Read Khiamniungan Naga Daniel 11 Bible Online

Daniel 11 - Khiamniungan Naga bible

Daniel 11

¹Ngü kiplouau naiuso hachu au thaiutha apa thsale noin.

²Naiuso lo ngü ni hau chite au noitsün nung ngiotsüo noin. Hong nou ngiom, “Loüh nokpao süme nou Persia khaiuko nokshinge, naiuso nungthanko apem chiko atsüomeiting nokpao tsak nou shinge. Apa oukong naiuso memei atsokting nou apaüh Grik hai nokshing tü tai-e.

³“Naiuso lengpo nokpao tsak shi-e. Nokshing asong chiai apaüh mongchiotsünli nok-shinge.

⁴Lüko apa atsokting oukong nouko apa nokshing pai-ane, naiuso nung haoson püle hau thekü janthate. Apa thangko apa thsaosithsosoüh tsüdekü nokpao-e, lüko ngüso da to apa oukonglito tsünoi-e.

⁵“Ijip hai nokpao oukongkü noi-e. Apa süpai ahei ongko tsak nou intso oukongtso-e naiuso apaüh shingtsün nokshing songtsokü noi-e.

⁶Pon intso phiai Ijip hai nokpaoüh Siriahai nokpao ko athsane shane naiuso apa hau meshen thso menyiuthso tsamsigoh shanau kiu-e. Lüko nung athsane laiukü tsünoi-e, naiuso tsammongnyiu, tsammongpo, naiuso apa thso naiuso apa ko hakü khuha- tsün tsamki nouso apem loatkü wane.

⁷Tsütsangkü, nung menyiu tsammongso ongko tsak nokpao the-e. Apaüh Siriahai nokpao ün süpai kome, ngüso ehüke nai napkü, ngüso shiolou-e.

⁸Apaüh ngüso sotsom naiuso ngüso goa hau losiokü taiutsün chaiou lakkeng naiuso tangkason jengtsaiu nouso Ijip ai laokü kankü khuwane. Nokmei pon intso phiai

⁹Siriahai nokpaoüh Ijip kome, lüko apa tü laokü ya-anshi-e.

¹⁰“Siriahai nokpao thsosoüh ehli au süpaihoi asong tsak khemlou-e. Ngüso ongko tsaküh khiamthe shi- tsün tsak khekkü ehoi ehüke nouso tü thsüokü poh-e.

¹¹Amongmat nai Ijip hai nokpao Siriahai nokpao thako ehli tsalou-e naiuso Siriahai süpaihoi asongting nou shiolou-e.

¹²Apaüh ehoi süpai piakü loatkü ashioloutsün thaiutha bülome, lüko atao letletkülu noi-e.

¹³“Siriahai nokpao laokü khuküta apaüh aya nai taiutsün süpaihoi asong tsak kamsane. Atao shisaonai, apa süpai amonhoi asong tsak hakü laokü shi-e.

¹⁴Nungaih khaiunia piakü Ijip hai nokpao thako khengshikü tsalou-e. Naiuso Daniel, agoumchi khaiunia ajehoi ajantsoüh ngüsoüh eptsün atsangshei thaiutha ko khengshi-e, lüko ngüsoüh tsüshio-e.

¹⁵Nungtiphe Siriahai nokpaoüh mongkü petaiutsün noknio kome naiuso nungh thalouwane. Ijip hai süpaihoi nouso ehlitsün laowane; ngüso ongko ameiting nouso lüko oukong saiukü tsünoi-e.

¹⁶Siria haiüh ngüso tü ti akhengshi tsünoikü ngüsoüh mongchiotsünli chhi-e, akhengshi ti tsünoi-e. Apa Athalou- tsün goumchi nai tsa-e, naiuso nung apaüh thumkü shiolouwane.

¹⁷“Siriahai nokpaoüh apa süpaiso hoithum kankeikü Ijip hai nokpao thako tsalou-e. Nungh apa eh nokshing lotheau thaiutha apaüh apako angela-e tsak shankü apa hau meshen thso menyiuthso tsamsigoh yangau kiu-e; lüko apa ayangtaiu ashio tsüeppe.

¹⁸Nungphiai apaüh khiamnok shimkü noitsün mele nouso kome naiuso ngüso piakü shiolou-e. Lüko gohmao ahei tsaküh apa shioloukü thonane, atsüoting apaüh Siriahai nokpao mongmattsün apa dongai laokü shi-i-e.

¹⁹Nokpao nou apa goumchi ehüke nai laokü shishi-e, lüko apaüh tsüshio-e, naiuso nung apa thaiutha athon noi-e.

²⁰“Apa tü thankü nokpao songe, apaüh asong tsak apa nokshingko chaisiou lopia au liukim shiloukü khaiuniahoi nouso tü thangmangau honge. Atao letletkü nou mongko khakhakü naiuso ehli taoko tsüdekü nung nokpao loatkü wane.”

²¹Aünhong nou nung sasakiukü chiteji: “Nungthan Siriahai nokpao tsak apa nokpao theau ayam tsünoikü nou tsümeikün nokpao tsak noi-e, lüko apa ayang tsünoikünko kausaikü shiküta oukong nou lou-e.

²²Goa ün Akhengting meson nou lüko apa tü sauüh khengshi-e, apa to moisemkü lomowane.

²³Apaüh mele ehentso tsaklu nokshing shing lüko, athalou-e shantsün tsangkü apa oukong tekkü kongkü iulakü, apaüh amao mele nouso kausaiate.

