Read Khiamniungan Naga Hosea 11 Bible Online

Hosea 11 - Khiamniungan Naga bible

Hosea 11

¹APAOU nou ngioji, “tilai Israel nung methso tsak noiküla, ngü apa tsüojin naiuso jü thsoli apa Ijip ainou jonshi.

²Lüko ngü apa tü titithatsojam jon, nungti thatsojam apa ngü ainou phoklekü khuwan. Jü khaiuniasoüh Baal hau aloat chaithio kiu; naiuso sotsom nouso hau angannyam nou jahkiu.

³Külüko Israel keilükhun yaao tsandetsün Ngü noiküla. Ngü jü khaiuniaso jü phamongai luklou lüko, ngü ngüso paotsangkü noiküla ta ngüsoüh tsüwesan.

⁴Ngü ngüso tsüojinkü nialou. Ngü ngüso jü ondong tü thankü piplou; ngü kaukü napkü ngüso hau waoshen.

⁵“Ngüso jü dongai laojikanau tsümongchiophe, ngüso Ijip nai laokü khuao noin, naiuso Asiria haiüh ngüso tü nok-shinge.

⁶Ngüsoüh noknio nouso ai ehli nou shi-e naiuso noknio bekhan nouso thiothiowane. Jü khaiuniasoüh ngüsoüh yang- tsünlu ameiting ta chhitsün tsangkü lomowane.

⁷Ngüso ngü ainou phoklekü khuwanaolu koweji. Ngüso tü khe loluttaiutsün shioko ngüsoüh we-e, lüko sauühtso ngüso ainou khe tsüngiowankiu-e.”

⁸“Israel, ngü ni titi wanan some? Ngü ni titi le-an some? Ngü Adma lomowantsünli ni titi lomoau shio-e, tsüdekünai ngü Zeboiim tü chhitsünli ni tü titi chhi-e? Jü mongüh ngü hau nung tsüchhi-i-e! Tiautenai athaiutha jü atsüojin thatü songkü noin.

⁹Ngü amongmat nai ni hau angja tsükiu-e; Ngü Israel tsülomo shi-e. Tititenai Ngüto khaiunia tsüde, Goa noin. Ngü asio nou asam ko hakü noin, Ngü asam dongai mongmatkü tsüshi-e.”

¹⁰“Tilai ngü ngüso ehoi tü chongkhao nouli ngaolute, jü khaiuniaso ngü ko hoilute. Ajenap ainou ngüso jü dongai liukü khujikane.

¹¹Ijip ainou waio nouso naiuso Asiria ainou mükham nousoli khaolaokü kamjikane. Ngü ngüso tsamai nialoukü shishi-e, ta Ngo APAOU, nou ngiowaniu.”

¹²APAOU nou ngioji, “Israelhai tembüm naiuso akausai nou ngü lemlou-iu, naiuso Yihuda haiüh losaokü Ngü mongkiutsün naiuso asio Goa tü khengshiji.”