Read Khiamniungan Naga Daniel 5 Bible Online

Daniel 5 - Khiamniungan Naga bible

Daniel 5

¹Sotsü Nokpao Belshazarüh sümai asong tsak shankü asonghoi heng tsak jonthio, naiuso ngüsoüh nungko theng aikü shiu.

²Ngüsoüh theng shiukü noi nai, Belshazarüh apa po Nebukad- nezarüh Yirusalem Amkham Tsam ainou kankü shikü taiutsün chaiou lakkeng naiuso tangkason thengkam nouso naiuso chio nouso kankü shiau ngiokhem kiu. Nokpao nou apa, naiuso apa khemko noitsün asonghoi, apa tsammongnyiuso, naiuso tsam- mongnyiu aphop nouso hakü nungsoko theng shiu au ngiom.

³Nung chaiou lakkeng thengkam naiuso chiutso nouso liukü kankü shin, naiuso ngüso chiküüh nungko theng shiu,

⁴naiuso chaiou lakkeng, tangkason, taoson, son, pai naiuso lung nou shantsün goa nouso lomsan.

⁵Alekta khaiunia pha tsak sungkü nokpao tsam dioai noutü tson okü thsaluttsün nai sat au tsalou, naiuso nung sattsün nokpao nou epkü noiküla.

⁶Nungai apa sangjenkü iula, naiuso thatü hatatkü singkao ngaongao au yachu.

⁷Apaüh sang asong nou wekü alongatsün, mea-onko chitetsün, naiuso aje alei noinoi tü lattsünso ajantso niakü shiau ngiom. Tilai ngüso nokpao tsamai nap, nungai nokpao nou ngüso tü ngiom, “Ajantsoüh nung asat nou weau shiokü naiuso nung alat ngü hau chiteau mon naito, apa hau nokpao phakhut thokiu-e, apa sang ai asuhat kiutsün chaiou lakkeng sangkom nou lakthio-e, naiuso apa khemko nokpao noithang süme nouko taiu-e.”

⁸Nokpao hau ayamhantsünso kha ai shin, lüko ngüso sauühtso nung asattaiutsün wesankü nung ti alat ta nokpao hau chite au tsüshio.

⁹Nokpao Belshazar loüh ayangelat nou tekkü sangjenkü iula, naiuso asonghoi tü nung thaiutha titi the-e, sau tü mongyang tsüshi.

¹⁰Nokpao naiuso apa khemko asonghoi ngemtsün sang lulakü apa nyai nung sümai kamtaiutsün athang nai napkü ngiom, “Asuhatkü noitsün Nokpao, asai aa lünoi! Tsüojinyangkü thatü to layangelat naiuso sangjenkü la-iula.

¹¹Nung anokshingko khaiunia tsak da asio Goa nouso onthso hakü noin. Tilai apo nokpao noiküla, nung khaiunia nou ayang amei, angetsün, naiuso Goa mongthat mongsai khekkü mongthat mongsai hantsün noin. Naiuso apo Nebukadnezarüh apa aküo ngetsün, alonga hoi, mea-onko chitetsünso, naiuso aje alei noinoi alat ngetsünso khaiuko asong the-ikü shin.

¹²Apa da mothikü paopei mongthat mongsai, mia mian lothatau ange amon, apülai lotha- kiutsün, naiuso athanga ii nouso sasakiutsün paopei sonkü noin; nungtiphe nung khaiunia Daniel ta lüjon. Nokpao Nebukadnezarüh sau tü Belteshazar ta niankiu, naiuso apaüh ni hau nung ti athat apem chite-e.”

¹³Nungaih Daniel, Nokpao nou dongai niakü nap, naiuso nokpao nou apa tü ngiom, “Jüpoüh Yihuda ainou sua niakü shitsün Yihuda hai tsak nou Daniel nung niso?

¹⁴Asio Goa nouso onthso ni da noin naiuso ange nai monkü mongthat mongsai noitsün tsak ta ngü lulakü noin.

