Read Khiamniungan Naga Hosea 10 Bible Online

Hosea 10 - Khiamniungan Naga bible

Hosea 10

¹Atao tsak koto Israelhai sainaoshep chingkü eiutsün sainao tsak khekkü noiküla. Ngüso titithatso tsüomeikü khu, nungti- thatso ngüsoüh paisilung amthang nouso shan. Ngüso goh titithatso memeikü khu, nungtithatso ngüsoüh amkham lung kheam nouso aleng meikü shan.

²Akausai mongpem suntsün khaiuniahoi loto ngüso angei thaiutha omhe au noin. Goa nou ngüso amthang nouso lothe-e naiuso asio lung kheam nouso lomo-e.

³“Samüh APAOU lon tsühattsün sam nokpao tsünoi ta nung khaiunia nousoüh tsütsangkü ngio-e. Nokpao noi lüko apaüh sam thaiutha ti chhi kiuau shio-e?

⁴Hoikü shanlou-ekü naiuso atsüotsüdekünai ngiomong shingkü ngüsoüh yang. Thaiupekkü taiutsün eiu nai chih lotheantsün sangthe-en khekkü, thakü nou tsüthakü hau iula-i-iu.”

⁵Samaria noknio nai kihtsün khaiunia nouso Bethel nai chaiou lakkeng nou saitsün jangtsopong sotsom mowantsün thaiutha hatatkü yangelate. Khaiunia nouso naiuso sotsom yathsüotsün meson nouso nung thaiutha shape. Tilai nung chaiou lakkeng sotsom ajinka nou thukkane, ngüso wekü shape.

⁶Asongting nokpao hau paopei tsakli kiuau nung sotsom nou Asiria nai kankü khuwane. Nung alotsüo hoiluttsün tsangkü Israelüh amiam eppe.

⁷Haiu nou pai lalükhuntsün khekkü, apa nokpao kankü khuwane.

⁸Israel khaiuniahoi nou sotsom amkhamtsün kingkhaiu nai Aven amkham tsam nouso lotheane. Ngüso amthang nouso ko tsao-pai naiuso chih ai nouso samsane. Khaiuniahoi nousoüh king nouso tü, “Sam Atsangkiu!” naiuso king nouso tü, “Sam Asohjei!” ta ngiokü jone.

⁹APAOU nou ngioji, “Israel haiüh Gibea nai angei suntsün tao ainou ngü tü khengshikü angei sunhetsün tsülao. Nungtiphe Gibea nai ngüsoüh ehli nou waohe-e.

¹⁰Ngü nung angei khaiunia nouso tü poh-e naiuso ngüso hau angja kiu-e. Mele nouso kamlokü ngüso tü khengshi-e, naiuso ngüso angei piakü noitsün thaiutha ngüso hau angja kiu-e.”

¹¹“Ataojam Israel nung tsonyak nya au khemloukü chhi monkü noitsün jangtso tsak khekkü noiküla. Lüko ngü apa sang aleng amei nai khe tsak lolutkü chhi asong chhi-iau thatlou. Ngü Yihuda hau goh khutpektsün chap nou naiuso Israel hau goh nou chungwom nou lo-ai-i.

¹²Ngü ngiom, ‘Asam thaiutha goh ayan lühaiupeklo, nungko asio nou lüthom, küta asamüh ngü hau thumkü kiutsün ouk be-eiuyam nou yamhe-e. Loto asam jü dongai mongphoklekü ashi, naiuso ngü asam dongai shikü ouk nou kheplut kiu-e.’

¹³Lüko nungliko asamüh tsümeikünlu thomthio naiuso nunglu yamheji. Asamüh atsüotsüdekü singiotsün pai-eiu nou he-aniu.” “Asamüh asam ehli tsamkei nouso naiuso süpaihoi apia nou tü monglamphe,

¹⁴asam khaiunia dongai ehli nou shi-e, naiuso asam ün ehüke nouso apem lothe-ane. Nung ajekhaiu nou Nokpao Shalmanüh ehli nai Betharbel noknio lothe-ankü thsosinyiu hoi apem soimowantsün ajekhaiu khekkü noi-e.

¹⁵Bethel khaiunia nouso, asamüh tsümeikün thsüokü chhi nou shioko nung asam tü thawao-e. Ehli yachukü thunkü Israelhai nokpao eane.”