Read Khiamniungan Naga Ezekiel 46 Bible Online

Ezekiel 46 - Khiamniungan Naga bible

Ezekiel 46

¹Akhengteng APAOU nou ngioji, “Luoknyi chhi ajekhaiu nouso ko nai ajepek bekhan ainou nokpao kengmong saokü kiapkü taiu-ela. Lüko nung chinyatnyi nouko si Alei Yan Sümai ajekhaiu nouso to sopkü taiu-ela.

²Nokpao nou bechi ai ainou tsampai nai naptsün ai khuküta nung bekhan kheam nouso dongko tsakü noi-e, nungko meson nou apa chaithio athum nou jah-e küta apa ün aalo chaithio nouso kiu-e. Nung bekhan nouko apaüh amkham küta loüh jam kengai shikhushiau noin. Nung bekhan asham mosaokün lektso tsükiape.

³Chinyatnyi nou pungkü naiuso Alei Yan Sümai nou pungkü khaiunia apemüh nung bekhan khako APAOU nou tü kaukü am-e.”

⁴Chinyatnyi nouko nokpao nou athum jahkü APAOU amkham au, onnemokthso luok naiuso apong tsak, nungso apem alothe tsüsunkü APAOU dongai kankü shi-e.

⁵Nung onnemokpong pungkü nouko hakü apaüh chonglam tsoi 17:5 nou chaithio kiu-e, naiuso onnemokthso pungkü ko hakü apaüh ti kiu-e ta aiuji nung kan-e. Chih chaithio pungkü ko apaüh olip khiam litre 3, kanela.

⁶Alei Yan Sümai nouko nai apaüh jangtsopong tsak, onnemok- thso luok, naiuso apong tsak, nungso apem ti alothe tsüsunkü chaithio thio-e.

⁷Nung jangtsopong pungkü naiuso onnemok pungkü ko chonglam chaithio litre 17:5, naiuso onnemokthso pungkü ko to apaüh ti chaithio kiu-e ta mongchioji nungli kiu-e. Chonglam chih chaithio kiutsün pungkü olip khiam litre 3, thioau noin.

⁸Nung nokpao nou anaptsün bekhan leanküta apa naptsün yam tsangkülu shikhushi-e

⁹“Ti sümai ko lünou tilai khaiuniahoi nou APAOU amkham au shi-e, ngüsoüh amkham khemküta sauhaiüh ajenapki bekhan tsangkü nap nungso ajepekki bekhan ai shikhu-e, naiuso sauhai ajepekki bekhan tsangkü nap, ngüso ajenapki bekhan nai shikhu-e. Khaiunia saulünou apa naptsün bekhan yamai tsüshikhushi-e, lüko apa naptsün bekhan tü lashi nou bekhan ai shikhu-ela.

¹⁰Tilai khaiuniahoi nouso shi-e nokpao nou shi-e, naiuso ngüso khutsün taoko apa lüko khu-e.

¹¹Sümai ajekhaiu nouso naiuso sümai nai jangtsopong tsüdekünai onnemokpong pungkü chih chaithio nou kilogram 14, thio-ela, naiuso onnemokthso tsak pungkü ko amkham shitsün khaiunia nou ti kiu-e ta mongchioji, nungti kiu-e. Chih kilogram 14, pungkü olip khiam litre 3 chaithio kiu-ela.”

¹²“Athum jahtsün tsüdekünai aalou chaithio sübao lünou APAOU hau amongchio chaithio kiuau tilai nokpao mongchiosane, akheiteng kengpun tü thalutkü ajepek bekhan nung apa hau sopankü taiukiu-e. Apaüh chinyatnyi nouko chaithio kiutsünli lu apa chaithio kiu-ela, naiuso apa shikhukütün phiai bekhan nou kiapkü taiuwanela.”

¹³APAOU nou ngioji, “Ahom tsütokü APAOU hau chaithio tsak ti alothe tsüsunkü athum jahtsün pon tsak shelokü noitsün onnemokthso athio. Nung chaithio ajekhaiu pungkü thioau noin.

¹⁴Naiuso ahom tsütokü wonne tsoi 2 nouko lao-ekü hau olip khiam litre 1 nou chaithio akiu. Nung APAOU hau kiutsün chaithio ngiokhem nouso asaita hau tsakü noi-e.

¹⁵Onnemok, wonne, naiuso olip khiam, nouso ahom pungkü asaita APAOU hau thioau noin.”

¹⁶Akhengteng APAOU nou thoilutkü ngioji, “Nokpao tsaküh apaüh taiutsün gohthang tsak nung apa thsoso ongko tsak hau paopei kiu naito, nung thso nou thaio apa tsammong tengkam haoson tsakli noi-e.

¹⁷Lüko nokpao nou apa gohthang haoson tsak nou apa yathsüotsün ongko tsak hau kiunaito, nungto loüh tilai alaokiushitsün pon akum lemkü shishi-e nokpao tengkam iulashi-e. Nungh apa ün noin, naiuso loto nung apa si apa thsoso ün asai tengkam noi-e.

¹⁸Nokpao nou apa khaiuniaso ün tengkam titso tsülou-ela. Gohthang apaüh apa thsoso hau kiunai, nungto apa tengkam haoson ainou hau noin, nungti naito apaüh jü khaiuniaso gohthang lowantsün tsangkü saulünou tsüthangmang-e.”

¹⁹Nungaih nung khaiunia nou ngo akhei kengpun ajepekki dongai noitsün ajenapki bekhan shimkü nialükhun. Nungso mesonhoi thaiutha asio tsampai nouso noiküla. Apaüh ajenap dongai noitsün tsampai athang tsak tü hanlutkü ngiom,

²⁰“Mesonhoi nousoüh angei thaiutha aloat chaithio kiutsün nyih thengtsün athang noin, tsüdekünai laokü kiushitsün chaithio nouso, wonne chaithio tsantsünso, nungti kengpun achiai asio titso tsükanlü- shiau, tiautenai nungüh khaiuniahoi nouso tawai-e nou ta thetsün athang noin.”

²¹Nungaih apaüh ngü kengchiai nialokü khuküta aniokun püle nai ke ehen püle athang nai 20:4 atham nai 14:4 ta noitsün han.

²³Nung dio ai nou tü lalutkü injah theng sonkü nung lemkü lung dio ai nou aikü noiküla.

²⁴Nung khaiunia nou ngü hau chitekü ngiom, “Amkham Tsam nai yathsüotsünsoüh khaiuniahoi nou aloat chaithio kiutsün theng au nung atheng tsam nouso noin.”