Read Khiamniungan Naga Daniel 10 Bible Online

Daniel 10 - Khiamniungan Naga bible

Daniel 10

¹(Persiahai nokpao Sairus nokshing sampon nouko nai Daniel, sau tü Belteshazar ta lüko jonkü noiküla, apa dongai ngio tsak atsangshei shin. Nung ngiongem nou atsüo noiküla lüko nung ngelaau thatü chek. Nungtiphe apa hau nung atsangshei tsangkü sasakiu.)

²Nungtaoko nai, ngü anoujet süme mongsaiukü noiküla.

³Ngü nung anoujet süme moyanlükhunkün lektso chihmei, nyi, theng, titso tsüheshiu, tsüdekünai khaiuo lüko tsühetthe.

⁴Pon nouko chongting alei ajekhaiu kheikü pülenyi nouko nai ngü Tigris Haium sai ai tsakü noiküla.

⁵Ngo ngüsankü thapnai khaiunia tsak ashethop neshe naiuso alengmei chaiou lakkeng omkhi thokü ep.

⁶Apa pem nung chaiou uotsün khekkü noiküla. Apa kha ahsalapli naiuso apa niovei inli nyaikü noiküla. Apa phasihokso taoson asemteng khekkü oukü, naiuso apa sangngem hoi asongting ngemtsün khekkü noiküla.

⁷Nung atsangshei eptsün tsak nou ngülu noiküla. Khaiunia sauhai ngüko hakü noiküla ngüsoüh titso tsüep, lüko ngüso lekkatkü jingkü khu naiuso paman.

⁸Nung athanga atsangshei tü thapkü ngü pemsatso noiküla. Ngü da oukong ti tsünoishi, jükha li-ekü khutsün shioko sauüh tsangsheiao tsüshio.

⁹Tilai ngü apa sangh lula, ngü sei tsüngekü kha nou goh ai thaothiokü loian.

¹⁰Nungaih pha tsaküh ngü tü thalouküta tentsa, nungko ngü ngaongaokülu noiküla.

¹¹Aünhong nou ngü tü ngiom, “Daniel, Goa nou ni tsüojinji. Atsa naiuso ngü ni tü ngioau noitsün tü tsüokü anglu. Ngü adongai hongkü noin.” Tilai apaüh nungti ngiom, ngü loüh ngaongaokü tsakü chu.

¹²Nungaih apaüh ngiom, “Daniel, hatkü lanoi. Ni angela epau thaiutha nyaploukü theau thaloutsün ajekhaiu nai yakü amisao Goa nou thala-iu. Ngü shitsün nung amisao thalatsün noin.

¹³Persiahai nokshing nokpao nou ngü ajekhaiu kheikü tsak kiapjei. Nungaih honghoi ongko atengting tsak nou Maikel, ngü halouau shin, tiautenai Persia nai ngü pemsatso noiküla.

¹⁴Apaüh ngiom, Ashiau taoko akhaiuniaso tü ti thawao-e nung ni hau ngela-iau ngü shikü noin. Ashiau thaiutha atsangshei nou nung noin.”

¹⁵Tilai apaüh nung ngiom, ngü goh ai loikü ashingio au tsüshiokü iula.

¹⁶Nungaih aünhong sau khaiunia khekkü noiküla, apa phaüh jü lei nai than. Ngü apa tü ngiom, “APAOU, nung atsangshei nou thatü outsükongkü iula-i naiuso ngü ngao- ngaotsün lao au tsüshio.

¹⁷APAOU khako ngü sua tsak khekkü tsakü noi. Ngü niko titi chite au shio-e? tiautenai iilo lüko ngü da tsünoishi.”

¹⁸Loühjam apaüh ngü tü helonai, ngü oukongkü iula.

¹⁹Apaüh ngiom, “Goa nou ni tsüojinji, nungtiphe ni tiühtso yangelatkü tsüdekünai hatatkü lanoi-i.” Tilai apaüh nung ngiom, ngü loüh tekkü oukong shikü iula naiuso ngiom, “APAOU, ni ti ngioau noin ngü hau achite. Ni ngü oukong-ishi-iu.”

²⁰Apaüh ngiom, “Ngü adongai tiauta shin ni ngejimo? Nung ngiotsüo Thsam nai satkü taiutsün ni hau tsangshei kiuau noiküla. Ngü lo Persiahai nokpaoko ehli au laokü khushiau noin. Nungphiko Grik hai nokpao shi-e. Israel ün aünhong Maikel tü simkü ngü halouau nungko tsaktso tsünoi.”