Read Khiamniungan Naga Hosea 1 Bible Online

Hosea 1 - Khiamniungan Naga bible

Hosea 1

¹Yihuda nai Nokpao Uzzia, Jotham, Ahaz, naiuso Hezekiaso nokshing tao, naiuso Israel nai Jehoas thso Jeroboam nokpao taoko, APAOU nou Beeri thso Hosea hau nung ngiongem kiu:

²Tilai APAOU nou chongting Israel haiko Hosea tsangkü chiten, Apaüh Hosea tü ngiom, “Lükhu, küta jisiwopkü tsakeitsün nyiuhai tsak atsammongnyiu theau lüjonlou, naiuso athsoso lüko apa khekkü noi-e. Nung saisile khekkü jü khaiuniasoüh ngü le-aniu, naiuso ajisiwop iula-iu.”

³Nungtiphe Hoseaüh Deblaim thso menyiuthso Gomer ta niankü tsamsigoh yang. Ngüne thso niochong nou melothso tsak chet,

⁴küta APAOU nou Hosea tü ngiom, “Apa nian ‘Jezreel’ ta lünian, tiautenai apa paosipo Jehuüh Jezreel nai chaoattsün thaiutha Israelhai nokpao hau angja kiuau atao laiukü tsünoishi. Ngü Jehu ün thsaosithso nokpaoling lothonane.

⁵Naiuso Jezreel Tsamei nai nungh taoko ngü Israel ün süpai oukong lomowane.”

⁶Loüh Gomerüh menyiuthso tsak chetshi- APAOU nou Hosea tü ngiom, “Nung menyiuthso nian nou, ‘Tsütsüojinkün’ ta lüjon; tiautenai ngü loto Israelhai hau atsüojinyang tsühanshi-e, tsüdekünai awan tsükiu-e.

⁷Lüko Yihudahai hau to atsüojin hane. Ngü APAOU ngüso Goaüh ngüso kipsane, lüko nung chhi nou sahsingiu tsüdekünai ehli tsamkei naiuso mokthso tsangkü to tsükipsane.”

⁸Gomerüh apa thso menyiuthso hau nyaochep le-aniküta, apa loüh pem tsükengkü iulashikü melothso tsak chet.

⁹APAOU nou Hosea tü ngiom, “Nung melothso nou nian,’ Jükhaiunia Tsüde’ ta lüjon, tiautenai Israelhai jü khaiunia tsüde, naiuso Ngo ngüso Goa tsüde.”

¹⁰Israel khaiunia khiamnok nai singtsoli aweau naiuso athatluao tsüshiokü iula-e. Loto Goa nou ngüso tü, “Asam jü khaiunia tsüde,” ta ngioji, lüko apaüh ngüso tü, “Asam aa Goa thsoso noin ta ngioau ajekhaiu nou shiji!”

¹¹Yihuda khaiunia naiuso Israel khaiunia nouso müjam jeiailu shi-e. Ngüsoüh ngüso thaiutha ahei tsaklu cholou-e, naiuso ngüso goum- chi nai loüh jam singkü naiuso tsüo- meikü kihshi-e. Ah, Jezreel ajekhaiu nung, ajekhaiu asong tsak noi-e!