Read Khiamniungan Naga Daniel 3 Bible Online

Daniel 3 - Khiamniungan Naga bible

Daniel 3

¹Nokpao Nebukadnezarüh chaiou lakkeng nou shankü sotsom tsak atheng nai meter kheikü chinyat naiuso atham nai meter süme thatso saiküta Babilonhai shingtap Pura Tsamei nai taiu.

²Nungaih nokpao nou nokshing nouso, nokshingpaou nouso, ashe nouso, mikhem kiutsünso, chaitaiu nouso, ngio janekiutsünso, ngiokhem nai a-nge nouso, naiuso nungh shingtap ko noitsün amao asonghoi nouso, apem kamshiau ngiokhem kiukü jon. Ngüso nung Nokpao Nebukadnezarüh saisantsün sotsom losiotsün kam nai ha au noiküla.

³Tilai asonghoi nouso chikü nung sotsom losio au thaiutha sotsom saitaiutsün khako kamshin,

⁴sangh asong tsaküh ngiongem tsak welutkü ngiom, “Mele nouso khaiunia chikü, me-ing chikü, naiuso ngioyak chi- küüh anglu!

⁵Ti taoko jangongmat ngem, poipoi, kokiang, naiuso amao kokiang khongtsün, naiuso amao dun kankeikü jih hangtsün, hoilute nungh asamüh lula-e. Nungaih nung jihang tsaloutsünko aikü asamüh Nebukadnezarüh chaiou lakkeng sotsom shantaiutsün khako kaukü amkhame.

⁶Khaiunia ajantsoüh nung khako kaukü tsüamkhamkü nai, nungailu nung khaiunia nou innyai nai yakthio-e.”

⁷Nungtiphe ngüsoüh jih sangngem lulako yahoikü, mele chikü ainou khaiunia me-ing, naiuso ngio chiküüh Nokpao Nebukadnezarüh shantaiutsün chaiou lakkeng sotsom khako kaukü amkham.

⁸Nung taoko Babilonhai ajantsoüh Yihudahai phio-iau aküo nou tü yam.

⁹Ngüsoüh Nokpao Nebukadnezar tü ngiom, “Ni Asuhatkü noitsün Nokpao, athon- tsüyangkü lünoi.

¹⁰Ni Asuhatkü noitsün Nokpaoüh jih hang tsaloukü thunkü, khaiunia pungkü nou chaiou lakkeng sotsom khako kaukü amkhamau ngiokhem kiukü noin;

¹¹naiuso nung sotsom nou tü sauüh tsüamkhame nungto in nyai nai yakthio-e ta ngiokhem kiukü noiküla;

¹²nungko Babilonhai shingtap ajantso khako Yihudahai ni sauhai ahei au taiukiu ngüso: Shadrak, Mishak, naiuso Abednego soüh ni Asuhatkü noitsün Nokpao Ngiokhem tsü-angkü noin. Ngüsoüh a-goa tü tsüamkham tsüdekünai ni shantaiutsün sotsom khako tsükauthioji.”

¹³Nung ngio nou Nokpao thsüokü mongmat küta nung khaiunia süme nouso apa khako kankü shiau ngiokhem kiu.

¹⁴Apaüh ngüso tü ngiom, “Shadrak, Mishak, naiuso Abednego, asamüh jü goa naiuso ngü shantaiutsün chaiou lakkeng sotsom nou khako kaukü amkhamau nanji süne?

¹⁵Lo asamüh jangongmat ngem, poipoi, kokiang, naiuso kokiang in amomo naiuso jihang in amomo nouso hangtsün sangh nou tilai lula-e, ngü shantaiutsün sotsom nou tü amkhame. Asamüh tsüamkhamkü naito, asam shakta in nyai nai yakthiowane. Asam kipsan kiuau shiokü amao goa noin ta asamüh yangji süne?”

¹⁶Shadrak, Mishak, naiuso Abednego soüh thalakü ngiom, “Asuhatkü noitsün Nokpao, samüh sam pem solouau tsükowe-e.

