Read Khiamniungan Naga Hosea 7 Bible Online

Hosea 7 - Khiamniungan Naga bible

Hosea 7

¹“Ngü jü khaiunia Israel lomeiau naiuso tsüomeikü shanshiau yangtsün pungkü nai ngüso tsümeikün naiuso akausai chhi lu ngü epsanji. Ngüso tsaküh tsak khonateji; naiuso tsam nouso ai napkü kao-eji, naiuso ngüsoüh sonyam nai khaiuniahoi nouso tü ap he-anji.

²Nung tsümeikün chhi ngü tsüpe-ane ta ngüso mongai tilaitso tsüyangludeng, lüko ngüso angeiüh ngüso lemjeikü noin, naiuso ngü nungso epkülu noin.”

³APAOU nou ngioji, “Khaiuniahoi nousoüh nokpao naiuso apa khemko asonghoi nouso ngüso mongthat tsümeikün tsangkü kausaiji.

⁴Ngüso chikü akausai naiuso monglamau tsüshiokünhoi noin. Themtsai saitsün nou themtsai peksani au mo-oumkü nai in nou momatnyaikü aojahkhan nai in khaotsün khekkü ngüso mongai achinyan nou thangjeikü noin.

⁵Nokpao ün sümai ajekhaiu ko nai ngüsoüh nokpao naiuso apa asonghoiso theng nou shentukkü a-aiu iula-i.

⁶Ngüso tsümeikü thatsantsün nou ngüso mongpemai aolam nouli jekji. Asoh chikü ngüso amongmat nou miankü noiji naiuso ahom to nung innyai li shithsatji.”

⁷“Ngüso mongmat jekkü sungtsün taoko ngüsoüh ngüso ün nokpao nouso loatan. Ngüso nokpao tsakjam tsakjam ta loatan, lüko ngüso sauühtso ngü tü ahalouau tsüjon.”

⁸APAOU nou ngioji, “Israel khaiuniahoi nou themtsai sangsang shashakün tsak khekkü noin. Ngüso lemkü noitsün mele nouso ta ngüso niolutji,

⁹naiuso nung gohmao khaiunia tü niolut nou shioko ngüso oukong mowanji ta ngüsoüh tsüngela. Ngüso aakihlaiu letaniu, lüko ngüsoüh nungtso tsünge.

¹⁰Abülom nou Israel haiüh ngüso lu sapthiolouji. Alum thawaokü shi lüko, Ngü ngüso Goa, APAOU nou dongai laokü tsüshi.

¹¹Ayanglu tsünoikün Israelhai, chongmükham khekkü a-aiu, ngüsoüh ahalouau Ijip hai tü chong jonji, naiuso Asiria hai dongai khuji.

¹²Lüko nyao sukpengküta waiotso nouso khulou- tsünli ngü ngüso thalou-e. Ngüsoüh tsümeikü chhitsün thaiutha ngü ngüso hau angja kiu-e.

¹³“Ngüso thaiutha inyate! Tiau- tenai ngüsoüh ngü wananiu naiuso ngü tü khengshi-iu. Ngüso lomokü wane. Ngü ngüso kipsanau mongchio lüko ngüsoüh ngü tü amkhamtsün yaang noiküla.

¹⁴Ngüsoüh ngü tü mongkiukü misao tsüsao, nungliko ngüsoüh paisilung amkhamtsünsoüh li goh ai loikü wekü shapji. Tilai ngüsoüh chih naiuso theng thaiutha misaoji, nungaih ngüso chija paisilung amtsünsoli angja kiulokü misao loji. Ngüso titengkü akheng- shitsünso noin!

¹⁵Ngüso niasantsün naiuso oukongitsün Ngü noi lüko ngüsoüh ngü tü khengshikü thatsan.

¹⁶Ngüsoüh ngüso halouau tsüshio- kün goa dongai tsülaokü khulut. Ngüso ouk tsüsunkün wonsao uokop pai tsak khekkü ngüso tü monglamau tsünoi. Tiautenai ngüso ahei nousoüh ngio bülomkü singio- tsün shioko ngüso sahsingio nou eane, naiuso Ijip hai ngüso tü nyailute.”