Read Khiamniungan Naga Daniel 2 Bible Online

Daniel 2 - Khiamniungan Naga bible

Daniel 2

¹Nokpao Nebukadnezar pon nime thetsün taoko nai, apaüh mia tsak mian. Nung miamian nou apa asaila au tsüshiokü thatü shiosung- kiu,

²nungtiphe apaüh nung athat sasakü chite-iau apa khemko noitsün ashiau nou aküo chitetsünso, oukong hantsünso, phong detsünso, naiuso mea-onko chitetsünso jonau hong. Tilai ngüso shikü nokpao khako tsa,

³apaüh ngüso tü ngiom, “Ngü mia mian tsak mian, nung thaiutha ngü yangelatji. Ngü nung mia mian ti athat nung nge au aiuji.”

⁴Ngüsoüh nokpao tü Aramik ngio ai thalakü ngiom, “Anokpao athontsüyangkü lüthe! Sam hau amiamian achite, naiuso samüh nung ni hau sasakü chite-e.”

⁵Nokpao nou ngüso tü ngiom, “Nung miamian ti athat ta asamüh ngü hau chiteau lu noin ta ngü jü mongai yangsananiu. Asamüh nung chite au tsüshiokü naito, asam nelangkü tapne-e naiuso asam tsam beisikin kamsantaiutsünli wane.

⁶Lüko asamüh nung miamian naiuso alohat nemtso thaiutha alat ngü hau chite au shio naito, ngü paopei naiuso asuhat asong asam hau kiu-e. Nungtiphe nung miamian ti athat alat noin ngü hau achite.”

⁷Ngüsoüh loüh nokpao tü thalakü ngiom, “Asuhatkü noitsün Nokpao nou sam hau lo nung miamian chite naito, samüh nung sasakiu-e.”

⁸Nung taoko nokpao nou lekkü wekü ngiom, “Asam atao lesanau koweji ta ngü yangkü noiküla! Tiautenai nung miamian ngü hau tsüchitekü naito,

⁹asamüh asam chikü hau ngü angja wekü kiu-e ta jü mongyang asamüh epji. Tiautenai asamüh atao nouko alum alesantsün kankü shi-e, nungtiphe asamüh yaang ngio chite au asam ongko asam mong jeiaisankü noin. Ngü hau nung miamian ti noiküla achite, nungaito ngü lüko asamüh nung alat ti nung asamüh ngü hau chite au shio-e ta nge-e.”

¹⁰Nokpao hau alotsüo kiutsün- soüh thalakü ngiom, “Asuhatkü noitsün Nokpao, ni nge au aiutsün shiokü chite au nung goumchi ko khaiunia tsaktso tsünoika. Sau nok- paoüh asongting naiuso akongting titi noilünou apa khemko aküo chitetsünso, oukong hantsünso, phongdetsünso, naiuso mea-onko chitetsünso, tü nungti saotsün tilaitso tsünoiküla.

¹¹Ni Asuhatkü noitsün Nokpao nou saotsün nung thatü achek, nung goa nouso sauhai khaiuniahoi ongko tsünoiji nungso tü simkü sauühtso nung athaiutha chhikiu au tsüshio-e.”

¹²Nung shioko nokpao thatü mongmat naiuso Babilon nai nokpao hau alotsüo kiutsünso chikü loatkü wanau ngiokhem kiu.

¹³Nungtiphe ngüso chikü, nungko Daniel naiuso apa haiso lüko hakü loatkü wanau ngiokhem nou hongpeng.

¹⁴Nungaih nokpao ün ehü ahei Ariok, sauüh nung aloat au noitsün ngiokhem chhiau noiküla, apa dongai Daniel üh angio iu au noitsün ngio thatü paotsangkü singthalouküta,

¹⁵Ariok tü nokpao nou nungti ngiokhem ajüoting tiauta kiuji ta sang. Nungtiphe Arioküh Daniel hau ti thawaokü noiküla nung chiten.

¹⁶Daniel, nokpao dongai napküta apa hau nung miamian alat sasakiu au ngiokhem sao.

