Read Khiamniungan Naga Hosea 5 Bible Online

Hosea 5 - Khiamniungan Naga bible

Hosea 5

¹“Asam mesonhoi nouso, nung anglu! Asam Israel khaiuniahoi, mong nou akiu! Asam nokpao tsammong nouso anglu! Asamüh ngiotsüo nai mi khemau noiküla. Nungtiphe asam chiai mikhem nou shi-e! Asam Mizpa nai jin tsak, Tabor king chiai nyao sukpengtsün tsak,

²Akacia noknio nai khanthop tsak iula-iu, nungtiphe ngü ngüso chikü hau angja kiu-e.

³Israel ti khekkü noin ngü ngeji- apa ngü ainou pamlouau tsüshio. Apa ajisiwop chhikü noiküla, naiuso apa khaiuniasoüh ngü tü amkhamau tsümai”

⁴Khaiunia nouso ngüso Goa dongai phoklekü shiau ngüso chhisiya tsümeikü nou ngüso loyangji. Sotsom amkhamtsün nou ngüso da mongkü helouwaniu, naiuso ngüsoüh APAOU nou tsüwesan.

⁵Israelhai bülom mekoi nou ngüso khengshikü weji, ngüso angeiüh ngüso thekkelatkü loi-anji.

⁶Ngüso onnemok naiuso jangtso nouso ngüsoüh APAOU hau aloat chaithio kiuau kankü khuji, lüko nungüh ngüso thaiutha ti ahalou tsünoi, ngüsoüh apa tsüeplou, tiautenai Apaüh ngüso le-an.

⁷APAOU nou da ngüso mong tsükiukü noiküla, nungtiphe ngüso thsoso apa thaiutha tsüde. Nung shioko lo ngüso naiuso ngüso goumchi laiukü tsünoikü lotheane.

⁸Gibea nai ehli jangong lümat! Rama nai aloulektsün sangh lükiu! Bethaven nai ehkhong lükhong! Benjamin khaiuniahoi, eh eiu au lütsalou!

⁹Israel lotheanau angja ajekhaiu nou shiji. Israel khaiunia- hoi, nung atsüoting thawao-e!

¹⁰APAOU nou ngioji, “Yihudahai ahei nousoüh Israel komhe, naiuso apa ainou goh kaulükhun nou shioko ngü mongmatji. Nungtiphe ngü ngüso chiai a-angja nou khiamthe tsak khekkü thsalut-e.

¹¹Israel athangmang nouko omheji; tiautenai apa akiu au tsütaiukünso dongai ahachu yamkü khutsün thaiutha ko apa tengkam gohthang nou lomo- waniu.

¹²Ngü Israel chiai alothetsün naiuso Yihudahai chiai alomotsün kankü shi-e.”

¹³Tilai Israelüh apa titi akia nung ngesan, naiuso Yihudaüh apa muo nouso epsan, nungaih Israel, Asiria- hai nokpao asong dongai ahalou yamkü khu, lüko apaüh ngüso akia tsüdekünai mou nouso lomeikiu au tsüshio.

¹⁴Chongkhao tsaküh pohtsünli ngü Israelhai naiuso Yihudahai tü poh-e. Ngü ngüso nelangkü chipekküta le-ane. Ngü tilai ngüso tenlükhune, khaiunia sauüh ngüso kipsanau tsüshio-e.

¹⁵“Jü khaiuniaso ngüso angei thaiutha saiukü mo-omheküta ngü yamkü moshikünlektso ngü ngüso le-ane. Tsüngean ngüso angja eptsün tsangkü ngüsoüh ngü epau kowe-e.”