Read Khiamniungan Naga Daniel 6 Bible Online

Daniel 6 - Khiamniungan Naga bible

Daniel 6

¹Dariusüh apa nokshing khemko nokshingau nokshingpaou hoi haowe tsom tsak khei thioau thatlou.

²Nung chiai apaüh nokpao ün chhisiya tü thaisanau Daniel naiuso amao nokshingpaou nime chosan.

³Atao laiukü tsünoikü athaisanhoi tsüdekünai nokshingpaou hoi nousoko Daniel meitso epsan. Amao haiko nai mothikü awesan tsakphe, nokpao nou apa nokshing athum khaiuko thsale taiukiu.

⁴Nungaih athaisanhoi naiuso nokshingpaou amao nousoüh Daniel nokshing chhisiya yamko tso aphiu thasanau kowe, lüko ngüsoüh thasanau tsüshio, tiautenai Daniel nung monglamau suntsün tsakphe, apaüh ngiotsüo tsüdekün yaang titso tsüchhi.

⁵Nungaih ngüso tsak si tsak chitekü ngiom, “Samüh Daniel tü mi kolutau apa don yamai tsüdekünaito amao to samüh titso chhiau tsüshio-e.”

⁶Nungtiphe ngüso Nokpao nouko epeau khu naiuso ngiom, “Nokpao Darius, Ni ün ajinka athontsüyangkü lünoi!

⁷Sam anokshing paotsang- tsünso athaisanhoi, nokshingpaou hoi, nokshinghoi nouso, naiuso amao asonghoi nousoüh ni ngiokhem jüokü tsak akiupeng ta sam apemüh mongchioji. Nungtiphe Nokpao ainou ngiokhem eptsün tü simkü, goa tsüdekünai khaiunia ainou lüko ajekhaiu samnyi thaiutha samüh saotsün tsüepau ngiokhem nouso jüokü akiu. Sauhaiüh nung ngiokhem lothe-e ngüso to chongkhao nou miankü noitsün khan nai yakthioau lu noin.

⁸Nungtiphe Nokpao nou nung ngiokhem lükiu, naiuso nungko niansat lüthanglut, naiuso nung ali-eshiau tsüshiokün Mediahai naiuso Persiahai ngiokhem tsak oukong nai noi-e.”

⁹Nungtiphe Nokpao Dariusüh ngiokhem nou tü nian satlut.

¹⁰Tilai Danielüh nung ngiokhem nai nokpao nou nian satthiowaniu ta lula, apa tsamai laokü khuwan. Apa tsam asungthun tsampai nai Yirusalem dongai kou- khantso nouso pokü noiküla-nungko apaüh asaita chhikü shitsünli, koukhantso sopankü taiutsün dongko apa kaukü napkü Goa tü ajekhaiu tsak ko samjam misao saokü noiküla.

¹¹Tilai Daniel ehsoüh apa Goa tü misaotsün epsan,

¹²ngüso chikü kamlouküta Daniel tü mi kolut au nokpao dongai khu. Ngüsoüh ngiom, “Asuhatkü noitsün Nokpao, ajekhaiu samnyi nou mongko ni tü simkü goa tsüdekünai khaiunia sau ainou lünou koja au tsüshio-e, nung chhi naito chongkhao nousoüh miankü noitsün khan nai yakthio-e ta ni ngiokhem tsak kiu-iu.” Nokpao nou thalakü ngiom, “Ah, nung Mediahai naiuso Persiahai ün aphokleshiau tsüshiokün ajüo ngiokhem tsak noin.”

¹³Nungaih ngüsoüh nokpao nou tü ngiom, “Yihuda ainou kankü shitsün sua nouso ongko tsak nou Daniel, apaüh Nokpao angio tsü-ang. Apaüh nyitsoko atao samjam misao asaita louji.”

¹⁴Tilai nokpao nou nung ngio lula, apa yangelat naiuso Daniel kipsanau yam ajantso apaüh shiotsün lektso yam. Apaüh nung thaiutha aje monapankün lektso tsülaokü kowekü yam.

¹⁵Nungaih khaiuniahoi nouso nokpao dongai laokü shiküta apa tü ngiom, “Mediahai si Persiahai saisile nai nokpao nou ngiokhem kiuwantsün li-eshi au tsüshio ta Nokpao nou ngeji.”

¹⁶Nungtiphe Nokpao nou Daniel kelouau ngio kiuküta apa chongkhao nou miankü noitsün khan nai yakthiowan. Apaüh Daniel tü ngiom, “Ni thatü mongkiukü yathsüokü shitsün a-Goaüh ni lükipsan.”

¹⁷Nungtiphe sauüh, Daniel kipsanau tsüshiokü hau nung khan chinai lung tsak monlut küta nungtü nokpao niansat naiuso apa khemko asonghoi nouso niansat thaolutkü wan.

¹⁸Küta nokpao nou tsamai laokü shi naiuso nungsoh to niongao tsüchi, thai lüko tsüsam tsüdekünai apa dongai titso kankü tsüshi-ikü yanlükhun-i.

¹⁹Ah-shiochan nokpao chuküta chongkhao khotaiutsün khan dongai liukü khu.

²⁰Tilai apa nungai sao-iu; apaüh mong lothekü wekü jonkü ngiom, “Aa Goa yathsüotsün Daniel! Ni thumkü yathsüotsün Goa nou chongkhao nouso ainou kipsanau shiomo?”

²¹Danielüh thalakü ngiom, “Asuhatkü noitsün Nokpao, athon tsüyangkü lünoi!

²²Ngü tü tsüjeiau thaiutha chongkhao nouso son kiapau Goa nou apa aünhong hong.Tiautenai ngü tü aphio tsülep ta apaüh nge nou shioko naiuso ni tü lüko aphio tsüchhitsün thako apaüh nung chhin, Nokpao.”

²³Nungaih Nokpao thatü monglingkü nung khan ainou Daniel niasanau apaüh ngiokhem kiu. Nungtiphe ngüsoüh apa tensan naiuso apa tü mou intso lüko tsüepsan, tititenai apaüh Goa da monglam.

²⁴Nungtiphe nokpao nou Daniel tü mi lolutkiutsün khaiunia nouso chikü kelouau ngiokhem kiu, naiuso ngüsoko tsammongnyiu nouso thso nouso hakü chongkhao taiutsün khan nai yakthiowan. Ngüsoüh khanthan lüko mosaosaokün tao chongkhao nouso hamlutkü ngüso uo nouso saokü apem jeipekkü he-an.

²⁵Küta Nokpao Dariusüh goumchi mele, shingkhan naiuso ngio in pungkü dongai thsamsat sat: Apem dongai “Salam!

²⁶Jü nokshing apemai Danielüh mong- lamtsün Goa hau asuhat kiu au, naiuso hat au ngü ngiokhem kiuji. “Tiautenai apa aa Goa noin, naiuso apaüh athontsüyangkü nok-shinge. Apa nokshing tilaitso tsümo-e, naiuso apa oukong tilaitso athontsüyange.

²⁷Apaüh kipsanji naiuso juosanji, Apaüh aün nai naiuso goumchi nai athanga nouso naiuso ii nouso chhiji. Apaüh chongkhao nousoüh jeiatkü wanau noitsün ainou Daniel kipsan.”

²⁸Nungti Nokpao Darius, naiuso Persiahai nokpao Sairus nokshing taoko Daniel aaloukü noiküla.