Read Khiamniungan Naga Daniel 9 Bible Online

Daniel 9 - Khiamniungan Naga bible

Daniel 9

¹Medehai nou Darius, Ahasurus thsoüh Babilon nai nokshingkü noiküla.

²Apa nokshing aya pon nouko nai, ngü asio thsam nouso wekü naiuso Yirusalem lotheanküta pon aochinyat ngoikü noiau nou thaiutha, E-po Yerimia tsangkü APAOU nou ngio nou ta yanghekü noiküla.

³Naiuso ngü pukhao nai nethe tenkü, keithonkü APAOU Goa tü thatü kojakü misao sao.

⁴Ngü APAOU jü Goa tü jü khaiuniaso angei shankiukü misaokü ngiom, “APAOU Goa, ni asong noin, naiuso samüh ni hau asuhat kiuji. Ni nou athalou-etsün ngiokhem nouko ni mongkiukü noiji, naiuso ni thoilut nou chhitsün si ni tü tsüojintsünso ta ni asaita atsüojinyang hanji.

⁵“Samüh angei sunhe-iu, sam tsümeikü noiküla, samüh phiokü chhianiu. Ni samüh chhiau thoiluttsün samüh wanan-iu, naiuso ni sam hau ayam thakü nou hantsün ainou sam phoklekü khuwaniu.

⁶Sam nokpaoso, sam nokshing nouso, sam paosiposo, naiuso sam mele athum tü ni anianko yathsüotsün e-po nouso tsangkü ngiotsün ngio samüh tsü-anglu.

⁷APAOU, ni asaita ayamtha nou chhiji, lüko samüh sam chija amiam kanjikan louji. Sam Yihuda nai, Yirusalem nai, ashim naiuso laiukü nai noitsün goumchi nouso ai ni kompengantsün Israel hai chikü thaiutha nung atsüo noin tiautenai ngüso ni tü mong tsükiukü noiküla.

⁸APAOU, sam nokpaoso, nokpao nokshing nouso, naiuso sam paosiposoüh athako amiamsimo angei chhin.

⁹Samüh athako khengshi lüko nito atsüojinyang naiuso awankiutsün noin.

¹⁰Oh APAOU sam Goa, atsamki e-po nouso tsangkü ni sam tsakei-au angiokhem nouso kiutsün ko sam tsütsakei naiuso ni tü angio tsü-ang.

¹¹Israelhai chikü nou angiokhem lothe naiuso ni ngiotsün tü nan. Samüh athako angei sunlou, nungtiphe ni atsamki Mosa Ngiokhem nai satkü taiutsün athesan nouso sam chiai kankü shin.

¹²Ni sam naiuso sam nokpao nokshing nouso tü angiotsünli chhin. Mosa Ngiokhem nai ngiotsün angja chikü sam hau kiukü goumchiko amao noknio nouso chiai phopkü ni Yirusalem hau athsüoting angja kiu.

¹³Lüko Oh APAOU sam Goa, lo saokü ni nou ngiotsüo yam tü hoiluttsün tsangkü tsüdekünai sam angei ainou phokletsün tsangkü samüh ni mongling-iau tsükowe.

¹⁴APAOU, sam Goa, ni sam lohat au khemlokü noiküla, naiuso nungli ni chhin, tiautenai ni asaita ayamtha nou chhiji, naiuso samüh ni tü angio tsü-ang.

¹⁵“Oh APAOU sam Goa, ni akhaiuniaso Ijip ainou nialoukü shitsün tsangkü ni a-oukong haniu, naiuso a-oukong losaokü tsüpean. Samüh angei sunlou-iu, samüh phio-iu.

¹⁶Ayanan taoko sam thaiutha ni tsakiukü shin, nungtiphe loto Yirusalem ko lamongmatshi. Nungh anoknio noin, ni nou asio king noin. Sam angei naiuso sam paosiposoüh tsümeikü chhitsün shioko chenpa shingkhannio nouso naiuso khaiunia chikü nou akhaiuniaso tü lotsaokü thapji.

¹⁷Oh Goa, jü misao naiuso ngü kojatsün alula. Lotheankü noitsün ni nou Amkham Tsam athapshi, nungai khaiunia pungkü nou ni Goa ta nge-e.

¹⁸Sam tü anglu, Oh Goa, anian jonkü noitsün noknio omhetsün naiuso sam angjatsün tü thapkü alukiu. Ni tü atsüojinyang noin shioko, samüh ayamthakü chhitaiu nou thaiutha tsüde.

¹⁹APAOU, sam misao alula, APAOU, sam hau awankiu; APAOU, sam tü anglu naiuso lüchhi! Khaiunia pungkü nou ni Goa noin ta nge au, ni tsangkü lanoi! Nung noknio naiuso khaiuniahoi nouso ni nou noin.”

²⁰Ngü jü angei naiuso jü khaiunia Israelhai angei thaiutha shanankü misaokü noi, naiuso APAOU jü Goa tü apa ün asio Amkham Tsam shanshiau kojakü noiküla.

²¹Ngü misaokü noitsün tao ngü nung khako atsangshei nai eptsün aün hong tsak Gabriel, nung ngü noi nai jeikü shin. Nung asham aloat chaithio kiutsün tao noiküla.

²²Apaüh sasakiukü ngiom, “Daniel, khapiam ngio ngela au ni tü hachu au ngü nungai shikü noin.

²³Tilai ni Goa tü koja au tsalou, apaüh ni tü thalakü noiküla. Apaüh ni tsüojinji, nungtiphe nung athalatsün ni hau chite au ngü shin. Lo ngü nung atsangshei sasakiu nai mong nou akiu.

²⁴“Goa nou akhaiuniaso naiuso asio noknio angei naiuso tsümeikü ainou jashiau Goa atao that chinyatjam aochinyatpon kiukü noin. Angei nou wankiu-e, naiuso athontsüyang ngiotsüo nou shane, nungti atsangshei naiuso khapiam nouso atsüo thawao-e, naiuso asio Amkham Tsam nou losio loushi-e.

²⁵Nung ngelakü naiuso ngelokü ataiu: Yirusalem shanshiau ngiokhem kiutsün tao ainou Goa ün achosan ahei moshikün lektso, nung pon aochinyatkü chinyatjam nou yankü khuwane. Yirusalem noknio, yamkheng nouso naiuso pe nouso hakü shanshi-e, naiuso nung chinyatjam aoluokkü nime pon tsakü noi-e, lüko nung angja tao tsak noi-e.

²⁶Naiuso nungh atao athon nai Goa ün achosan ahei nou ayam tsüthakü loatkü wane. Nung noknio naiuso Amkham tsam nou oukongting nokpao süpaihoi tsaküh komtsün ko lotheane. Goa nou khemkü taiutsün ehli naiuso alotheantsün nung athon nai shelei tsak khekkü shi-e.

²⁷Nungh nokpao nou pon chinyat thaiutha piakü ko athalou-e noi-e, naiuso tilai nung ponwem nou yane, apaüh aloat chaithio naiuso chaithio nouso laolowane. Alekkat nou Amkham Tsam asungthonting nai taiu-e, naiuso nung taiutsün Goa nou khemtaiu kiutsün athon mophetekün lektso nungko noi-e.”