Read Khiamniungan Naga Hosea 9 Bible Online

Hosea 9 - Khiamniungan Naga bible

Hosea 9

¹Israel khaiuniaso, asamüh paisilung amkhamtsünso khekkü sümai saohetsün lülaolou. Asam Goa ainou asam phoklekü khuwaniu naiuso apa ko mong tsükiukü shin. Goumchi apemai asamüh asam chija Baal hau ajisiwop haili janthiowan naiuso nung chhi mai ni hau apaüh chih nou kiuwaniu ta yangkü monglingat.

²Lüko lo shakta lu asamüh chih, olip khiam, naiuso theng saiukü tsütaiushi-e.

³Israel khaiunia nouso APAOU ün gohthang nai tsünoi-e lüko Ijip ai laokü khuküta Asiria nai anotsün chih he-e.

⁴Nung gohmao goumchi nouso ai ngüsoüh APAOU hau theng chaithio kiuau tsüdekünai ngüso aloat chaithio kankü shiau tsüshio-e. Mea chih henai longeitsünli ngüso chih hetsünso apem longei-e. Ngüso thai tukkü noiau thaiuthalu nung eheshiu kankei-e; nungko nou titso APAOU amkham tsamai hau chaithio tsükiu-e.

⁵Naiuso tilai APAOU lomsanau nou sümai nouso atao shi-e, naito ngüsoüh titi the-e?

⁶Tilai aküothe nou shikü khaiuniahoi nou khupenge, Ijip haiüh ngüso kamlouküta Memfis nai khanane! Ngüso chaiou, tangkason naiuso ataojam ngüso tsamthangso chih ai naiuso tsao-pai nousoüh mepokkane.

⁷Khaiuniahoi nou maikü noitsün Angja epau atao shikü noin. Nung thawaotsün tao Israelüh nge-e! “Nung e-po nou mainga tsak noin naiuso onthso noitsün khaiunia nung a-aiu ta asamüh ngioji.” Asamüh ngü thatü chinyanji tiautenai asam angei thatü songkü noin.

⁸Goa nou apa khaiunia Israel lotsüo au ngü e-po tsakli hong. Külüko ngü tilüsongai khu-e, waiothso tsak khekkü asamüh ngü thalouau koweji. Goa ün amkham tsamai lüko khaiunia nouso e-po ün ehoi jije.

⁹Ngüso Gibea nai lilu ngüsoüh chhi thalu tsümeikülu chhiji. Goa nou ngüso angei yangsane naiuso nung thaiutha angja kiu-e.

¹⁰APAOU nou ngioji, “Ngü Israel chongting eploutsün to, liutsa nai sainaoshep samkü eplotsün khekkü noiküla. Ngü asam paosiposo chongting eptsün to nung ahtao nouko chongting semtsün phiushep nouso khekkü noiküla. Lüko tilai ngüso Peor king ai shin, ngüsoüh Baal amkhamau yachu, naiuso atao laiukü tsünoikü ngüsoüh tsüojintsün achinyanau goa nouso hau lümeikü noiküla.

¹¹Israel ün ajinka waiothso tsak khekkü jeilükhunane, naiuso loto ngüso ongko methso chetsinyim- tsün tsünoishi-e.

¹²Ngüsoüh methso hoi thashesan lüko, ngü ngüso aa tsaktso tsüpoitaiu kiukü apem kankü khuwane. Tilai nung khaiunia nouso ngü le-ane ngüso tü tsümeitingkü thawao-e.”

¹³APAOU, ngü to ngüso thsoso tü homkeiküta loattsün epji.

¹⁴Nung khaiunia nouso tü chhiau ngü ni tü ti asangta? Ngüso menyiuhoi loun a-eiula-i! Ngüso thsoso paotsangau tsüshiokü a-eiula-i.

¹⁵APAOU nou ngioji, “Ngüso tsümeikü chhitsün apem nung Gilgal nai yachu. Nungaih yakü ngü ngüso tü chinyan. Ngüsoüh tsümeikü chhi nou shioko, ngü ngüso jügoh ainou komane. Ngü loto ngüso tü tsütsüojin shi-e, tiautenai ngüso ahei chiküüh ngü tü khengshi.

¹⁶Israel khaiuniahoi nung pai tsak a-eiu wonankü naiuso a-eiu tsü-eiukün khekkü noin. Ngüso tü tsüchetsinyime loüh chetsinyim küta ngüsoüh tsüojinkü noilüko, ngü ngüso loatkü wane.”

¹⁷Ngü yathsüotsün Goa nou apa khaiuniaso wanane, tiautenai ngüsoüh apa tü angio tsü-ang. Mele nouso ongko ngüso ashetkeitsün khaiuniahoi iula-e.