Read Khiamniungan Naga Ezekiel 7 Bible Online

Ezekiel 7 - Khiamniungan Naga bible

Ezekiel 7

¹APAOU nou ngüko chitekü ngiom,

²“Khaiunia thso,” “nungti Ngo, Akhengting APAOU nou Israel goum- chi thaiutha ngioji: Nung goumchi athum thaiutha athon shisaokü noin!”

³“Israel, akhako athon nou shianiu. Ni ngü mongmattsün nge-e, tiautenai achhi tsangkü ngo ami kheme. Ni nou achinyan saisile chikü thaiutha ngo ni hau laokü kiushi-e.

⁴Ngo ni tsüpoitaiu-e tsüdekünai atsüojinyang titso tsühane. Ni achinyan chhitsün thaiutha ngo angja kiuao noin, nungti ni ngo APAOU noin ta nge-e.”

⁵Nungti Akhengting APAOU nou ngioji, “Akuothe tsak phiko akuothe tsak ta akhako shiji.

⁶Nung chikü shi-aniu. Nung athon nou noin. Athaiutha ayang tsünoishi!

⁷Asam nung goumchi nai kihkü noinso thaiutha athon nou shiji. King nai amthang nouso ko amonglingau tsüde, lüko apülai ao atao nou shimkü noin.”

⁸“Tsütsangkü jü amongmat sung- tsün ngesane. Tititenai ni chhitsün thaiutha ngo ni tü thaisanji, ni nou achinyan chhisiya chikü thaiutha ngo ni hau laokü kiushi-e.

⁹Ngo ni tsüpoitaiu-e naiuso atsüojinyang tilaitso tsühane. Ngo APAOU noin naiuso ni hau angja kiutsün tsak nou ngo noin ta nge-au ni chhitaiutsün achinyan chhisiya nouso thaiutha ni hau angja kiuao noin.”

¹⁰Israel thaiutha akuothe ajekhaiu nou shiji. Alothe nou shingjikanji. Abülom nou atsokting athang sao-iu.

¹¹Alothe chhi nou tsümeikün piakü sungiji. Ngüso tengkam, alengmei, ajinka titso poikü tsünoishi-e.

¹²Atuhloutsün si ajantsünko ti alesan tsünoishi-ao nou ajekhaiu naiuso atao shimkü noin, tiautenai Goa ün alohat nung khaiunia pungkü khako wekü shi-e.

¹³Chaile khaiunia tsak apa sapattsün laokü epshiao shiokü aakih laiukü tsükih-e, tiau- tenai Goa ün amongmat khaiunia pungkü chiai noin. Sauhai tsümeikü noin ngüso tsü-asane.

¹⁴Ngüsoüh jangong nou mattiu, naiuso khaiunia pungkü khemloukü noin. Lüko tsaktso ehli nai tsükhu, tititenai Goa ün amongmat khaiunia pungkü khako wekülu shiao noin.

¹⁵Sonkeng nouso ai ali-etsün, naiuso tsam nouso ai akiasiya, naiusile nou noin. Sau noknio wankü khu-e, apa he-elangetsün nou eane, naiuso sau noknio nai noin naiusile akia nou eane.

¹⁶Ajantso to tsümei nai chongmükham ta hattatkü king nouso ai haiuloutsün khekkü noi-e. Ngüso chikü meshen angei thaiutha mongsaiu-e.

¹⁷Khaiunia pungkü pha oukiakü iula-e, naiuso ngüso singkao ngaongao-e.

¹⁸Ngüsoüh nethe ten-e naiuso nung chikü nouko ngüso ngaongaokü noi-e. Ngüso khaiu eiuwankü apem miam-e.

¹⁹Ngüso chaiou lakkeng naiuso tangkason ngüsoüh sonkeng nai beisikinli yakkane, tiautenai APAOU amongmat sungtsün ainou chaiou lakkeng tsüdekünai tangkason tiühtso ngüso tsükipsane. Ngüsoüh nungso achinek mongtsam-iao tsüdekünai ngüso thai lomiankü kankeiau tsüshio-e. Chaiou lakkeng naiuso tangkason nou ngüso angei nai nialükhun.

²⁰Ataojam ngüso alengmei chaiou nousoüh ngüso bülomikü noiküla, lüko ngüsoüh nung achinyan ao lü- meikün sotsom nouso shanau kankei. Nungshioko APAOU nou ngüso chaiou ngüso thaiutha tsüsiokü hau iula-i.

²¹“Ngo nungso gohmao khaiunia- hoi nouso hau kaulowani-e,” “naiuso ngüso chaiou nung ngiokhem lothe- tsünso hau lowaniküta lochinyani-e.

²²Tilai jü Amkham Tsam jengtsaiu nouso lochinyane, naiuso kauhoi nousoüh lopekkü lochinyane nai ngüso ainou jükha phokle-e.”

²³“Alumai apülai noin tiautenai goumchi nou she lopengtsün miankü naiuso noknio nouso pha po-etsün nou miankü noin.

²⁴Nungtiphe ngo mele nouso ongko tsümeitingkün mele nialoukü shi-e, kúta asam tsam ngüso hau louwani-e. Asamüh amkhamtsün athang nouso ai tilai ngo mele nouso hau lochinyani-e nungaih asam ün akongting khaiu- niahoi amonglam mowane.

²⁵Ayangelatau nou shiji. Asamüh aalou nou ta yame lüko nung tilaitso tsüeppe.

²⁶Akuothe tsak phiko akuothe tsak ta thawaoshi-e, naiuso yaang ngiongem phiko yaang ngiongem ta hoilutkü shi-e. Nungaih asamüh e-po nouso tü khapiam ngio atsangshei ahan ta koja-e. Mesonhoi nousoüh khaiuniahoi hau tsandeau, naiuso ashehoi nousoüh ayamhan kiuao ti tsünoi-e.

²⁷Nokpao nou mongsaiu-e, asonghoi ayangtaiu mowane, naiuso khaiuniahoi ahat nou ngaongao-e. Asamüh chhikü shitsün thaiutha ngo asam hau angja kiu-e, naiuso asamüh me ta thaisantsünli asam tü lüko thaisane. Nung tsangkü Ngo, APAOU noin ta asam hau hane.”