpun nai bekhan yankü nialüthio, Nungko pechi dio ai nou tü lalutkü tsampai aosam sunkü tsam noiküla, naiuso nungso khako lung nou shankü

¹⁸athang tsak nou kengpun lemkü noiküla. Nung pechi kengpun nou to amongteng kengpun nouko nai asaothon athanya nai noiküla.

¹⁹Nungko bekhan tsak asaothon kengpun dongai khutsün nung asungthonko wekü noiküla. Nung khaiunia nou bekhan nime jet nou tü thatlu nai, nungh meter 50:4 noiküla.

²⁰Nungaih nung khaiunia nou pechi kengpun nai khutsün ajenapki bekhan nou tü thatlu.

²¹Nungko ajepek bekhan athatko wekü yam apungkü ehü tsampai nouso lüko nung dio ai nouso jetko tsampai nai naptsün nung wekü lu noiküla. Nung bekhan alaiu nai meter 25:2 naiuso apon nai meter 12:6 noiküla.

²²Anaptsün tsampai, koukhanthso nouso, naiuso mepai thsam nouso nung ajepek bekhan nai noitsün khekkü shan. Nungko nou bekhan tü thalutkü keikom chinyat, naiuso nung anaptsün tsampai nou kengpun athon tsak tü sheilutkü shan.

²³Ajepek bekhan nai noitsün khekkü lu nung ajenap bekhan ainou kengpun yankü amongai noitsün kengpun dongai khutsün ajenap bekhan amao tsak noiküla. Nungh khaiunia nou nung bekhan nime jetko noitsün alaiu nou tü thatlu nai, nungko meter 50:4 noikü thatsan.

²⁴Nungthanko nung khaiunia nou ngü ajepekki nai nialoukü khu, naiuso nungko samüh bekhan amao tsak ep. Apaüh among ainou dio ai naiuso nungko naptsün tsampai thatlu nai, nungso lüko amao nouso khekkü lu noiküla.

²⁵Amao nouso tü potsünlilu nung bekhan tsampai nouso tü lüko koukhanthso sunkü noiküla. Bekhan alaiu nai meter 25:2 naiuso apon nai meter 12:6 noiküla.

²⁶Nung keikum chinyat nai ngoiji naiuso tsampai nai naptsün lüko kengpun thun nou tü sheilutkü noiküla. Nungko amongai dio ai nou tü peng-pai sotsom nouso sailutkü nung ashikhutsün yam tü lalutkü noiküla.

²⁷Nungko lüko among ai kengpun tü yamlutkü noitsün bekhan tsak noiküla. Nung khaiunia nou nung bekhan nime nou tü thatlunai, nungko meter 50:4 noiküla.

²⁸Nung khaiunia nou ngü amongai noitsün kengpun nai ajepekki bekhan tsangkü nialükhun. Apaüh nung bekhan tü thatlunai, nung kengchi dio ai nai noitsün bakhan nouso atheng atham ko wekü noiküla.

²⁹Nung ehü tsampai nouso anaptsün tsampai, amongai noitsün dio ai nouso lüko amao bekhan nouso ko atheng atham wekülu noiküla. Nung alaiu nai meter 25:2, naiuso apun nai meter 12:6 noiküla.

³⁰

³¹Anaptsün tsampai nung amao kengpun nou tü lalut, naiuso koukhan yam thumkü dio ai nou tü peng-pai sotsom nouso satlut. Nung bekhan tü thatlunai keikum petjei noiküla.

³²Nung khaiunia nou ngü amongai noitsün kengpun nai ajepek bekhan tsangkü nialükhun. Apaüh nung bekhan tü thatlunai, nung amao nouso lilu atheng atham nai wekü noiküla.

³³Nungh ehü tsampai nouso, anaptsün tsampai, naiuso amongai noitsün dio ai nouso thatlunai amao bekhan nouso lilu wekü noiküla. Nungko koukhanthso nouso naiuso anaptsün tsampai nai lüko lemkü pokü noiküla. Nung alaiu nai meter 25:2 naiuso apun nai meter 12:6 noiküla.

