Read Khiamniungan Naga Daniel 7 Bible Online

Daniel 7 - Khiamniungan Naga bible

Daniel 7

¹Babilonhai nokpao Belshazar ayating pon nouko ngü sotsü meamean tsak mean, naiuso atsangshei tsak epkü noiküla. Nungsoh nai ngü eptsün meamean,

²ngü nungti satkü taiu: Nung meamean nouko aniokun chikü ainou ahsheih nou khiamnok chiai sheihkü noiküla.

³Nungai thainian asongting püle, tsaktso tsükhek ekü khiamnok ainou sungh.

⁴Chongting thainian nou athap au chongkhao tsakli, lüko letcheli ekok pokü noiküla. Ngü thapkü noitsün taoko akoi nouso sali-an. Nung thainian loksan naiuso khaiunia tsak khekkü tsa-i. Naiuso nung hau khaiunia mongyang nou kiukü noiküla.

⁵Müjam nou thainian athapau shap tsakli ahok nimeüh tsakü noiküla. Apa huo phat nai uo süme jetkü noiküla, naiuso nungtü sangh tsaküh ngiom, “Ni nyi titithatso heau shioji nungti lühe!”

⁶Ngü thaplutkü noitsün taoko amao thainian tsak sungshin. Nung thainian khaotso tsak khekkü noiküla, lüko apa da ekok püle waio ekok nouso khekkü pokü noiküla, naiuso nung da khaiu püle, naiuso apa nokshing au oukong suntsün tsakli noiküla.

⁷Ngü thaplutkü noitsün taoko, thainian püle nou sungh. Nungto oukongting, alekkatau naiuso ahatau noiküla. Apa da son huo asong po, nungüh amao nouso hean naiuso thanyomkü wan, naiuso nung chiai ngamkeikü noiküla. Amao thainian nouso tsükhekkü nung tüto ong che samkü noiküla.

⁸Ngü thapkü noinai, ong ehen tsak amao nouso ongko sungkü ep. Nungh ehen tsak nou apa khako aita noitsün ong süme lothe-an. Nung da khaiunia niovei naiuso sonli satkü thatü bülomkü noiküla.

⁹Ngü thapkü noitsün taoko, nokpao noikham nouso taiu. Nungh noikham tsak ko athontsüyangkü kihkü shitsün tsak nou moknoi. Apa neshe nyinli athaiu, naiuso apa khaiuo asangling emok khekkü noiküla. Apa nokpao noikham nung in nyaikü noitsün tsamkei hok nouso chiai thonglut, nungko in nyai

¹⁰naiuso nung ainou in haiu tsak tsangkü sao. Nungko apa yathsüoau khaiunia haowe heng piakü naiuso apa khako tsatsün haowe thon piakü noiküla. Mikhem akam nou tsalou naiuso thsam nouso sop.

¹¹Ngü thapkü noi nai, nung ong ehen nou ngio alethsang naiuso abülom chitetsün ngü lula. Nungtaoko lu thainian püle nou sungtsün loat, naiuso nung pem in nyai nai yakthiokü lothe-an.

¹²Thainian amao nouso ainou oukong kankü khuwan, lüko ngüso atao letletkü kih aulu sopkiu.

¹³Nungsoh nai ngü atsangshei meamean taoko athapau khaiunia khekkü tsak ep. Apa jü dongai thengmia nou loijeikü shimkü shishikü noiküla, naiuso apa athontsüyangkü noitsün tsak nou dongai khukü noi.

¹⁴Apa hau oukong, asuhat, naiuso nokpao ou- kong kiu, tiautenai mele khaiuniahoi apemüh, naiuso ngio amomo nousoüh apa yathsüoau thaiutha, Apa oukong asaita noi-e, naiuso apa nokshing tilaitso athontsüyange.

¹⁵Ngü eptsün atsangshei nou ngü lekkat, naiuso ngü thsüokü shiosungkü noiküla.

¹⁶Nungko tsakü noitsünso tsak dongai ngü sungh küta nung chikü sasakiu au apa tü sangh. Naiuso apaüh ngü hau nung alat sasakiu.

¹⁷Apaüh ngiom, “Nung thainian ong püle nouso goumchi ko sung au noitsün nokshing püle noi-e.

¹⁸Naiuso Akhengting Goa khaiuniahoi nousoüh nokshing oukong eppe naiuso nungh athon tsüyang thaiutha taiu-e.”

¹⁹Nungaih ngü thainian püle nouko sungtsün amao nouso tsükhekkü sübao ahat au lümeikü taoson sasan naiuso sonhuo nou amao nouso lothe-anji, naiuso nungso chiai ngamkeiji nung thainian nge au thatü mongchiokü noiküla.

²⁰Naiuso ngü akhaiu nai ong che sungtsün naiuso phikü ong tsak samsantsün nou ong süme salian-itsün aniovei naiuso ason tsak, bülomkü ngiotsün, naiuso nung amao nouso chiai tekkü ahat au lümeikü noitsün thaiutha nge au mongchiokü noiküla.

²¹Ngü thapkü noitsünko nung ong nou Goa ün khaiuniahoi nousoko ehli naiuso ngüso shiolouwan.

²²Nungphiai athon tsüyangkü noitsün thainian tsak nou shiküta Akhengting Goa ün khaiuniahoi tü halokü mikhem kiukü ngiom, Goa ün khaiuniahoi nou nokpao oukong epau atao shikü noin.

²³Ngü hau meamean nouso thaiutha nungti sasakiu: “Nung thainian püle nouko goumchi nai nokshing püle nou noi-e, naiuso nungto amao nokshing nouso ko mothikü noi-e. Nungh nokshing nou goh apem lotheankü naiuso ngamthiokü wane.

²⁴Nung ong che nouso nung nokshingtsün nokpao che nouso noi-e. Nungthanko amao nokpao tsak sunge, apa to amao ayanai nouso ko thatü mothikü noi-e, naiuso nokpao süme nouso lomowane.

²⁵Apaüh Akhengting Goa thako lochikü Goa khaiuniahoi thangmange. Apaüh ngüso donyam ngiokhem nouso naiuso sümai nouso li-ekiuau kowe-e naiuso Goa ün khaiuniahoi apa oukong khemai pon süme apaitso wane.

²⁶Nungphiai aün nai mikhemtsün noi-e, nungko apa oukong kankü khuwane, naiuso apa moisemkü lomokü wane.

²⁷Goumchi nokshing nouso oukong naiuso asong nouso Akhengting Goa khaiuniahoi hau kiuwane. Ngüso nokpao oukong tilaitso athon tsüyange, naiuso goumchi nokpao nousoüh angio angkü ngüso yathsüo-e.”

²⁸Nung ngiolat nouso athon noin. Ngü thatü hatat nou sangjenkü iula, naiuso ngü alum jü mongai taiu.