Read Khiamniungan Naga Ezekiel 5 Bible Online

Ezekiel 5 - Khiamniungan Naga bible

Ezekiel 5

¹APAOU nou ngiom, “Khaiunia thso, sah amonting tsak louküta nungüh asonpon naiuso akhaiuo apem lü iuwan. Naiuso khaiuo nou tsoi nouko thatküta haoson süme hau lüjanthat.

²Tilai nung noknio shio- loutsün ajekhaiu nouso yankheme, haoson süme nouko haoson tsak nou nung noknio nai lüjah. Loüh amao haoson süme nou loküta noknio bechiai khuau ni tsalounai nung lütapthat; naiuso haoson süme nouko haoson tsak ni ahsheih nai lüsokpeng naiuso ngo nung tü jü sahüh kome.

³Khaiuo ajantso loküta nung anepengthun nai tsanshikü lütaiu.

⁴Küta nungko nou loüh ajantso loküta, nungso in nai lüyakthio, naiuso nungso lüchethean-i. Nungso ainou in Israel hai mele athum thapekkü nyaikü khu-e.”

⁵Akhengting APAOU nou ngiom, “Yirusalem tü athaplu. Ngo apa amao shingkhannio nouso lemjeikü goumchi awemtingko taiukiu.

⁶Lüko Yirusalemüh jü athoilut nouso thako khengshi, naiuso amao mele nousoko apa tekkü tsümeikü naiuso apa lemkü noitsün amao shingkhannio nouso tü tekkü apaüh angio tsü- angkü han. Yirusalemüh jü athoilut nouso wanan naiuso jüngiokhem nouso tsükankei.

⁷Lo, Ngo, Akhengting APAOU nou ti ngioji nung anglu, Yirusalem. Jü ngiokhem nouso angio tsüangkü tsüdekünai jü athoilut nouso tsükankeikün tsangkü ni lemkü noitsün shingkhannio nouso tü phopkü angja ni losankü noin. Tiautenai ni amao mele nouso saisile tü hoilut.

⁸Nungtiphe Ngo, Akhengting APAOU, nou niko eh noin ta ngioji. Mele nouso chikü nou epau lümeikü ngo ni tü mi-nou kheme.

⁹Ngo chinyantsün chhi nouso chikü ni chhijiphe, ngo nung khako tilaitso tsüchhidekün naiuso loüh tilaitso tsüchhi shi-ao nou angja Yirusalem hau kiu-e.

¹⁰Nung shioko Yirusalem nai noitsün posinyiu nousoüh ngüso thso he-e, naiuso ngüso thsosoüh ngüso posinyiu he-e, naiuso ngo asam sauhai aa poikü noin nungso apem yam pungkü nai pengpuni-e.

¹¹“Nungtiphe, ngo aa Goa, Akhengting APAOU nou ngioji: tiautenai ni jü Amkham Tsam, achinyanao lümeikün jengtsaiu naiuso tsümeikün alumüh lochinyanphe, ngo ni tü tsütsüojinkü heanküta wanane.

¹²Asam haoson süme nouko haoson tsak akia nou tsüdekünai naiu nou noknio nai eane; haoson süme nouko haoson tsak nou sakaiu nou noknio bechi ai hethiowane; naiuso aphiteng haoson süme nouko haoson tsak nou ngo ahsheih nai sokpenge küta ngüso tü salaiu nou kome.

¹³“Ngo momongtsamkün lektso asamüh jü amongmat naiuso amongthe oukong nou ngesane. Tilai nungso chikü thawao-e, asam mongtsükiutsün shioko ngo, APAOU mongmat sungkü noiküla ta asamüh monglame.

¹⁴Ni lemkü noitsün mele nouso pungkü ainou asam yanlü- khun nai ngüsoüh lochilotsaokü adongko tsüshimkü tsakei-e.

¹⁵“Tilai ngo mongmatkü naiuso mongthekü asam hau angja kiu-e, nungai ni lemkü noitsün mele nouso lekkate. Ngüsoüh ni tü chinyankü thape naiuso lochilotsao-e.

¹⁶Ngo asam heshiu yam shitsün lophangane naiuso asam naiu-i-e. Asam tü uokopchon amonting nou koptsün khekkü asamüh naiusile kia nou ngela-e.

¹⁷Asam thsoso si asam loatkü wanao naiusile naiuso liu thainian nouso, akiasiya, angem- singem, naiuso ehli nouso honge, ta Ngo, APAOU, nou ngioji.”