Read Khiamniungan Naga Ezekiel 42 Bible Online

Ezekiel 42 - Khiamniungan Naga bible

Ezekiel 42

¹Nungaih nung khaiunia nou ngo kengchi kengpun nai nialükhun, naiuso Amkham Tsam tü ajepekki ajenap nai thatü laiukü tsükhukü noiküla.

²Nung tsam nou atheng nai meter 50:4 naiuso apun nai meter 25:2 noiküla.

³E tsak nai Amkham Tsam liu thunkü meter 10:2 apun nou tü lalutkü, naiuso e tsak nai kengchi kengpun nou tü lalutkü noiküla. Nung athong süme tü lalut, nung pungkü akhei tsak nou chi ai noiküla.

⁴Nung tsam tü ajepekki nai shinkü yam tsak apun nai meter 4:8 naiuso atheng nai meter 50:4 nou anaptsün hakü noiküla.

⁵Tsampai asungthun-ing nouso nung awem naiuso asaothun- ing nouso ko intso henkü tiautenai nungso phiai nai intso shinlokü noiküla.

⁶Tsamthong süme tsampai nouso amao nouso chiai intso lokchukü lüko nungso amao tsam nouso tü thengtsün kheamli tsüthengkü noiküla.

⁷Asaothun nai kengchi dio ai nung meter 25:2 thatü teithamkü nung alaiu nai ayan thatso, naiuso nung tsampai apoi nouso meter 25:2 noiküla. Asong- thonteng- ing nai tsamliu thunkü tsampai nouso noiküla.

⁹Tsam- thun ajepek nai noitsün tsampai nouso khemko, kengpun yaloutsün dio ai nungko kengchi kengpun nai khuau yam tsak satkü noiküla. Amkham Tsam tü ajepekki nai ajenapki ainou laiukü tsüdekü tsam tsak nung khekkekü noiküla.

¹¹Tsampai nouso khako ajenapki nai noitsün khekkü nungko yam tsak noiküla. Nung tsam athat nai we- külu, naiuso anaptsün yam wekülu noiküla.

¹²Ajepekki nai noitsün tsampai nouso dio ai tsaloutsün ko, khemko kou tsak noiküla.

¹³Nung khaiunia nou ngü tü, “Nung tsam nemtso asio noin ta ngiom. Nung tsam nousoko meson sauhai APAOU noitsün nai napji, ngüsoüh asioteng chaithio nouso nungko taiuji: chih chaithio nouso, naiuso angei thaiutha aloat chaithio tsüdekünai laokü kiushitsün chaithio nouso taiuji.

¹⁴Tilai meson nouso Amkham Tsam nai noikü, kengchi kengpun nai khuau aiuji, ngüsoüh APAOU yathsüotsün taoko asio neshe thotsün nung tsam nouso ko lean au noin. Ngüsoüh khaiuniahoi kamshikü noitsün athang nai mokhukün khako neshe amao nouso tholouau noin.”

¹⁵Tilai nung khaiunia nou Amkham Tsam gohthang thatlutsün khem, apaüh ngü ajepek bekhan yankü nialükhun küta kengchi athang nou tü thatlu.

¹⁶Apaüh athattsün pailai loküta ajepek nai noitsün athang tü thatlunai, nung meter 250 noiküla.

¹⁷Nungai apaüh ajenapki, ajepekki, naiuso ajenap e pungkü thatlunai, nungso meter atheng 250 wekülu noiküla,

²⁰nungtiphe nung dio ai anio pungkü nai meter 250 wekülu noiküla. Tisübao asio naiuso tsüsio nungne janthat au nung dio ai nou noiküla.