Read Khiamniungan Naga Ezekiel 48 Bible Online

Ezekiel 48 - Khiamniungan Naga bible

Ezekiel 48

¹Ajenapki elung nung ajepek nai Mediteranian Khiamnok ainou Hetlon noknio tü thalutkü, Hamat Aoyan ainou Enon noknio, nung Damaska hai goh naiuso Hamat jet saokü. Kau pungkü nou ajepek ainou ajenap elung Mediteranian Khiamnok dongai khukü ajenapki ainou ajepekki saokü nouko goh haoson tsak tsak nungti eppe: Dan Asher Napthali Manasse Efraim Reuben Yihuda

⁸Nungthan ahoi gohthang nung amothi chhi thaiutha kankei au mothikü taiu-ela. Nung gohthang ajenapki ainou ajepekki atham nai kilometer 12, naiuso atheng nai ajepek ainou ajenap nou kau nouso hau janthat kiutsünko wekü the-ela. Amkham Tsam nou nung mongko lahthio-e.

⁹Nung gohthang awem nouko atheng atham kilometer 12 naiuso 10 kilometer nou amothi athang tsak nung APAOU hau losiokü taiu-e.

¹⁰Nung asiothang nouko meson nouso hau athang tsak noi-e. Ngüso gohthang nung ajepek ainou ajenap saokü kilometer 12:5, naiuso ajenapki ainou ajepekki saokü kilometer 5 ta thatkü taiu-e. Nung athang awem nouko APAOU Amkham Tsam lahthio-e.

¹¹Nung asiothang nou Zadok tü chetsinyimtsün mesonhoi nouso thaiutha noi-e. Ngüso Israel haiüh chhi tsüthakü chhitsün nai tsühakü, Levi kau amao mepem nousoüh chhitsün khekkü ngotü mongkiukü yathsüokü shin.

¹²Nungtiphe ngüsoüh Levi hai tü thankü amothi athang tsak nou eppe, naiuso nungto apem chiko asioteng noi-e.

¹³Levi haiüh lüko mesonhoi nouso haoson tü ajepekki nai amothi gohthang tsak eppe. Nung gohthang ajepek ainou ajenap saokü kilometer 12:5, naiuso ajepekki ainou ajepekki saokü kilometer 5 noi-e.

¹⁴APAOU hau losiokü kiutsün gohthang nung to apem chiko ameiteng noi-e; naiuso nungto laitso tsüjane tsüdekünai tsühelou-e, tsüdekünai amao hau tsülikiu-e. Nung asio naiuso APAOU kotha nou noin.

¹⁵Poikü taiutsün amothi gohthang kilometer 12:5, naiuso kilometer 2:5 nouto tsüsio, lüko khaiuniahoi nou kankeiau the-e. Ngüso nungko kihkü nung gohthang kankei au shio-e. Nung gohthang awem nouko noknio nou theau noin,

¹⁶naiuso nung aniokun pungkü nai meter athat 2250 wekü the-ela.

¹⁷Nung noknio lemkü e-tsakai meter that 125, kengpun taiu-e.

¹⁸Noknio shanküta poitsün asio gohthang ajepekki nai noitsün — kilometer 5 naiuso ajepek nai kilometer 2:5 naiuso ajenapki nai kilometer 5 naiuso kilometer 2:5 noitsün gohthang nou nung noknio nai kihtsün khaiuniahoi nousoüh eiu a-au kankei-e.

¹⁹Sau mele ainou shilünou nung noknio ko kihtsün khaiunia nou nung gohthang eiu a-au the-e.

²⁰Nung gohthang awem nouko mothikü taiutsün apem tü thatnai aniokün pungkü nai kilometer 12:5 noi-e, naiuso nungko noknio nou tomtaiutsün athang hakü noi-e.

²¹Nung gohthang ajepek ainou ajenap sübaoko Amkham Tsam naiuso noknio noin, nung mesonhoi naiuso Levihoi goh noin, apoitaiutsün gohthang nung nokpao kotha nou noin. Nungüh ajepek nai elung naiuso ajenap nai Meditera- nian Khiamnok ngoikü, naiuso ajenapki nai Yihudahai haoson gohthang naiuso ajepekki nai Benjaminhai haoson gohthang tsak nou saokü noin.

²³Ajepekki nai noitsün ajepek ainou ajenap Mediteranian Khiamnok saokü apoitaiu mele (kau) nouso pungkü nou epau noitsün gohthang haoson tsak tsak nou ajenapki ainou ajepekki saokü nai nungti janthat: Benjamin Simeon Isakar Zebulun Gad

²⁸Gad kau hau sonkiutsün ajepekki nai noitsün gohthang, elung nung ajepekki ainou ajenap nai Tamar ainou Kades ngoikü, naiuso ajenapki si ajenap elung nung Ijip hai elung ainou Mediteranian Khiamnok saokü noi-e.

²⁹Akhengteng APAOU nou ngiom, “Israel kau nouso hau athalouau noitsün gohthang nungti janthat kiu au noin.”

³⁰Yirusalem noknio nai napau bekhan nouso chekü nime noin. Dio ai püle pungkü meter that 2250 naiuso nungko bekhan sümeme noin, nung bekhan pungkütü kau tsak tsak nian satlutkü noin. Ajenapki dioai nai noitsün bekhan nouso tü Reuben, Yihuda, naiuso Levi ta nian satkü noin; ajepek dio ai nai noitsün bekhan nouso tü Yosep, Benjamin, naiuso Dan ta satkü noin, naiuso ajepekki dio ai nai noitsün bekhan nouso tü, Simeon, Isakar, naiuso Zebulun ta satkü noin, loüh ajenap dio ai nai noitsün bekhan nouso tü, Gad, Asher, naiuso Napthali ta satkü noin.

³⁵Noknio lemkü aniokun püle nouso apem ko atheng nai kilometer 9 noin, Lo yakü nung noknio nian nou, “APAOU Nungko Noin!” ta noi-e.