Read Khiamniungan Naga Ezekiel 9 Bible Online

Ezekiel 9 - Khiamniungan Naga bible

Ezekiel 9

¹Nungaih ngo Goa sangh asong nou, “Asam noknio hau angja kiuao noitsün khaiuniahoi, asam sahsingiu asam tü sunkü nungai ashi ta wetsün lula.”

²Jamaolu ajenap dongai noitsün Amkham Tsam bekhan ainou sasingiu kankü khaiunia luok shin. Ngüso ko hakü khaiunia tsak ne-ashethop sheitho thokü, asatau tso tsak kankü noiküla. Ngüso chikü shikü daoson amthang dongko tsa.

³Nungaih akoi potsün thainian ainou Israel hai Goa hatsün awon okü tsak sungkü nung Amkham Tsam ai naptsün bekhan dongai soikü khu; naiuso ashethop ne tenkü noitsün khaiunia nou tü APAOU nou jonkü ngiom.

⁴“Yirüsalem noknio thapekkü khuküta noknio nouko achinyan chhisiyatsün thaiutha ko mongkiakü naiuso angjakü wetsün khaiunia pungkü khakheng ai ii tsak lolut.”

⁵Naiuso Goa nou amaohai tü ngiotsün ngo lula, “Asam noknio nou yankü apa phiai lühoilut, küta loatkü lüwan. Tsaktso tsüpoishikü, sau khako lünou atsüojin tsülepkü lüloat.

⁶Petchehoi, oumhoi, mesohoi nyiu nouso, naiuso methsohoi lüloat. Lüko sauhai tü khakheng nai ii sunkü noin ngüso tsak tütso lathantan. Nungh jü Amkham Tsamai chong lüyalou.” Nungtiphe ngüsoüh aheihoi Amkham Tsam nai tsakü noitsünso tü yalou.

⁷Goa nou ngüso tü ngiom, “Amkham Tsam lülochinyanan. Naiuso nung lemkü noitsün ke nouso aloattsün mea nou lümean-i. Chhi nai lütsalou!” Nungtiphe ngüsoüh noknio nai noitsün khaiuniahoi loatau tsalou.

⁸Aloattsün taoko, ngo nungko pemsa noiküla. Ngo jükha goh ai kaukü napküta wekü ngiom, “Akhengting APAOU ni Yirusalem tü thatü mongmattsün shioko Israel nai poitaiutsünso chikü loatkü wane süne?”

⁹Goa nou thalan, “Israelhai naiuso Yihuda haiüh atsüoting angei suntsün shioko aphio noin. Ngüsoüh goumchi miankü loat naiuso Yirusalem nung she nou miankü noin. Ngo APAOU, nou ngüso shingkhannio leankü, ngüso tü tsüthapshi ta ngüsoüh ngioji.

¹⁰Lüko ngo ngüso khako atsüojinyang tsünoi-e; Ngüsoüh me tü chhitsünli ngo ngüso tü chhi-e.”

¹¹Nungaih ne ashethop tentsün khaiunia nou apa thaiutha mitha kiukü ngiom, “Ni ngü tü thoiluttsünli ngo chhianiu.”