¹⁷Samüh yathsüotsün Goa, sauüh in nyai oukong ainou naiuso a-oukong ainou sam kipsanau shio, naito apaüh shio-e.

¹⁸Nungti lüko apaüh tsüshiokü naito, Ni Asuhatkü noitsün Nokpao, samüh a-goa tü tsüamkhame ta ni lüyang, naiuso ni shantaiutsün chaiou lakkeng sotsom nou ta samüh tsükauthio-e.”

¹⁹Nungaih Nokpao Nebukadnezar nung Shadrak, Mishak, naiuso Abednego sotü amongmat nou apa kha sengkü iulawan. Nungtiphe apaüh meshen khaiuniaso tü innyai oukong chinyat nou phopkü jah au ngiokhem kiu.

²⁰Nungaih apaüh apa süpai oukongting tü nung khaiunia süme nouso in nyaikü noitsün nai lüyakthio ta ngiokhem kiu.

²¹Nungtiphe ngüsoüh nung khaiunia süme nouso phakhut alaiu, kandio, neshe nouso meikü jenkü thokiu küta ngüso thaloukü in nyai nai yakthiowan.

²²Lo nung nokpao nou in nou thatü thsüokü jah-au ngiokhem kiuphe, nung khaiunia süme kankü shitsün ehü nouso in nou chethe-an.

²³Nungaih Shadrak, Mishak, naiuso Abednego so loüh keshikü in nyaikü noitsün awemteng nai yakthio.

²⁴Nungko alekta Nebukadnezar apa phaüh singkao nai thangkü tsakü lekkat. Nungaih apaüh asonghoi nouso tü sangkü ngiom, “Samüh khaiunia süme kekü in nyai nai tsüyakthioso?” Ngüsoüh, “Ah, samüh nungti chhikü noiküla, ta Asuhatkü noitsün Nokpao, tü thala.”

²⁵Nungaih apaüh sangshin, “Nungaito tiau ngü khaiunia püle in nyai ongai tsakeikü epji?” “Ngüso tsükeshi, naiuso ngüso tü ti tawaikü tsüep- naiuso nung ongko püle nouto aünhong tsak khekkü noin.”

²⁶Nungtiphe Nebukadnezar in nyaikü noitsün koukhan nai sung- küta, “Shadrak! Mishak! Abednego! so tü jonkü ngiom, Akhengting Goa yathsüotsünso! Ashi-an!” Naiuso ngüso nungailu in nyai mong ainou shikhuwan.

²⁷Naiuso nokpao khemko asonghoi, nokshingpao nouso, süpai asonghoi naiuso amao chikü in nou tsütawaikün nung khaiunia süme nouso tü thapluau kamshin. Nungko ngüso khaiuo pem tsak lüko, neshe lüko, tsüchethe, naiuso ngüso tü in eknyam lüko titso tsünyamküla.

²⁸Nokpao nou ngiom, “Shadrak, Mishak, naiuso Abednego so Goa lülomsan! Apaüh meshen hongthon hongkü apa da monglamkü yathsüo- tsün nung khaiunia nouso kipsaniu. Ngüsoüh ngüso Goa tü simkü amao goa amkhamau naiuso nung khako kauthio au ngüso aa thaiutha thsale loukü jü ngiokhem tsü-angkü noiküla.

²⁹“Naiuso lo, ngü mele, kau, tsüdekünai ngio ajantsoüh Shadrak, Mishak, naiuso Abednego so Goa hau asuhat tsükiukü naito, apa to nelangkü chipne-e, naiuso apa tsam beisikin kamshi taiutsünli chinyankü wane ta ngü ngiokhem kiuji. Nung khekkü akipsantsün amao Goa titso tsünoi.”

³⁰Naiuso Nokpao nou Babilonhai shingtap ko Shadrak, Mishak, naiuso Abednego so noikham losongkiu.