Read Khiamniungan Naga Ezekiel 43 Bible Online

Ezekiel 43 - Khiamniungan Naga bible

Ezekiel 43

¹Nung khaiunia nou ngo ajepek tü lalutkü noitsün bekhan dongai nialoukü khu,

²nungko ngü Israel hai Goa noitsün ainou okü awon tsak shitsün ep. Nungko Goa sangh khiampek ngem khekkü shiküta nung okü awontsün nou goh tü jelut.

³Nung atsangshei nou Yirusalem lotheanau Goa shitsün taoko Ngü eptsün tsak khekkü, naiuso ngü Kebar Haiusai nai eptsün tsak khekkü noiküla. Nungaih ngü jükha goh tü thaokü loi-an.

⁴Nung otsün awon nou ajepek bekhan yankü khukü Amkham Tsam nai nap.

⁵APAOU Onthso nou ngü tentsa küta tsammongai nialoukü nap, nungko ngü Amkham Tsam nung APAOU ün ajinka nou miankü ep.

⁶Nung khaiunia nou jü dongko tsakü, APAOU nou Amkham Tsam ainou chitekü ngü lula.

⁷“Khaiunia thso, nungko jü noikham noin. Ngü nungko Israel khaiunia ongko noikü ngüso khaiuko athontsüyangkü nok-shinge. Israel khaiuniahoi nousoüh lüko, ngüso nokpaosoüh lüko, amao goa tsüdekünai ngüso nokpaoso ee mea khantsün tsangkü naiuso amtsün tsangkü loto tilaitso jü asio nian tsülomiami-shi-e.

⁸Nokpao nousoüh ngüso tsam hokngam kou hokngam naiuso koukheam nouso jü Amkham Tsam kouhok naiuso koukheam nouso tü lashikü shan, nungtiphe sam jetko dioai noulu noiküla. Ngüsoüh apem achinyan chhi nou tsangkü Jü Asio Nian lomiam, nungtiphe jü amongmat nai ngüso lomowan.

⁹Lo ngüsoüh amao goa nouso amtsün laolokü ta ngüso nokpaohoi uo nouso wanan au noin. Ngüsoüh nungti chhi naito, Ngo ngüso ongko asaita noi-e.”

¹⁰APAOU nou tsülaokü ngiom, “Khaiunia thso, Israel khaiuniahoi hau Amkham Tsam thaiutha lüchite, naiuso ngüso hau nung that nouso thaiutha lüyamlu-i Ngüso meshen angei thaiutha lülomiam.

¹¹Nungaih ngüsoüh chhitaiutsün thaiutha ngüso miam naito, ngüso hau Amkham Tsam thaiutha ayangtaiu nou lüchite: alengyam nou, anaptsün naiuso ashikhutsün koukhan nouso, aleng nou nung thaiutha ayang noitsün alum, naiuso nung thaiutha ngiokhem naiuso ayamhan nouso apem. Nungso apem satkü lütaiu, nungtiphe ngüsoüh alum titi khemkü noin nung eppe naiuso nungso ngiokhem nouso apem kankü khuau shio-e.

¹²Amkham Tsam ün ngiokhem nung noin: Nung athang kengchongteng lemkü nou apem asuhat naiuso asio.”

¹³Amkham Tsam tü thattsün tsaklu kankeikü, amthang thattsün nungti noiküla. Amthang lemkü singtsangkhut centimeter 50 aokü, naiuso apon nai centimeter 50 shan, naiuso kengchi nai akuk nou centimeter 25 tsokkü shan.

¹⁴Athon nai yakü Amthang asaothon nou meter tsak tsokkü noiküla.Nungtü than akuk nai centimeter 50 naiuso atsok nai meter nime noiküla. Nungtü than shinou akuk nai centimeter 50 thalemkü noiküla.

¹⁵Asongthonteng chaithio jahtsün lüko meter 2 tsokkü noiküla. Aniokun kheam püle nouso amao nouso tsokthsüokü noiküla.

¹⁶Asong- thonteng Amthang nou atheng atham meter 6 noiküla.

¹⁷Awem amthang akuk nou centimeter 25 tsokkü (Singtsangkhut centimeter 50 ponkü noiküla.) Amthang nai sungkhutsün hokthengpho nou ajepekai sheikü noiküla.

¹⁸Akhengteng APAOU nou ngo tü ngiom, “Khaiunia thso, Ngü ngiotsün tü a-anglu. Tilai amthang nou lahsane, ni nung chiai jahkü kiutsün chaithio kiuau loattsün thainian she satluttsün tsangkü losio au noin.

¹⁹Jü khako Ngo yathsüoau Levi kau ainou Zadok tü nyimsantsün meson nousolu shiau noin, ta Ngo Akhengteng APAOU nou thoilutji. Asamüh angei liko chaithio kiuau jangtsopong tsak ngüso hau kiuau noin.

²⁰Ni nung thainian she intso loküta amthang aniokun kheam khaiu nai lolut-e, naiuso amthang awem nou tü naiuso nung athon apem lemkü lolut-e. Nungli ni amthang losangkü naiuso losiokü the-au noin.

²¹Ni nung angei thaiutha aloat chaithio kiutsün jangtsopong nou Amkham Tsam kengchiai athang mothikü tsak ko jahkü loate-la.

²²Nungthan nyi nai ni alengsat tsüpokün wonpong tsak lokü angei liko chaithio kiu-ela. Ni amthang losio au jangtsopong nou chhitsünli nung sheüh lülosio.

²³Tilai nung chhi nouso kheme, ni jangtsopong naiuso onnemokpong tsak tsak lülou, nungne nemtso alengsat tsüpokü athe,

²⁴küta nung jü dongai kankü ashi. Meson nousoüh nungso tü jem nou laolut-e, küta ngüsoüh ngo hau ajah chaithio kiu-e.

²⁵Ajekhaiu pungkü chinyatnyi thaiutha asamüh won tsak, jangtsopong tsak, naiuso onnemok- pong tsak ta angei thaiutha chaithio athio. Nungso apem alothe ti tsüpokü the-au noin.

²⁶Chinyatnyi thaiutha meson nousoüh amthang nou losio-e, küta nung akankei au khemkü taiu-e.

²⁷Tilai nung anojet nou yanan-e, meson nousoüh amthang nai chaithio kiuau tsalou-e, naiuso khaiuniahoi thaiutha nokmei chaithio nou tsalou-e. Nungaih Ngü asam apem tü mongleng-e, ta Ngo Akhengteng APAOU nou ngioji.”