²⁴Alekta apaüh memei khiamkhan tsak kome, naiuso apa paosiposo sauüh tsüchhikün chhi-e. Nungphiai apaüh ehli taoko thaloutsün jeng- tsaiu nouso apa phiai hoiluttsünso mongko janekiu-e. Apaüh mongkü pejeikü taiutsün noknio nouso komau thatsane, lüko apa atao shakta khemane.

²⁵“Ijip hai nokpao komau apaüh mongnyankü süpaihoi asong tsak kamsane, nungüh hoi asong naiuso akongting süpaihoi ko lapshikü li-au khemlou-e. Lüko Ijip hai nokpao sapthio-e, naiuso ashio tsüepe.

²⁶Apa ün ashimting ayamhantsünsoüh apa lotheane. Apa süpai apiating loatkü lomokü wane.

²⁷Küta nung nokpao nime ne thaisam puo tsak ko heshiu au moknoi-e, lüko ngüso ayang tsümeikü nou ngüso tsaküh tsak tü lotsao lochi-ekü noi-e. Ngüsoüh aiutsün ngüsoüh tsüepe, tiautenai nung epau nou atao mosao.

²⁸Goa ün khaiuniahoi nouso don lomokü wanau, Siriahai nokpao apa ehli taoko yanhetsün jengtsaiu nouso kankü tsamai laokü shi-e. Apaüh mongchiotsünli apaüh chhi-e küta apa meshen goumchi ai laokü khu-e.

²⁹“Atao intso noiküta apaüh loühjam Ijip komshi-e, lüko nung taokoto aya ataoli to tsüde-e.

³⁰Rom hai kheng nouso ko noikü shiküta apa tü khengshi-e naiuso apa hatat-e. “Küta apa thatü mongmat sungkü Goa ün khaiuniahoi don lomowanau laoloukü shi-e. Apaüh nung don le- ankü khuwantsünso ainou ayamhan ta hoilute.

³¹Apa süpai ajantsoüh Amkham Tsam nou lochinyane. Ajah chaithio kiutsün ngüsoüh lolaoküta nungliko Achinyan Alekkatau nou taiushi-e.

³²Akausai tsangkü nokpao nou ngüso don leankü khuwantsünso ainou apa tü jungau shiolou-e, lüko Goa tü hoiluttsünso to laokü shikü eh li-e.

³³Mongthat mongsai noitsün aheihoi nousoüh ngüso mongyang amaohai apia hau kiuha-e. Lüko ngüso ajantso ehli nai loate tsüdekünai in nai jekkate, naiuso ajantso kanlükhun küta akhothio- tsün nai wane.

³⁴Loatkü noitsün taoko, khaiunia piakü ahalou shitsünso ongko meshen thaiuthalu yangkü chhitsün noi-e, Goa khaiuniahoi nousoüh ahachu intso eppe.

³⁵Mongthat mongsai noitsün aheihoi ajantso loatane, lüko ngüso loattsün shioko khaiuniahoi nou losio-e. Nung Goa nou thattaiutsün athon mosaokün lektso tsülao-e.

³⁶“Siriahai nokpaoüh apaüh mongchiotsünli chhi-e. Akhengting Goa ko apa atsokting naiuso amao goa nouso chiai apa songtso ta apa bülome. Goa nou apa hau angja mokiukün atao chikü apaüh nung chhiau shio-e. Goa nou ti thattaim nung tongtü chhi-e.

³⁷Nokpao nou apa paosiposoüh yathsüotsün goa naiuso menyiuhoi nousoüh tsüojintsün goa tsüwesankü wane, tiautenai nungso ongko apa songtso ta apaüh yange.

³⁸Nunglikoto, ehüke kiploutsün goa tübao asuhat kiu-e. Apa paosiposoüh tilaitso tsüam- khamdekün goa hau apaüh chaiou lakkeng, tangkason chaiou nouso naiuso amao paopei ameiting nouso kiu-e.

³⁹Apa ün ehüke kipsanau, apaüh gohmao goa tsak tü amkhamtsün khaiuniahoi kankei-e. Sauhaiüh apa nokpao asong ta asuhat kiuji, apa, ngüso hau asongthon chhikamthang noikham kiukü, naiuso ngüso hau goh lüko paopeili kiu-e.

⁴⁰“Tilai Siriahai nokpao ün atao athon shimkü shin, Ijip hai nokpao apa tü poh-e, naiuso Siriahai nokpao apa oukong chikü nou, ehli tsamkei nouso, mokthso nouso, naiuso kheng nouso piakü hakü li-e.

⁴¹Apaüh shelei nouli shingkhannio piakü komhe-e. Küta Athaloutsün Goumchi nou lüko komkü khaiunia heng heng ta loate, lüko Edom, Moab, naiuso Ammon shingkhannio nouso to thakhu-e.

⁴²Tilai apaüh nung shingkhannio nouso kome, Ijip lüko tsüpoitaiu-e.

⁴³Apaüh Ijip hai chaiou jengtsaiu, chaiou lakkeng, tang- kason, loüh amao apiamai jengtsaiu nouso kankü khuwane. Apaüh Libia naiuso Sudanhai shiolouwane.

⁴⁴Küta ajepek naiuso ajenap ainou shitsün ngiongem nou apa hatate, naiuso khaiunia piakü loatkü apa thatü thsüokü eh li-e.

⁴⁵Apaüh Amkham tsam noitsün king naiuso khiamnok jetko lüko nokpao nejen- khio nouso songkü lahsane. Lüko apa hachuao sau tsünoikü apa eane.”