³⁴Anaptsün bekhan nou pechi ai kengpun tü lalutkü shan. Dio ai nouso tü koukhan yam saokü peng-pai sotsom nouso satlut. Nung bekhan tü thatlunai, keikum petjei noiküla.

³⁵Nung khaiunia nou ngü ajenapki bekhan dongai nialoukü khu. Apaüh nungtü thatlunai, nung atheng atham amao nouso ko wekü noiküla.

³⁶Nung amao nouso khekkü ehü tsampai nouso, amongai noitsün dio ai aleng yamlutkü, anaptsün tsampai, nungko apem lemkü koukhanthso nouso sunkü noiküla. Nung atheng nai meter 25:2 naiuso atham nai meter 12:6 noiküla.

³⁷Anaptsün tsampai nou kengchi kengpun tü lalutkü noiküla. Nungko yam thathonkü peng-pai sotsom, nouso satlutkü taiu. Nung bekhan tü thatlu nai keikum petjei noiküla.

³⁸Kengchi kengpun nou tü ajenapki nai noitsün akhei bekhan nouko jipkü aalou tsam tsak noiküla. Nung kengpun nou tü lalutkü anaptsün tsampai sopsat, nungko ngüsoüh ajah chaithio nouso tsaowan.

³⁹Nung anaptsün tsampai nouko puo püle, tsampai e tsakai nime naiuso e tsakai nime ta taiu. Ngüsoüh aloat thainian chaithio nouso nung puo chi nai apem jah au tsüdekünai angei chaithio au tsüdekünai laokü kiushitsün chaithio au kiuküla.

⁴⁰Nung tsampai kengchi ajenap bekhan nai naptsün e tsakai nime naiuso e tsakai nime ta puo püle khekke khekkekü taiu.

⁴¹Aloat chaithio au loattsün taiuau nungko apem nai puo petjei noiküla. Püle nung tsammongai naiuso püle nouso kengpun chiai taiu.

⁴²Aalou tsam nai taiutsün puo püle nouso athum jahkü chaithio kiutsün khem- sanau kankei. Nungso millimeter 500 tsokkü, naiuso asongthonteng nou millimeter 750 apem jeiaikü noiküla. Alat chaithio kiutsün thainian loat au thetsün jengtsaiu apem nung puo, nouso chinai taiu.

⁴³Millimeter 75 asianglotsün puothun nai taiu. Aloat chaithio kiuau noitsün nyih nung puo nouso chi ai taiu.

⁴⁴Nungaih apaüh ngü amongai noitsün kengpun nai nialüthio. Nungko tsampai nime amongai noitsün kengpun dongai sopkü tsak nou ajenapki bekhan naiuso ajepekki bekhan dongai shimkü shan.

⁴⁵Nung khaiunia nou ngü tü ajepekki dongai sheikü noitsün tsampai nou mesonhoi sauhaiüh Amkham Tsam nai yathsüoji nungso thaiutha noin ta ngiom;

⁴⁶naiuso ajepekki dongai sheikü noitsün tsampai nou amthang nai yathsüotsün mesonhoi thaiutha noin. Mesonhoi apem Zadok thsaosithsoso noin, APAOU noitsün nai apa yathsüokü napau shiotsün Levi kau ainou mepem ngüsolu noin.

⁴⁷Nung khaiunia nou kengpun among nou tü thatlunai, nung anuo pungkü meter 50:4 noiküla. Amkham Tsam nou ajenap nai noiküla, naiuso nung khako amthang tsak noiküla.

⁴⁸Nungai apaüh ngü amkham Tsampai nai naptsün dongai nialükhun. Apaüh nung anaptsün tü thatlunai nungko a-ao nou meter 2:7 naiuso apem nou meter 7:2, nung anuo nemtso nai dio ai meter 1:5 teithamkü noiküla.

⁴⁹Anaptsün tsampai nai sungtsün nung hokthengpho apun nai meter 10:2 naiuso a-ao nai meter 6 noiküla. Nung anaptsün bekhan etsakai tsak naiuso etsakai tsak ta kheam nime noiküla.