¹⁷Küta Daniel tsamai khukü apa haiso Hanania, Mishael, naiuso Azaria hau ti thawaokü noiküla nung chiten.

¹⁸Apaüh ngüso tü Babilon nai amao ayamhantsünsoko aikü ngüso tsüloat ha au nung ii alat sasakiu au aün Goa nou ngüso khako atsüojinyang ahan ta misao au ngiom.

¹⁹Nungsoh nai Danielhau atsangshei tsak tsangkü nung ii alat han, naiuso nungko apaüh aün Goa lomsankiukü ngiom:

²⁰“Mongthat mongsai naiuso oukong noitsün Goa! athontsüyang apa lülomsan.

²¹Ah-tao naiuso ataothat chiai apa oukong noin; apaüh nokpao nouso thioji naiuso wananji; mongthat mongsai naiuso angela kiutsün nung apa noin.

²²A-auoting naiuso atsangtaiu nai taiutsün apaüh tsangshei kiuji; anyakhem nai ti tsangpokkü noin nung apaüh ngeji, naiuso apa pem nung awon nou lemjeikü noin.

²³Jü paosiposo Goa, ngü ni lomsanji naiuso asuhat kiuji. Ni ngü hau mongthat mongsai naiuso oukong nou kium; ni jü misao thalan naiuso nokpao hau ti chite-e nung sam hau haniu.”

²⁴Nungtiphe nokpao nou apa lotsünso sauhai tü apaüh nung ngiokhem kankü khuao thoilut, nung khaiunia Ariok dongai Daniel khu. Apaüh Ariok tü ngiom, “Ngü loatkü lawan. Ngü nokpao dongai nialoukü akhu, naiuso ngü nokpao hau apa miamian alat nou chite-e.”

²⁵Liukü Arioküh Daniel nung Nokpao Nebukadnezar khako nialoukü shikü ngiom, “Thaloukü khuwantsün Yihudahai ongko Ni Asuhatkü noitsün Nokpao hau miamian alat chite au shiotsün ngü khaiunia tsak epsaniu.”

²⁶Nokpao nou(Belteshazar ta jontsün) Daniel tü ngiom, “Ngü ti mia, mian naiuso nung ti athat noin ta, ni ngü hau chiteau shio-e süne?”

²⁷Danielüh Nokpao tü thalakü ngiom, “Asuhatkü noitsün Nokpao, nungko mea-onko chitetsünso, oukong hantsünso, ashiau aküo chitetsünso, tsüdekünai kianthsüo alat ngiokiutsün sauüh nung ngio kiukü tsünoi.

²⁸Lüko athang ii atsangshei kiutsün aün nai Goa tsak noin. Apaüh ni Asuhatkü noitsün Nokpao hau ashi au taoko ti thawao-e nung nge-en. Ni saikü noitsün taoko atsangshei eptsün miamian ngü lo ni hau chite-e.

²⁹“Ni Asuhatkü noitsün Nokpao, saikü noitao, ni ashiau atao thaiutha miamian tsak mian; naiuso Goa sauüh athanga atsangshei kiuji, apaüh ni hau ti thawao au noin nung han-iu.

³⁰Athanga ngü hau atsang- shei kiutsün nung, amao haiko naito mongthat mongsai nai ngü meitso ta tsüde, lüko ni Asuhatkü noitsün Nokpao nou amiamian alat nge au naiuso adongai sungkü hantsün ayang nou ngelouau thaiutha noin.”

³¹“Asuhatkü noitsün Nokpao, ni atsangshei nouko sotsom asongting akhako tsanoikü ep, nung athapau laplapkü ajin okü naiuso ahatau lümeikü noiküla.

³²Nung khaiu chaiou lakkeng ameiting nou shankü, nung kong si phemtso nouso tangkason nou shankü, nung thai si shiolak nouso taoson nou shankü,

³³nung hok nouso son nou shankü, naiuso pha ayantso nou son nou naiuso ayantso nou puja nou shankü noiküla.

³⁴Ni nungtü thapkü noi taoko, lung asongting tsak apa chija monthiokan küta nung son sotsom naiuso puja hok nou tü pep, naiuso nung sotsom nou nelangkü thipek- kan.

