Read Khiamniungan Naga Hosea 4 Bible Online

Hosea 4 - Khiamniungan Naga bible

Hosea 4

¹Nung gohthang nai kihtsün khaiuniahoi thako APAOU nou mi tsak noin. Israelhai, apaüh ngiotsün tü anglu: “Nung goumchi nouko amongkiutsün tsüdekünai atsüo- jinetsün tsünoi, naiuso khaiuniahoi nou Ngü Goa ta tsüwesan.

²Ngüsoüh thalouji lüko lotheanji, ngüsoüh yaang bülomji, loatji, kauji, naiuso tsütsamtsütsüo chhiji. Alothe nou piajikanji, naiuso tsaküh tsak loatji.

³Nungtiphe goh nou jüolakü iula-e, naiuso nungko kihtsün thainian, waio, naiuso nguo lüko apem eane.”

⁴“Sauüh lünou khaiuniahoi hau mi lakiu, tsüdekünai lathut, tiautenai mesonhoiso tü khengshitsünto, asam thako noin ta APAOU nou ngioji.

⁵Asoh si anyi tsüyangkü asamüh kamheji, naiuso e-po nouso asam tü meijeng tsüde. Ngü asam nyiu Israel lotheane.

⁶Jü khaiuniaso mowanji tiautenai ngüsoüh ngü tsüwesan. Asam meson nousoüh ngü wesanau tsümongchio, naiuso jü atsande tsüloukü wanan, nungtiphe ngü asam wananji naiuso asam thsoso jü mesonhoi ta tsüwethioji.”

⁷“Asam mesonhoi phopkü singjikan nai, asamüh ngü tü khengshikü phopkü angei sunheji, nungtiphe ngü asam nianlom nung amiam au iula-i-e.

⁸Asam jü khaiuniaso angei chiko memei iulaji, nungtiphe loüh asamüh ngüso hau angei phopkü chhi-iau mongchioji.

⁹Nungshioko khaiuniahoi nouso angjatsün lilu asam lüko angja-e! Ngü asam hau angja kiu-e naiuso asam chhi tsümeikün thaiutha asam hau thami-e.

¹⁰Asamüh aloat chaithio ainou asam haoson he-e, lüko naiulutkü noi-e. Asamüh achet- sinyim-itsün goa nouso tü amkhame, lüko methso tsüchete, tiautenai asam ngü ainou phoklekü amao goa nouso tü hoilutau khuwan.”

¹¹APAOU nou ngioji, “Thengshe naiuso akong nou jü khaiuniaso mongyang lomowankiuji!

¹²Ngüsoüh paidong tsak tü atsangshei thaiutha sangji! Ngüsoüh ti ngeau aiuji nung ngüso hau pailai tsaküh chiteji! Ngüsoüh Ngü le-aniu. Menyiu tsak ajisiwop khaiunia iulatsün khekkü, ngüsoüh amao goa nouso hau ngüso kiuwaniu.

¹³Kingkhaiu nai asiothang nouso ai ngüsoüh aloat chaithio kiuji, naiuso choi nouso chiai, pai atsok nouso khemai, punkhem nouso ai, ngüsoüh angannyam nouso jahji tiautenai nung paikhemsoh nou ngüso hau iiwon tsak noin!” “Nung tsangkü asam thso menyiuthso nousoüh ajisiwop, naiuso asam lehsoüh tsütsamtsütsüo chhiji.

¹⁴Külüko ngü ngüso hau nung thaiutha angja tsükiu-e, tiautenai asam pem amkham tsam ajisiwop nousoko khuhaji, naiuso ngüso ko aikü asamüh paisilung amkham aloat chaithio nouso kiuji. Ngiopung ngiothi nai ngiotsünli, ‘Iila tsünoikün khaiunia tsak nouto molüshi-ane.’”

¹⁵“Asam Israel khaiuniahoi ngü ko mong tsükiukü noi lüko, Yihuda to nung aphio nouko laha-i. Gilgal tsü- dekünai Bethaven nai la-amkham, tsüdekünai nungai aa noitsün APAOU nianko athalou lashanhlou.

¹⁶Israel khaiunia mokthso nouso khekkü mong kongtsün noin. Ngo onnemok- thso nouso khekkü titi thsan ashe nou tsade?

¹⁷Israelhai goa sotsom nouso hau longa-anikü noin. Ngüso mongüh aiutsün nai ngüso lükhu-ko.

¹⁸Asuhat nouko to amiam nou aiukü, theng thsüokü shiuküta, ngüso ajisiwop nai monglingeji.

¹⁹Ahsheih nou shipkü khuwantsünli ngüso kankü khuwane, naiuso paisilung amkham aloat chaithio nouso thaiutha ngüso miamate.”