Read Khiamniungan Naga Ezekiel 44 Bible Online

Ezekiel 44 - Khiamniungan Naga bible

Ezekiel 44

¹Nung khaiunia nou ngo Amkham Tsam thang mongai ajepek ai noitsün kengchi bekhan dongai nialoukü khu. Nung bekhan nou kiapankü noiküla,

²naiuso APAOU nou ngo tü ngiom, “Nung Bekhan kiapkü taiu-e, naiuso nung tilaitso tsüsoppe. Naiuso sau khaiunia lünou nung tsangkü tsünappe, tiautenai Ngo Israel hai Goa APAOU nou nung tsangkü nap. Nung kiapkü taiuwane.

³Lüko Nokpao thso nouto nungai khukü jü khako asio thaisame. Apa napküta bekhan nung akheiteng athon anaptsün bekhan ai shikhuwane.”

⁴Khaiunia nou ngo Amkham Tsam khako ajenapki bekhan yankü nialükhun. Ngo thapnai, nung Amkham Tsam apa noitsün ajinka nou miankü ep. Nungko ngo jükha goh ai sheithiokü loi-an,

⁵naiuso APAOU nou ngü tü ngiom, “Khaiunia thso, ni eptsün naiuso lulatsün alum tü mong lükiu. Ngü ni hau Amkham Tsamai kankeiau ngiokhem khemtaiu nouso chiteau noin. Amkham Tsamai khaiunia sauhai napau naiuso shikhuau naiuso khaiunia sauhai hau ayam tsüsopkiu nungso paotsangkü lüngetaiu.”

⁶Israel hai akhengshi khaiunia nouso tü ngüsoüh achinyan chikü noitsün loto Ngü tsüjeitaiushi-e ta Akhengteng APAOU nou ngiotsün lüchite.

⁷Tilai i-iu naiuso ashe chaithio ngo hau kiuji, jüngio tsü-angkün tsütippankün, gohmao haiüh jü tsam lochinyanji. Nungti jü khaiuniasoüh achinyan chhitsün tsangkü jü athalou-e lothe-an.

⁸Ngüsoüh jü Amkham Tsam nai asio amkham nouso paotsangau thsale tsülou, lüko nung liko ngüsoüh gohmaohai hau paotsang-iau kiuwan.

⁹“Tsütippankün gohmao khaiunia saulünou, naiuso asam Israel hai ongko kihakü noitsün saulünou, ngü ngiotsün tsü-angtsünso jü Amkham Tsamai tsünappe, ta Ngo Akhengteng APAOU nou welutji.”

¹⁰APAOU nou ngo tü ngiom, “Israel khaiunia apoi nousoko hakü Levi hai üh ngo leankü sotsom amkhamkü khuwantsünso Ngü angja kiu-e.

¹¹Ngüsoüh Ngü ün bekhan jim thsale loukü naiuso Amkham Tsam chhi tsangkü jü Amkham Tsam nai yathsüoau shio-e. Khaiunia nousoüh ajah naiuso aloat chaithio au thainian kankü shitsün loatau ngüsoüh shio-e, naiuso ngüso khaiuniahoi yathsüoau chhiau noin.

¹²Lüko ngüsoüh Israel khaiunia thaiutha sotsom amkham shan nou shioko, ngüsoüh khaiuniahoi nouso angei nai napiphe, ngüso angja kiuau Ngo, Akhengteng APAOU nou ngiomong shingkü ngioji.

¹³Ngüso jü thaiutha asio noitsün dongai tilaitso shimkü khukü, tsüdekünai Thatü Asio Thang nai napkü meson haili ngo tsüyathsüoau noin. Nung ngüsoüh achinyan chhitsün thaiutha ko ngüso hau angja nou noin.

¹⁴Ngü ngüso hau Amkham Tsam nai chhiau phasihok chhi nou kiuji.”

