Read Khiamniungan Naga Daniel 8 Bible Online

Daniel 8 - Khiamniungan Naga bible

Daniel 8

¹Nokpao Belshazar sampon nouko nai ngü mea mean atsangshei müjam nou epshi.

²Nung atsangshei nouko ngü jüpem alekta Elam khiamkhan Susa noknio nai noikü ep. Ngü nungko Ulai Haiu dongko tsakü noinai,

³nung Haiu dongko onnemok apong tsak ong nime laiukü pokü ep, ong tsak nou amao tsak nouko ayan naiuso laiukü noiküla.

⁴Nung onnemok apong nou apa ongüh ajenap, ajenapki, naiuso ajepeki nai sheikü thaotsün ngü ep. Ti thainianüh apa lolao au tsüshio tsüdekünai apa oukong ainou thakhuao tsüshiokü noiküla. Apaüh mongchiotsünli apaüh chhin naiuso mongmatkü noiküla.

⁵Nung ti alat ta ngü ngawankü noi taoko, won tsak apa hoküh goh ta tsüthankü ajenap ainou jingkü shitsün ngü ep. Apa niovei nime jetko apa ta niansong eptsün ong tsak samkü noiküla.

⁶Ngü haiusai nai tsakü eptsün wonpong dongai apa shin, naiuso apa thatü kongkü shiküta

⁷nung onnemokpong nou tü pohtsün ngü ep. Apa thatü mongmat nou apa tü samtsün ong nime nou thanekü lothe-an. Nung onnemokpong nou thakhuao apa da oukong tsünoiküla. Apa goh ai yakkankü ngamkei, naiuso apa haloau shiokü nungko sau tsünoiküla.

⁸Nung won nou apa chija thsüokü mongmatkü iula, naiuso apa thatü oukong song nou apa ong lothe-an. Nung thangko ong pungkü nou momo ta kha shei-ekü niansong hatsün ong püle sungh.

⁹Nung ong püle nouso ongko tsak da ong ehen tsak samsanshin, naiuso nung oukong nou ajenapki naiuso ajepek naiuso Athaloutsün goumchi nou saokü khu.

¹⁰Naiuso nungh aün hai akonghoi nouso naiuso kianthsüo nouso tü poh au lümeikü oukongkü iula, naiuso nungüh ajantso goh ai yakkankü ngüso chiai ngamkei.

¹¹Apaüh aün hai nokpao lochi, apaüh aloat chaithio asaita apa hau kiutsün lüko lolao, naiuso Amkham Tsam lochinyanan kiu.

¹²Asaita aloat chaithio ayam thakü thiotsün liko, naiuso atsüo don nou goh ai ngamthiowan nou shioko ngüsoüh nungko angei sunhe. Chhisiya alum ko nung ong nou ashio epkü noiküla.

¹³Nungaih ngü aünhonghoi tsaküh amao tsak tü sangtsün lula, “Atsangshei nai eptsün nungso tsülaokü tilektso noi-e? Asaita chaithio liko athsüoting angei aün hai süpaihoi naiuso Amkham Tsam nou ngamthiowantsün thaiutha atsangshei eptsün nung tsülaokü tilektso noi-e?”

¹⁴Nungaih ngü amao aünhong tsaküh thalatsün lula, “Nung thaiutha ajekhaiu heng tsak tsom tsak aopungo nyi 1, 150 tsülaokü noi-e, naiuso nung taoko ahom ahsham chaithio kiutsün tsünoi-e. Nungthanko Amkham Tsam nou shanshi-e.”

¹⁵Nung atsangshei ti athat ta ngü ngela au kowetsün taoko, khaiunia tsak alekta jükhako shitsakü noiküla.

¹⁶Nungaih Ulai Haiu chiai sangh tsak nou jonkü ngü lula, “Gabriel, apaüh ti ep nung alat nou apa hau lüchite.”

¹⁷Gabriel shikü jü dongko tsakü noiküla, naiuso ngü thatü lekkat nou shioko goh ai loi-an. Apaüh ngü tü ngiom, “Eantsün khaiunia, nung alat lüngelou. Nung atsangshei nou goumchi athon thaiutha noin.”

¹⁸Apaüh chitetsün taoko, ngü seitsüngekü goh ai loi-an. Lüko apaüh ngü tü thaloukü ngü tsakü chu-i,

¹⁹naiuso ngiom, “Goa mongmat sungtsün nung ti shinoi-e ngü ni hau hanji. Nung atsangshei nou athon tao thaiutha ngioji.”

²⁰“Ni ong nime samkü onnemokpong nime eptsün nung Media naiuso Persia nokshing nime thaiutha noin.

²¹Won nou Grik hai nokshing thaiutha hanji, naiuso niovei nime jetko noitsün niansong suntsün ong nung chongting nokpao nou noin.

²²Chongting ong lothe- antsün taoko ong püle sungtsün nung mele janthattsün nokshing püle nouso hanji naiuso nungto chongting nokshing nouli to outsükonge.

²³“Tilai nung nokshing nouso athon nou shimkü shi-e naiuso ngüso alohat au lümeikü thatü akausai nou meankü iula-e, nungko mongkong, akausai naiuso phokle laple nokpao nou shi-e.

²⁴Apa oukongkü iula-e lüko nung apa oukong tsangkü tsüde. Apaüh alothe athsüoting nou lousane, naiuso apaüh chhitsün alum ko ashio nou noi-e. Apaüh oukongting khaiunia hoiso khako alothe kankü shi-e naiuso Goa ün khaiunia nou khako alothe shi-e.

²⁵Apa akausai shioko, apaüh apa atsüotsüdekün yamai ashio nou epe. Apa meshen pem tü bülome naiuso alotsüo tsükiu taiukü khaiunia piakü loate. Apaüh apem ongko asongting nokpao lüko lochi-e, lüko apa, khaiunia oukong ti tsühakü lomowane.

²⁶Ahom si asoh aloat chaithio thaiutha atsangshei eptsün nung atsüo shithawao-e. Lüko loto nung tsangkü ataiukei, tiautenai nung atsüo ta mothawaokün khako atao laiukü noi-e.”

²⁷Ngü, mongai kiakü ajekhaiu intso noian, küta ngü chukü nokpao nou ngü tü thoilut taiutsün chhi nai laokü khu, lüko ngü meamean nou henyi-i, naiuso nung angela au tsüshio.