Read Khiamniungan Naga Ezekiel 47 Bible Online

Ezekiel 47 - Khiamniungan Naga bible

Ezekiel 47

¹Nung khaiunia nou ngü Amkham Tsam bekhan nai laokü shikü nialükhun. Nungko Amkham Tsam bekhan khem ainou Amkham Tsam lahlutkü noitsün yam ajepek dongai jan-ikü haiu chetkü noiküla. Nung amthang nou tü ajepekki dongai Amkham Tsam tü ajepekki ainou tsangtsün noiküla.

²Nungai nung khaiunia nou ngü nialoukü ajenapki bekhan yam tsangkü Amkham Tsam ainou niashi, küta ajepek dongai sheikü noitsün bekhan dongai ngo nialükhun. Nungko ajepekki bekhan dongai nou haiutso tsak tsangkü noiküla.

³Nung khaiunia nou apa ün athat auo nou ajepek dongai saokü meter 500 thatsan küta ngü tü nung haiuthsongan tsangkü yankü lükhu ta ngiom. Nung haiuthso jü singkao ko yangkülu noiküla.

⁴Nungaih apaüh loüh meter 500 thatsanshin, naiuso nungko khiam nou jü singkao ko yangkü sungh, Loüh asaothun nai meter 500 thatshin, nungko khiam nou jü oumko yangkü noiküla.

⁵Loüh apaüh meter 500 thatshin, naiuso nung haiuthso thatü aokü ngü nung ayanthat au tsüshiokü noiküla. Nung khiampat tsangkü tsüdekünaito ayanthat au thatü aokü noiküla.

⁶Apaüh ngo tü ngiom, “Khaiunia thso, nungso chikü paotsangkü angelo.” Nungaih khaiunia nou ngo khiamkuk nai laokü nialoukü shin,

⁷naiuso tilai ngo nungai shisaom, ngo haiukuk pungkü nai pai thatü piakü samtsün ep.

⁸Apaüh ngü tü ngiom, “Nung khiam ajepek nai noitsün goh yankü Yordan Tsamei nai saokü naiuso Ee-Khiamnok dongai khukü tsangji. Tilai nung Ee Khiamnok ai tsangthioji nungüh she ün Jem khiam li-ankü ashiu khiam nou tsangji.

⁹Tilüsongai nung haiu nou tsangthioji, nungko thainian naiuso nguo in apem kih-e. Nung haiu nou Ee Khiamnok nou sanglingkü shane, naiuso tilüsongai nung tsangthioji, nungüh aah nou kih-i-e.

¹⁰Engedi Haiu ainou Eneg- laim Haiu nouso dongai khutsün thathunkü nungko khiamnok sai nai ngouphek khaiuniahoi nouso noi-e, naiuso ngüsoüh ngüso nyao lowai au nungko sapengji. Nungko Mediteranian Khiamnok nai kihtsün nguo nouso chiai in piakü noi-e.

¹¹Lüko haiukuk nai noitsün khiam tsütsangkü puchet lilu noi-e. Nungko Jem sungtsün tsakli asaita noi-e.

¹²Haiukuk nemthso ai aheshiu epau pai nouso in pungkü samsan-e. Nung paisa nouso to tilaitso tsüshei-e, naiuso eiu eiutsün tilaitso tsülao-e. Nungso tü alei pungkü eiu ayan eiu-e, tiautenai nungso tü Amkham Tsam ainou chetsantsün haiu nou khiam kiuji. Nung pai nousoüh eheshiu kiukü nung paisa nouso mouse thaiutha kankei-e.”

¹³Akhengteng APAOU nou ngiom, “Kau chekü nime nouso hau sonthat kiuau noitsün goh elung nouso nungso noi-e: Yosep kauüh ahoi nime eppe.

¹⁴Ngü asam paosiposo tü nung goh tengkam ngüso hau kiu-e ta mongkü thaloukü noin; nung lo asam ongko wekü lüjanthat.

¹⁵Ajepekki elung nung ajepek nai Mediteranian Khiamnok ainou Hetlon noknio Hamat Aoyan ai, Zedad noknio,

¹⁶Berotha noknio naiuso Sibraim, (nungso Damaska hai goh naiuso Hamat hai goh jetko noin) Tikon noknio saokü, nung Haran khiamkhan ko e-ekü noin.

¹⁷Nung ajepekki elung nou Medi- teranian Khiamnok ainou Damaska hai elung sai ai naiuso ajenap nai Hamat thekü ajepek nai Enon noknio dongai saokü noin.

¹⁸“Ajepek ainou elung Damaska naiuso Hauran goh jetko tsalou nou ajenap nai Israel goumchi jetko Yordan Haiu naiuso ajepek nai Gilead thekü Ee-Khiamnok tü Tamar saokü noi-e.

¹⁹“Ajepekki elung nou Tamar ainou ajepekki-ajenap nai Kades Meriba she saokü naiuso ajenapki-ajenap Ijip hai elung ainou Mediteranian Khiamnok tü yangkü noi-e.

²⁰“Ajenap elung nou Mediteranian Khiamnok ai tsalou nou ajenapki nai Hamat Aoyan tü saokü noi-e.

²¹“Nung goh asam kau mongko lüsonlou;

²²nung asam thaiutha asaita tengkamau noi-e. Tilai asamüh nung janthat-e, gohmao khaiunia sauhai asamko kihakü noin naiuso chetsinyimkü noin ngüsoüh lüko ngüso goh haoson epau noin. Ngüso lüko asam Israelhai paopungli thumkü kankei-e, naiuso Israel mele nouso ko aikü phongdekü ngüso goh haoson loha-e.

²³Gohmao khaiunia sauhai asam ongko kihakü noin ngüsoüh ngüso haoson eppe ta Ngo, Akhengteng APAOU nou ngioji.”