Read Khiamniungan Naga Daniel 12 Bible Online

Daniel 12 - Khiamniungan Naga bible

Daniel 12

¹Ashethop neshe thokü noitsün aünhong nou ngiom, “Nung taoko akhengting aünhong Maikel sauüh akhaiuniaso tü hüji, apa tsa-e. Nungaih mele nouso yaloukütün phiai tilaitso mothawaodekün atsaoting angja thawaotsün tao tsak noi-e. Tilai nungh atao shi-e, amele khaiunia chikü sauhai nian Goa Thsam nai satkü noin ngüso kipsane.

²Eankü noitsün piakü müjam ahshi-e: ngüso ajantso athon tsüyang aa nai, naiuso ajantso athontsü- yangkü achinyan amiam angja nai hau ahkü shi-e.

³Mongthat mongsai noitsün aheihoi nouso maou nai oukü jeetsünli noi-e. Naiuso sauhaiüh khaiunia piakü hau ayamtha nou chhiau tsande, ngüso to kianthsüo nouso outsünli athontsüyangkü jeekü noi-e.”

⁴Apaüh ngü tü ngiom, “Daniel, nung thsam nou lo lükiapan, naiuso nung goumchi athon mosaokün lektso hau akejei oukong thaolutkü lüwan. Nungai, khaiunia piakü nou ti thawaoji nung ngela au kowetsün nai ngüso oukong wane.”

⁵Nungaih ngü khaiunia nime haiukuk etsai tsak naiuso etsakai tsak ta tsakü noitsün ep.

⁶Ngüne ongko tsaküh haiungan nai tsanoitsün aünhong nou tü sangkü ngiom, “Nung athanga chhisiya nou thon au atao tilektso noi-e?”

⁷Aünhong nou apa pha nemtso koiai loksanküta Athon tsüyangkün Goa nianko athalou mongkü tsak shan. “Nung pon süme apaitso noi-e, ta apaüh ngiotsün ngü lula. Tilai Goa ün khaiuniahoi hau angja kiutsün lao-e, nungaih nungso chikü thawaokü shi-e.”

⁸Apaüh ngiotsün ngü lula, lüko nung ngü tsüngela. Nungtiphe ngü sangkü ngiom, “Lüko, APAOU, nung chikü nou titili thone?”

⁹Apaüh thalakü ngiom, “Daniel, ni lo khuao noin, tiautenai nung ngio nouso athon moshikün lektso nyankü tsangkü taiuau noin.

¹⁰Khaiunia piakü losiolou-e, tsümeikünsoüh tsüngela-e, lüko tsümeikülu chhikü noi-e, lüko sauhai mongthat mongsai noin ngüsoüh lu ngela-e.

¹¹“Ajekhaiu pungkü aloat chaithio kiutsün molaowankün lektso nungh, Alotheantsün Achinyanau lümeikün atao saokü nouko ajekhaiu 1, 290 nouso yankü khu-e.

¹²Ajekhaiu 1, 335 nouso moyankhemkün lektso sauhai mongkiukü taiu-e ngüso thaiumei!

¹³“Naiuso Daniel, ni athon saokü jeiloukü lünoi, küta ni eane, lüko ni atao athon nai apaopei epau ahkü shishi-e.”