Read Khiamniungan Naga Ezekiel 6 Bible Online

Ezekiel 6 - Khiamniungan Naga bible

Ezekiel 6

¹APAOU nou ngü tü chitekü ngiom,

²“Khaiunia thso,” Israel hai king nouso dongai athaplu naiuso ngüso hau jü ngiongem lükiu.

³Israel hai king nouso tü APAOU ngio anglu ta lüngio-Ngo Akhengting APAOU nou king nouso, choi nouso lungken nouso naiuso tsamei nouso tü ngioji: Khaiuniahoi nousoüh sotsom goa amkhamtsün athang nouso lotheao ngo sahlaiu tsak honge.

⁴Amthang nouso naiuso angannyam jahtsün amthang nouso lothekü wane. Nungko noitsün khaiuniahoi nouso chikü ngüso sotsom goa khako loatkü wane.

⁵Ngo Israel hai mia, naiuso uo nouso amthang nouso lemkü sukpenge.

⁶Israelhai noknio chikü lotheane, nungti ngüso amthang naiuso sotsom goa nouso nelangkü thiopekke; ngüso ün angannyam jahtsün amthang nouso nelangkü lopekke, naiuso ngüsoüh shantsün alum tsüepshikü mowane.

⁷Khaiu- niahoi loattsün alumai noi-e, naiuso sauhai aasane ngüsoüh Ngo APAOU ta mitha kiu-e.

⁸“Ngo khaiunia ajantso achaoat- tsün apemai noi-e, naiuso sauhai nung ainou thakhu-e küta mele nouso ongai pengpuni-e,

⁹nungko ngüso akhothio nai noi-e. Nungko ngüsoüh ngo ngüso hau angja naiuso amiam nou kium ta yangshi-e; tiautenai ngüso mong tsülamkün mongpem nousoüh ngü wanan, nungliko sotsom nouso bao singlou. Naiuso ngüso meshen chija chülukü iula-e tiautenai tsümeikün naiuso alonyappantsün chhi ngüsoüh chhin.

¹⁰Ngo APAOU naiuso jü alotsüo nouso yaang to tsüde ta ngüsoüh nge-e.”

¹¹Akhengting APAOU nou ngiom, “Apha lüpate! Ahok nou lüngam! Tsümeikün naiuso achinyan apem Israel haiüh chhisantsün shioko mongsaiukü lüwe. Ngüso ehli nai, naiusile nou, naiuso akiasiya nou eanao noin.

¹²Sauhai laiukü nai noin ngüso i-imkia nou; ashim ko noinso ehli nai; naiuso sauhai aasane ngüso naiusile nou eane. Ngüsoüh jü amongmat apem ngela-e.

¹³Ngüso mia sotsom nouso ongko; amthang nouso lemkü, choi atsok pungkü, kingson nouso pungkü, pai pungkü khemai, naiuso lampai asong noitün athang pungkü nai pengpune. Nungai khaiunia chikü nou Ngo APAOU noin ta nge-e.

¹⁴Ah, ngo jüpha loluküta shingkhannio nou lomo- wane. Ngo nung ajepekki liutsa ainou ajenap Ribla noknio saokü Irael hai kih-au athang titso tsüpoi- taiu-e. Nungaih khaiunia pungkü nou Ngo, APAOU noin ta nge-e.”