Read Khiamniungan Naga Ezekiel 45 Bible Online

Ezekiel 45 - Khiamniungan Naga bible

Ezekiel 45

¹Tilai kau pungkü hau goh haoson janthat-e, haoson tsak to APAOU hau losiokü taiu au noin. Nung goh haoson nou atheng nai kilometer 12:5, atham nai kilometer 10 kü kiuau noin. Nung gohthang athum nou asio noi-e.

²Nung gohthang nouko Amkham Tsam thaiutha aniokun wekü nai meter 250, naiuso nung lemkü kengpun meter 25 atham nai wekü thekü gohthang aniokun apemai wekü tsak taiu-e.

³Nungko atheng kilometer 16, naiuso atham nai meter 6:4 nou thatsanküta taiu-e, nungko Amkham Tsam thsomkü hau noin nungto apem khaiuko asioteng athang noi-e.

⁴Nung Amkham Tsam nai APAOU yathsüotsün meson nouso thaiutha mothikü jansankü taiutsün, shing- khannio nouko asio athang tsak noi-e. Nungko ngüso tsam naiuso apaitso nou ngüso Amkham Tsam thaiutha noi-e.

⁵Haoson apai tsak nou nung Levi hai sauhaiüh Amkham Tsam nai chhiji ngüso tengkam thaiutha mothikü jansankü taiu-ela. Nungko ngüso kih-au noksong nouso noi-e.

⁶Asiothang nou tü thankü goh haoson tsak atheng nai kilometer 16, atham nai kilometer 3:2 ta Israel khaiunia saulünou kih-au thaiutha noknio tsak shanau mothikü jansankü wane.

⁷Nokpao nou thso thaiutha lüko gohthang moda jansankü taiuau noin. Ajenap nai Asio Thang elung ainou ajepek shingkhannio elung saokü, nung athang atheng atham that Israel kau tsak hau jankiutsün ko wekülu kiu-ela.

⁸Nung gohthang nou Israel nai nokpao nou thso haoson noi-e, nungti apaüh loto khaiuniahoi nou tsüthangmangshi-e, lüko apoitaiu shingkhannio nou Israel kau nouso thaiutha hau the-i-e.

⁹Akhengteng APAOU nou ngiom, “Asam Israelhai nokpaohoi, asamüh angei thsüokü sunhe-iu! Asam alothe naiuso athangmang chhi nouso lülaowan. Ti ayamtha naiuso ngiotsüo noin nung lüchhi. Asamüh loüh tilaitso jü khaiuniaso ngüso goumchi ainou tsükomane ta Ngo, Akhengteng APAOU nou asam hau chiteji.”

¹⁰“Khaiunia pungkü nou ngiotsüo tsoithat kankei-ela.”

¹¹“Awon thattsün efpha nung akhiam thattsün bat nouko wekü the-ela. Nung tsoithat awao nou homer noin. Tsoithat nungti that-e: Homer 1 = Efpha 10-bat 10.

¹²Tsoithat yamko nungti noi-e: Gerah 20 nouko-Shekel 1. Shekel 60 nouko-mina 1.”

¹³“Asamüh chaithio thaiutha nung tü athatlu au noi-e: Whet tso be-eiuyam ainou 1/60. Barli tso be-eiuyam ainou 1/60. Olip khiam haoson 1/100. (Nung bat tsangkü lüthatlu: bat 10 = homer 1 = Kor 1.) Onnemok: Israel khengtaiu nai onnemok 200 nouko 1. “Asam angei wankiuau, asamüh chih chaithio, athum jahkü amkham au thainian, aalou chaithio thaiutha thainian kankü shi-e ta Ngo, Akhengteng APAOU nou thoilutji.

¹⁶“Goumchi khaiunia chikü nou nokpao nou thso hau nung chaithio nouso kanaulu noin.

¹⁷Thainian athum jahkü amkhamau, chih chaithio kiuau, Alei Yan Sümai, Chinyatnyi nou siokü taiu au, naiuso Israel mele athum kotha nou, theng chaithio nouso kiu-au nung apa chhi thsale noi-e. Chih chaithio, khülam chaithio, naiuso athum jahkü chaithio kiutsünso kiuau apa chhi thsale noi-e.”

¹⁸Akhengteng APAOU nou ngiom, “Chongteng alei nou da chongteng ajekhaiu nai asamüh Amkham Tsam losioau alothe tsüsunkün jangtso- pong tsak chaithio kiuau noin.

¹⁹Meson nousoüh nung angei chaithio ainou she ajantso loküta Amkham Tsam koukheam nouso tü, amthang aniokun kheam püle nouso tü, naiuso kemong akhei nai bekhan kheam nouso tü lolut-e.

²⁰Nung alei nou ta lu ajekhaiu chinyatnyi nouko nai tsüngeankü tsüdekünai satokü angei sunhe nai nung thaiutha ayalilu chhi kiu-ela. Nungli asamüh amkham tsam nou siokü taiu-e.”

²¹“Chongteng alei nouko ajekhaiu chekü pülenyi nouko nai asamüh Aasantsün Sümai saohetsün tsalou- e. Khaiunia pungkü nou ajekhaiu chinyatnyi phoplao tsüthiokü shantsün themtsai nou he-e.

²²Nung sümai chongteng ajekhaiu nouko nai nokpao nokshing nou apa naiuso khaiuniahoi thaiutha ko jangtsopong tsak angei wankiu-iau chaithio kiu-e.

²³Sümai ajekhaiu chinyatnyi pungkü apaüh jangtsopong chinyat, onnemokpong chinyat alothe ti tsüsunkü nou athum jahtsün chaithio APAOU hau kiu-e. Apaüh loüh ajekhaiu tsütokü angei chaithio tsak nung wonpong tsak thio-e.

²⁴Jangtsopong naiuso wonpong aloat kiutsün chaithio pungkü, chonglam tsoi litre 17 apai, naiuso olip khiam litre 3, naiuso chaithio kiu-e.”

²⁵“Asoloutsün Sümai, sübao alei chekü chinyat nouko ajekhaiu chekü pungonyi nouko tsalouji, nung nokpao nou ajekhaiu chinyat pungkü nung angei chaithiolu kiu-e, nung chaithio athum jah-au noin, naiuso chonglam naiuso olip khiam nungli chaithio kiu-e.”