¹⁵Akhengteng APAOU nou ngiom, “Zadok ainou nyimsantsün Levi kau meson nousoüh Israel khaiunia ngo ainou phoklekü khuwan nai jü amkham tsam nai ngo tü mongkiukü yathsüo. Nungtiphe lo sauhai ngo yathsüoau, naiuso jükhako i-iu naiuso ashe nou kankü shikü chaithio kiuau noin nung ngüso noin.

¹⁶Ngüsolu Jü Amkham Tsam nai napkü, jü amthang nai yathsüokü amkham kiu-e.

¹⁷Tilai ngüso Amkham Tsam kemong awem bekhan dongai nappe, ngüsoüh ne ashethop nou thoau noin. Amkham Tsam kemong tsüdekünai Amkham Tsam mongai ngüsoüh chhi nai emok ewoi nou lahtsün neshe sheitho titso tsütho-e.

¹⁸Nungti ngüso da lemlu tsüsungau ngüsoüh ashethop ne nou shantsün phakhut naiuso kandio kih-e, lüko omkhi tsükhi-e.

¹⁹Khaiunia kamtsün kengpun chiai moshikün khako Amkham Tsam nai chhitsün taoko thotsün neshe chongting nou ngiowan küta nung asio tsampai nouso ai taiu-e. Ngü- soüh asio neshe ainou khaiuniahoi tsütawaikü taiuau amao neshe tho-ela.”

²⁰Meson nousoüh ngüso khaiu tsü-iu-e. Ngüsoüh khaiu-ou nou omtso taiu-e.

²¹Akhei kemong nai monapkün khako meson nousoüh theng titso tsüshiu-e.

²²Meson saulünou amao khaiunia tsaküh komantsün menyiu tsamsigoh layang, apaüh Israel hai mongko nou asangteng menyiu tsüdekünai amao meson tsak ün jihinyiu lu tsamsigoh yangela.

²³Meson nousoüh jü khaiuniaso tü asio si tsüsio naiuso amkham yamko yanthsüo süne tsüyanthsüokü nung e-eme nou tsandeau noin.

²⁴Tilai ngiokhem nouko apülai sunge, mesonhoi nou nung jü ngiokhem nouso ayam tsangkü ngiothun thunkiu-e. Jü ngiokhem khemtsün tsangkü ngüsoüh don yam sümai nouso kankeiau noin, naiuso ngüsoüh chinyatnyi nou siokü taiuau noin.

²⁵“Meshen posinyiu, meshen thsoso ongko, meshen dei tsüdekünai tsamsigoh moyangkün meshen nio menyiuthso ün mea tsüdekünaito nungtü thantantsün tsangkü meson tsak to amkham yamko yanthsüokü noiau noin.

²⁶Apaüh yanthsüokü iulakü phiai chinyatnyi taiu au noin,

²⁷küta amkham tsam akhei kemong nai napküta apa losioau chaithio tsak kiu-e, nungti apaüh Amkham Tsam nai loüh yanthsüo shiau shio-e ta Ngo, Akhengteng APAOU nou ngioji.”

²⁸“Vetao tsak ainou amao vetao tsak hau lethioshikü thune au ngü Israel hai hau meson oukong haoson nou taim. Ngüsoüh to Israel nai tengkam tsütaiu-e; tiautenai ngüsoüh poutsün apem nouko apem Ngo noin.

²⁹Chih chaithio, angei chaithio, naiuso alaokiushitsün chaithio nouso apem mesonhoi ün eheshiu noi-e, naiuso alaokiushitsün chaithio nouso apem mesonhoi ün eheshiu noi-e, naiuso Israel nai jü thaiutha moda chosankü taiutsün alum ngüsoüh lou-e.

³⁰Meson nousoüh chongteng be-eiuyam ainou ameiteng naiuso Ngo hau chaithio- tsün alum theau noin. Khaiuniahoi nou themtsai tsaitsün pungkü, chongteng themtsai nung mesonhoi hau kiu-au noin, naiuso jü ouk ngüso tsamkhaiu nai noi-e.

³¹Yaang eantsün waio tsüdekünai thainian naiuso amao thainian tsaküh jeiattsün nyih mesonhoi sauüh titso tsüheau noin.”