Read Khiamniungan Naga Hosea 8 Bible Online

Hosea 8 - Khiamniungan Naga bible

Hosea 8

¹APAOU nou ngioji, “Ehpung lüpung! Tiautenai letche eh-poh khekkü jü goumchi tü eh nouso pohji! Ngü jü khaiuniaso ko athalou-e taiutsün ngüsoüh lotheaniu, naiuso ngü tsandetsün tü khengshi-iu.

²Ngüsoüh ngü tü ngüso Goa ta jon lüko, ngüso jü khaiunia ta ngio lüko, naiuso ngüsoüh ngü ngeji ta ngio lüko,

³ti amei noin nung ngüsoüh le-aniu. Nung shioko ngüso ehoiüh ngüso tü kome.”

⁴Jü khaiuniasoüh nokpao hoi chosan, lüko nungh ngüso mongthat chosan. Ngüsoüh jümongyang tsüloukü ahei hoi singthio, chaiou lakkeng, tangkason louküta goa sotsom nouso ngüso chija lothelouau shanji.

⁵Samaria noknio khaiuniahoi nou chaiou lakkeng nou shantsün jangtsopong amkhamtsün ngü chinyanji. Nungsotü ngü thsüokü mongmatji. Ngüsoüh sotsom nouso wananau atao tilektso the-e?

⁶Nung sotsom Israelhai waiyang khaiunia tsaküh shan nungto goa tsüde nou! Samaria nai amkhamtsün jangtso- pong sotsom nou nelangkü thionyom- ane!

⁷Tilai ngüsoüh ahsheih nou shiupenge, ngüsoüh ah-ou-ahsheih be-eiuyam yamhe-e! Chih tsünyan- kün eiu tsak nou tilaitso eheshiu lousanau tsüshio. Nung eiusan lüko melemao nousoüh yamhe-ane.

⁸Israel nung melemaohai atheau tsünoikü naiuso pai-ankü noitsün lak tsak khekkü iula-iu.

⁹Liu ai noitsün tsüthamekün gado mongkantsün khekkü, Israel hai ngüsoüh mongchiotsün ailu khuji. Ngüso Asiria nai ahalou yamkü khu, naiuso ngüso kiplouau amao mele nouso amai kiukü mephaiu yam.

¹⁰Lüko loto ngü ngüso aikü lokamküta angja kiu-e. Tilai Asiria nokpaoüh ngüso thangmange, ngüso akia nou jeikü chinkei-e.

¹¹“Israel khaiunia nousoüh ngüso angei wanlouau amthang titi piakü shanji, nungti piakü angei sunheau athang shanlouji!

¹²Ngü khaiuniahoi thaiutha aweau tsüshiokü ngiokhem satkü taim, lüko ngüsoüh tsünge- dekün tsakli wanji.

¹³Ngüsoüh ngü hau aloat chaithio nouso kiuji, naiuso nung chaithio nyih heji. Lüko Ngü APAOU nou ngüso tü tsümongling, ngü lo ngüso angei yangshikü nung thaiutha ngüso hau angja kiu-e, ngü loüh ngüso Ijip ai hongane!”

¹⁴“Israel haiüh ngüso nokpao tsam nouso lah-iu, lüko ngüsoüh ngüso shantsün pe-an. Yihuda haiüh mongkü pejeitsün noknio nouso shanji, lüko ngü ngüso nokpao tsam naiuso noknio nouso jekthiowanau in nou honge.”