¹⁵Ayamhantsünso, naiuso alonga chhitsünso nung thsamsat alat ti in ta wesankü ngü hau chite au niakü shin; lüko nung alat ngüsoüh nge- sanau tsüshio.

¹⁶Nung atsangtaiu alat nouso naiuso athanga nouso ni sasakiuau shioji ta ngü lulan. Ni nung thsamsat wesankü nung alat ngü hau chite au shio naito, ni hau nokpao phakhut amatchai nou thokiu-e, asuhat chaiou lakkeng sangkom nou asangai lakthio-e, naiuso nokshing nai nokpao noithang süme nouko oukong eptsün ko noi-e.”

¹⁷Danielüh thalakü ngiom, “Paopei nouso nihau lüthe-an, tsüdekünai amao tsak hau lükiuwan. Asuhatkü noitsün Nokpao hau nungti satkü noin naiuso nungti alat noin ta ngü wekü ni hau hane.

¹⁸“Akhengting Goa nou apo Nebukadnezar asuhat, awesan asong kiukü nokpao asong shankiu.

¹⁹Apa thatü song nou shingkhannio, mele, naiuso ngio amomo nouso, ngaongaokü hatkü noiküla. Apa loatkü wanau naiuso tsülouatkü aa taiuau aiunai nung apa mongthat noiküla. Saulünou apaüh mongchio nai lomsankiu naiuso lomiamkiukü noiküla.

²⁰Lüko apa bülomkü, mongkongkü, naiuso mongthe iula nou shioko, apa nokpao noikham ainou wanan, naiuso apa asuhat noikham mowan.

²¹Apa khaiuniahoi ainou koman, naiuso apa mong thainian mongsai khekkü iula. Apa liu ai noitsün gado hoi, ongai kihkü, jangtsopong khekkü khengliu nou tsamhe; naiuso khiamle ainou solouau ti tsünoikün kengpun nai apa sai. Athon nai apaüh Akhengting Goa nou khaiuniathso nokshing chikü ta paotsangji naiuso saulünou apaüh chosantsün hau apaüh kiuji ta ngesankü shin.

²²“Lüko ni, apa thsoüh nung chikü ngekü noilüko, achija nyapkü tsüshi.

²³Ni aün APAOU thako khengshikü Amkham Tsam ainou thengkam naiuso chiu nouso kankü shi. Ni akhemko noitsün asonghoi, atsam- mongnyiuso, naiuso aphop tsam- mongnyiu nousoüh goa nouso epau tsüshiokün, alula au tsüshiokün, naiuso titso tsüngekün chaiou lakkeng, tangkason, taoson, son, pai naiuso lung nou saikü shantsün lomsankü theng nou shium. Loüh ni aa-iau tsüdekünai e-iau janthat kiutsün naiuso ni chhitsün alum khako oukong noitsün Goa asu tsühat.

²⁴Nung shioko nung thsamsat au Goa nou pha hong.

²⁵“Nung asat nou nungti satkü noiküla: ‘MENE, MENE TEKEL, naiuso PARSIN (Haowe, Haowe, Tsoithat, janthat-iu)’

²⁶Nung alat nungti noiküla: MENE (Haowe) Goa nou anokshing ajekhaiu wesaniu naiuso nung lothonaniu;

²⁷TEKEL (Tsoithat) ni tsoithat nai thatlu-iu, lüko tsoi nou tsüngoi;

²⁸PERES (Ajanthat)- Anokshing janthataniu, küta nungh Medes hai naiuso Persiahai hau kiuwaniu.”

²⁹Shakta Beshazarüh apa tsamkihoi tü nokpao ün ashethop phakhut nou Daniel hau akhutkiu naiuso apa sang lemkü asuhat chaiou lakkeng sangkom nou angiolutkiu ta ngiokhem kiu. Naiuso apaüh Daniel, apa nokshing ko oukong ling nai süme nouko noi-i.

³⁰Nungsoh nouko lu Babilonhai nokpao Belshazar loatkü wan;

³¹küta achetpon aoluok kü nime noitsün Mediahai nou Dariusüh apa nokpao oukong lou.