Read Khiamniungan Naga Ezekiel 8 Bible Online

Ezekiel 8 - Khiamniungan Naga bible

Ezekiel 8

¹Sam khothiotsün pon luok, alei luok, ajekhaiu pungunyi nouko nai, Yihuda ainou akhothio nai noitsün aheihoi nouso ngüko jü tsamai moknoiküla. Nungaih alekta Akhengting APAOU oukong ngü da shin.

²Ngo thapsan nai khaiunia sotsom tsak tü innyaikü ep. Om ko yangkü pem nai thapnai daoson in khekkü, naiuso om ko yang nou pem halai thapnai daoson tsakli telinglingkü noiküla.

³Nai apaüh pha khekkü tsatshi küta jü khaiuo ai hekü ngü thalo. Naiuso nung atsangshei eptsünko Goa Onthso nou ngü ah-wem tsokkü loklou küta Yirusalem ai kankü khu. Apaüh ngu Amkham Tsam ajenapki bekhan dongai naptsün akheiting bekhan dongai nialoukü khu, nungko Goa mongkia-itsün sotsom tsak shantaiukü noiküla.

⁴Tilai ngo Kebar Haiu shimkü noiküla nungko Israel hai thatü oukü Goa hatsün khekkü ep.

⁵Goa nou ngü tü ngiom, “Khaiunia thso, ajenapki dongai lüthap.” Ngo thapnai, nungko Goa mongkia-itsün sotsom tsak bekhan nai naptsün dongko amthang shimkü ep.

⁶Goa nou ngü tü ngiom, “Khaiunia thso, ti thawaoji nung ni epjimo? Israel haiüh nungko achinyanao lümeikün chhisiyaji, nung shioko ngüso jü asiothang ainou tekkü laiukü komanji, nungtiphe athap. Asamüh loüh nung chiai tekkü amiam chhi nouso chhikü eppe.”

⁷Apaüh ngü tsam koukhan dongai nialokü khuküta ngü hau dioai nouda khan tsak satkü han.

⁸Nungai apaüh ngü tü ngiom, “Khaiunia thso, nungko dioai nou alosat.” Ngo nung losatnai nungko kou tsak epsan.

⁹Apaüh ngü tü ngiom, “Nungko lünap küta achinyanao lümeikün ngüsoüh chhitsün angei ta lüthaplu.”

¹⁰Nungtiphe ngo napküta thap. Nungko dioai nouso chiai pao naiuso tsüyanthsüokün thainian sotsom nouso miankü satlutkü, naiuso Israel haiüh amkhamtsün amao jengtsaiu nouso satlutkü noila.

¹¹Nungko Safan thso Jeazania lüko hakü Israel hai aheihoi aochinyat noiküla. Ngüso chikü pha nai angannyam jahtsün chiu semkü tsa, naiuso nung angannyam ainou inkhao khaosan.

¹²Goa nou ngü tü sangkü ngiom, “Khaiunia thso, Israel aheihoi nousoüh akauai ti chhiji ni nung epjimo? Ngüsoüh sotsom nouso tsampai tsak nai taiukü amkhamji. Ngüsoüh nungti ngioji, ‘APAOU nou sam tsüepji! Apaüh shingkhannio nou le-aniu.’”

¹³Nungaih APAOU nou ngü tü ngiom, “Ngüsoüh nungtü phopkü achinyanao lümeikün chhisiya ni eppe.”

¹⁴Nungtiphe apaüh ngü Amkham Tsam tü ajenapki bekhan dongai nialükhun küta Tammuz goa eantsün thaiutha shapkü noitsün menyiuhoi han.

¹⁵Apaüh sang, “Khaiunia thso, ni nung epjimo? Nungtü tekkü achinyan chhisiya nouso ni eppe.”

¹⁶Nungtiphe apaüh ngü Amkham Tsam akheiting nai nialoukü nap, Nungko asiothang nai naptsün dongko, amthang naiuso yamjet nouko, khaiunia kheikü pungo thatso noiküla. Ngüsoüh ngüso khaiophi asiothang nou tü sheilut naiuso ajepek nai kankü nap küta ajepektsün tü amkhamji.

¹⁷APAOU nou ngü tü ngiom, “Khaiunia thso, ni nung epjimo? Nung Yihuda khaiunia nou achinyan ao lümeikü chhitsün nou ngüso mongtsam tsüthasang, naiuso shingkhannio nou thapekkü angem sungitsün nou tsümongtsam. Tsüde, ngüso nung Amkham Tsam nai shiküta chhikü loüh ngo tekkü bao mongmati-au noin. Athaplu ngüsoüh mongmati-au chhitsün tsangkü ngü titi lochi lotsaoji!

¹⁸Ngüsoüh ngü amongmat-itsün oukong chikü ngesane. Ngo ngüso tsüpoitaiu-e tsüdekünai ngüso hau atsüojinyang titso tsühane. Ngüsoüh ngü tü sang asong nou ashiotsün lektso misao sao-e, lüko ngo ngüso misao tü tsüang-e.”