³⁵Jamaolu nung son, puja, taoson, tangkason naiuso chaiou lakkeng nouso asaiu taoko tsonyak nyatsün athang nai pukhao khekkü nelangkü laowekü iulawan. Nung athang lüko tsütsangshei shikü nungso chikü ahsheih nou shipkü khuwan. Lüko nung sotsom thiopek- tsün lung nou king asong tsak hau iula, naiuso nungüh goumchi athum pokjei.”

³⁶“Miamian nou nung noiküla. Asuhatkü noitsün Nokpao, lo ngü nung miamian athat ni hau chite-e:

³⁷Asuhatkü noitsün Nokpao, nok- paohoi chikü khaiuko ni asongting noin. Aün Goa nou ni hau oukong, akong, naiuso asuhat kiukü ni nokpao shankiukü noin.

³⁸Apaüh ni, goumchi ko noitsün khaiunia chikü khako naiuso thainian, waio nouso chikü khako nokpao au shankiu. Nung chaiou lakkeng khaiu nou ni noin.

³⁹Ni tü thankü, ni tsütha- yaptsokü nokshing tsak sungshi-e, naiuso samjam nouko taoson nokshing tsaküh goumchi athum khako nok-shinge.

⁴⁰Naiuso nungh thanko alum nelangkü lopai au shiotsün sonli jüokü nokshing püle nou shi-e. Naiuso son nou alum thiopektsünli, nung nokshing püle nou aya nokshing nouso chikü lothean-e.

⁴¹Ni loüh nung sotsom hok naiuso hokkhatso nouso apaitso puja naiuso apaitso son epm. Athat nung, nokshing nou paian-e. Nung nokshing son oukongli noi-e, tiautenai nungko son nou pujah nouko laowekü noiküla.

⁴²Hokpho sübao apaitso son naiuso apaitso puja noiküla- nung athat nou nokshing apaitso oukong naiuso apaitso outsükongtsün athat noin.

⁴³Ni loüh son nou puja nouko laowekü ep. Nung athat nou: nung nokshing nouko nokpao nousoüh mele si mele tsamsigoh yangetsün tsangkü ngüso tsammong ajeiai noiau kowe-e, lüko son nouko puja laowetsün oukong khengai ngüsoüh chhiau tsüshio-e.

⁴⁴Nung nokpao nouso taoko aün Goa nou tilai athontsüyangkün nokshing tsak shane. Nungh nokshing to tilaitso tsüshiohe-e, lüko nokshing nouso chikü moisemkü lothean-e naiuso nung athontsüyangkü hau noi-e.

⁴⁵Ni lungkhaiu tsak sauüh tsüthantankü nou salikü nung son nou, taoson nou, tangkason nou, puja nou, naiuso chaiou lakkeng nou saitsün sotsom tü peptsün ep. Ni Asuhatkü noitsün Nokpao, ashiau taoko ti thawao-e nung Goa asongting nou ni tü chiteji. Ni mia miantsün tongtü ni hau chite-iu, naiuso nung thaiutha alat atsüoting nou ni hau kiuwan-iu.”

⁴⁶Nungaih Nokpao Nebukadnezar goh ai kauthio naiuso Daniel tü aloat chaithio naiuso chaithio nouso kiuau ngiokhem kiu.

⁴⁷Nokpao nou ngiom, “goa nouso chikü khaiuko a-Goa asongting, nokpaohoi khaiuko APAOU, naiuso akhei athanga nouso tsangsheikiuji. Ngü nung ngetsün tiautenai ni athanga nouso alat sasakiuau shio.”

⁴⁸Nungaih apaüh Daniel hau atsokting noikham kiu, apa hau alengmei paopei nouso piakü kiu, Babilonhai goumchi singtap tsak khaiuko oukong kiu, naiuso nokpao tü ayamhantsünso chikü khaiuko ahei au shankiu.

⁴⁹Danielüh Nokpao tü kojaküta, Shadrak, Mishak, naiuso Abednego so lüko Babilonhai shingtap nai nokshing khako ahei au shankiu; naiuso Daniel to nokpao mikhem tsam nai noi.