Read Khiamniungan Naga Daniel 4 Bible Online

Daniel 4 - Khiamniungan Naga bible

Daniel 4

¹Nokpao Nebukadnezarüh goum- chi mele, kau, naiuso ngio, in amomo chikü dongai ngiongem hongpengkü ngiom, Salam!

²Akhengting Goa nou ngü hau kankü shitsün angawantsün naiuso ii nouso jü ngiolat nouso tü anglu.

³“Angawantsün titi asong noin nung Goa nou sam hau hanji! Apaüh athanga ii chhitsün titi oukong noin! Goa athontsüyang nokpao noin; apaüh athontsüyangkü nokshing shinge.”

⁴“Ngü jü nokpao noikham nai amongling naiuso atsüomei asong- ting nai noiküla.

⁵Lüko ngü saikü noitao ahat au naiuso alekkat atsangshei miamian tsak ep.

⁶Ngü Babilon nai nokpao hau ayam- hantsünso chikü tü miamian ti alat nung ngü hau chite au ngiokhem kiukü ngiom.

⁷Nungaih aküo ngiokiutsünso, alonga hantsünso, mea-onko chitetsünso, naiuso aje alei noinoitü lattsünso chikü jonkam, küta ngü ngüso hau jü miamian chiten, lüko ngüsoüh nung alat ngü hau sasakiu au tsüshio.

⁸Nungaih Daniel jü dongai shin (apa tü goa Belteshazar nian jonkü noiküla). Asio Goa Onthso apa da noiküla, nungtiphe ngü ti mia miankü noiküla, nung apa hau chiten. Ngü apa tü ngiom:

⁹Aküo ngiokiutsün atengting Belteshazar, asio Goa nouso onthso ni da noin ngüso ii athanga nouso ni ngelaji ta ngü ngeji. Jü mia mian nungti noin, nung alat ti noin ngü hau achite.

¹⁰“Ngü saikü noi taoko pai asongting tsak goumchi awem nai noikü ngü atsangshei tsak ep.

¹¹Nungh pai maou nou mosung- yapkün lektso asongtülu songsongkü naiuso nung goumchi khaiunia pungkü nou epau shiokü noiküla.

¹²Nung paisha nouso aleng thatü meikü, naiuso nung goumchi athum nou he-au saiukü pai eiu nou ketkü saokü noiküla. Liu thainian nousoüh nungsoh khem nai aalou, waio nousoüh nungh paikia nouso nai ap nou ap, naiuso thainian in pungkü nou nung pai-eiu nou he.

¹³“Ngü nung atsangshei nou tü yanghekü noi taoko, jiokü naiuso sangpunkü noitsün aünhong tsak aün ainou saotsün ngü ep.

¹⁴‘Nung pai nou lüsahongan naiuso nung akia nouso lüsapne; paisha nou apem lüsetan naiuso nung pai-eiu nou lüsukpengan naiuso nung khemko noitsün thainian nouso si paikia nai noitsün waio nouso lükoman ta apaüh sangh asong nou wekü ngiom.

¹⁵Lüko nung paidong nouto son naiuso taoson ke tsak nou lemjeikü lütaiuwan. Nung khengliu nouko hakü kengpun nai lüle-an. “‘Lo nung khaiunia nou tü khiamle nou lüsaolut-i, naiuso apa thainianhoi naiuso paisam aosam nousoko lükih-ani.

¹⁶Pon chinyat apa da khaiunia mongyang tsünoi-e.

¹⁷Nung jiokü naiuso sangpunkü noitsün aünhong tsak nou thatlou- tsün mongyang noin. Nungtiphe Akhengting Goa da goumchi khaiunia nokshing khaiuko oukong noin naiuso apaüh khaiunia chosantsün ongko ehenting hau lüko sauhau lünou apaüh kiuau shioji ta khaiuniahoi nousoüh alumai lüngela.’

¹⁸“Nung mia mian ngü meankü noiküla,” ta Nokpao Nebukad- nezarüh ngiom, “Belteshazar, nung ti athat ngü hau lo achite. Ngü hau ayamhantsünso tsakühtso nung chite au tsüshio, lüko ni shio-e, tiautenai asio Goa nouso onthso ni da noin.”

¹⁹Nung lulanai, Daniel sau tü Belteshazar ta lüko jonkü noiküla, apa ti angioau tsüshiokü ngawankü noiküla. Nokpao nou apa tü ngiom, “Belteshazar, nung mia mian ngiongem nou ni lalekkat.” Belteshazarüh thalakü ngiom, “Asuhatkü noitsün Nokpao, ngü nung mia mian sasakiutsün ni tü tsüdekü a-ehoiso tü latha-iau aiuji.

²⁰Nung pai aün sungyapkü alaiuteng, goumchi khaiunia apemüh epau shioji.

²¹Nung paisha nouso aleng amei, naiuso nung goumchi athum tsadau saiukü pai-eiu nou noin. Liu thainian nousoüh nung khemko aaloji, naiuso waio nousoüh nung paikia nouso nai ngüso ap apji.

²²“Asuhatkü noitsün Nokpao, nung alaiuting naiuso akongting pai nou ni noin. Ni maou sungyapau lümeikü thatü sunganiu, naiuso a-oukong goumchi athum chiai noin.

²³Asuhatkü noitsün Nokpao, nou nung thapkü noi taoko, hong tsak aün ainou saokü ngiom, ‘Nung pai sahong küta lülothean, lüko son naiuso taoson nousoüh keshikü lütaiu, naiuso nungh khengliu nouko kengpun nai lüwanan. Nung khaiunia da khiamle nou lüsaolut-i, naiuso apa pon chinyat thaiutha thainian nousoko lükih-i.’”

²⁴“Nung athat nou nungti noin: Asuhatkü noitsün Nokpao, naiuso nung ni tü thawao au noin ta Akhengting Goa nou ngiowaniu.

²⁵Ni khaiuniahoi ong ainou komane naiuso liu thainian nouso ko kiha-e. Jangtsopong tsakli pon chinyat ni khengliu nou tsamhe-e, naiuso kengpun nai sai-e, nungko ni da khiamle nou saolute. Nungko ni Akhengting Goa nou khaiuniale nokshing nouso khako oukong noin ta naiuso apaüh mongchiotsün sauhau lünou apaüh nokshing kiu au shioji ta ni ngesane.

²⁶Hong nou paidong goh ai lean au ngiokhem kiu. Nung athat Goa nou goumchi apem chiai nokshingji ta ni mitha tilai kiu-e nungaih ni nokpao müjam theshi-e ta noiküla.

²⁷Nungtiphe Asuhatkü noitsün Nokpao, ni jü ayamhantsün tü ahoilut. Angei lachhishi, ayamtha nou lüchhi, naiuso tsosilu hai tü atsüojinyang lünoi. Nungaih ni loüh atsüomei iulashi-e.”

²⁸Nung chikü Nokpao Nebukadnezar tü thawaokü noiküla.

²⁹Alei chekü nime phiai, apa Babilon nai nokpao tsamkhaiu ai tsakeikü noi taoko,

³⁰apaüh ngiom, “Athaplu, Babilon nung titi asong noin! Ngü nung noknio jü oukong, naiuso akong, jü ajinka, naiuso asuhat hanau shankü noin.”

³¹Nung ngio apa sontham ai moshikhukün khako, aün ainou sangh tsaküh chitekü ngiom, “Nok- pao Nebukadnezar, ngo ti ngioji nung tü anglu! Anokshing oukong ni ainou lo kankü khuwanji.

³²Ni khaiunia hoikam ainou komane, naiuso liu thainian nousoko jangtsopong tsak khekkü khengliu tsamhekü pon chinyat kih-e. Nungaih Akhengting Goa da khaiunia nokshing khaiuko oukong noin naiuso nung apaüh chosantsün sauhai lünou apaüh kiuji ta ni mitha kiu-e.”

³³Nung ngio nouso shakta thawaokü shin. Nebukadnezar nung khaiunia hoikam ainou koman naiuso jangtsopong tsak khekkü khengliu tsamhekü noiküla. Apa pem da khiamle nou saolut, naiuso apa khaiuo letche koi nousoli laiukü naiuso apa sasan nouso waio sasanli laiukü samsan.

³⁴Tilai pon chinyat nou yankü khu, nokpao nou ngiom, “Ngü aün ai thapsankü lunai, jü mongyang jü dongai laokü shishin. Nungko ngü Akhengting Goa lomsan naiuso athontsüyangkü kihtsün tsak nou hau ngü asuhat naiuso ajinka kiu. “Apaüh athon tsüyangkü nok-shinge, naiuso apa nokshing athon tsüyangkü noi-e.

³⁵Apa khako goumchi khaiunia titso awesan tsünoi; aün nai honghoi naiuso goumchi nai khaiunia nouso apa oukong khemai noin. Apaüh mongchiotsün tü sauüh nanao tsüshio, tsüdekünai apaüh ti chhiji nungtü sauüh ti sangau tsüshio.

³⁶“Tilai jü mongyang laokü shishin, jü asuhat, jü asuhatkü noitsün nokpao, naiuso jü nokshing ajinka ngü hau laokü kiushin. Jü khemko asonghoi naiuso jü nokshing nai hachutsünsoüh ngü monglingkü nialou, naiuso jü nokpao oukong ngü hau laokü kiushin, nungto nung khako nou tü asuhat songtsokü noiküla.

³⁷“Naiuso lo, ngü Nebukadnezarüh Aün Nokpao hau Alomsan, asuhat, naiuso ajinka nou kiuji. Apaüh chhitsün alum thakü naiuso ngiotsüo noin, naiuso bülomkü chhitsün saulünou apaüh lonyap kiuji.”