Read Khiamniungan Naga Yoel 2 Bible Online

Yoel 2 - Khiamniungan Naga bible

Yoel 2

¹Goa asio king, Zion nai ehkhong nou khongkü jangong nou lümat. Yihuda khaiunia nouso, asam lüngaongao! tiautenai APAOU ajekhaiu shimkü shiji.

²Nung thengmiakhao nou sejeikü anyakhem ajekhaiu tsak noi-e; anyakhem nou king loipoktsünli, jongkuhoi asong nou kha ai khuji. Nung khekkü tilaitso tsünoiküla, naiuso loüh tilaitso tsünoishi-e.

³In nou jekthiowantsün khekkü ngüsoüh paisam nouso heanji, ngüso khakoto nung goh nou Eden Aimong khekkü, lüko ngüso yanlükhun phiaito nung singtso goh khekkü, ngüso khako titso tsüthakhu.

⁴Ngüso athapau mokthso nouso khek; ngüso ehli mokthso hoi khekkü jingji.

⁵Ngüso kingkhaiu nouso ai hamkei nai ehli tsamkei ngaotsün khekkü, ngüso in nyai nou paithsam won laheantsün khekkü, ngüso ehli au khemloukü noitsün süpai, hoihoi ta tsapkü tsataiutsün khekkü noin.

⁶Ngüso shingoinai khaiunia pungkü hattatji, khaiunia pungkü kha khulakü iulaji.

⁷Lengsiyahoi khekkü ngüsoüh komji, süpaihoi khekkü dioai nou da sungji. Ngüso kha ailu saitha khuji, naiuso ngüso yam tsüli-e.

⁸Tsüdekünai yamkei nai atsonjek tsükiu-eji. Ngüsoüh ehjiothang nouso thuksatkü khuji, naiuso ngüso tiühtso tsüthayangji.

⁹Ngüso noknio thaloukü khaolaokü khuji, ngüso dioai nouso chiai khuji, tsam nouso chiai sungkü tsakeiji, naiuso koukhantso nouso ai kauhoi khekkü napji.

¹⁰Ngüso kha ai khunai goum nou haiuhaiuji, naiuso maou nou ngaongaoji. Aje naiuso alei nyakhemkü iula, naiuso loto kianthsüotso nouso tsüjeshi.

¹¹APAOU nou Apa süpaihoi tü ah-mokli ngemkü ngiokhem kiuji. Apa ngio angtsün naiuso kankeitsünso to oukongkü noin. APAOU ajekhaiu titi ahat au tsak noin! Nungko sauüh jeilosome?

¹²“Lo lüko,” “keithonkü shapkü naiuso mongsaiukü, saitha nou mong phokle küta jü dongai laokü ashi ta, APAOU nou ngioji.

¹³Aneshe chipektsün nouto tsüsaiu, amongpem lothetsün nou ni mongsaiutsün lühan.” Asam Goa APAOU dongai laokü ashi. Apa atsüojin naiuso atsüojinyang hantsün nou miankü noin. Apaüh jeilouji naiuso athaloutaiutsün kankeiji, apa angja kiuau tsüdekü asaita awan kiuao khemloukü noin.”

¹⁴Tsüngean APAOU asam Goa mong li-eküta, chihsikhiam saiukü oukkiu au shiom. Nungaito asamüh apa hau chih naiuso theng chaithio kiuau shio-e.

¹⁵Zion king nai jangong lümat; keithon au naiuso ajeiaikam kamshiau ngiokhem lükiu!

¹⁶Khaiuniahoi nouso alokam; asio ngiokam tsak thaiutha ngüso lükhemlou-i; petchehoi nouso nialoukü ashi; methsohoi naiuso nionyaothso nouso alokam. Loting tsamsigoh yangkü noitsünsoüh lüko, ngüso tsampai letaiukü shiau noin.

¹⁷Amthang naiuso Amkham tsamai naptsün ajet nouko, APAOU yathsüotsün meson nousoüh nungti shapkü misao au noin: “APAOU, akhaiuniaso tü atsüojinyang anoi. ‘Asam Goa tiai noin?’” Ta ngiokü amao mele nouso hau sam tü lochilotsaokü lanyailut-i. Loto APAOU nou apa goh thaiutha

¹⁸atsüojinyang kiushin; naiuso apa khaiuniaso chiai atsüojinyang noiküla.

¹⁹Apaüh ngüso tü thala: “Lo ngo asam hau chih, theng, naiuso olip-khiam nouso kiu-e, küta asam mongtsame. Loto amao mele nousoüh asam tsülochilotsao shi-e.

²⁰Ajenapki ainou shitsün jongkuhoi ngo louwan kiu-e, naiuso nungso ajantso singtso goh nai komthiowane. Ngüso ongko chonghoi nouso Ee-Khiamnok nai komthiowane, naiuso aphi hoi nouso Mediteranian khiamnok nai komthiowane. Nung mea nouso tü choi nyame. Ngüsoüh asam tü chhikü shitsün thaiuthako ngo ngüso lomowane.

²¹“Khengtaiu nouso lahat, lüko koikü lümongling, tiautenai APAOU nou asam thaiutha nungso chhi asong chhikiu-iu.

²²Thainian nouso lahat, tiautenai thsanyan nouso sangnyakü; pai nousoüh eiu nou eiukü, naiuso phiushep naiuso sainaoshep saiukü noin.

²³“Zion khaiuniaso, lümongling, APAOU asam Goaüh asam thaiutha, chhi asong chhikiutsün thaiutha lümongling. Apaüh asam hau ah-thsamtsüo tao ah-ou tongtü kiu-iu, Chonga ah-ou nou hongiu naiuso thsanyan nyimtao ah-ou penaili hongiu.

²⁴Tsonyak nyatsün athang nouso chih nou miankü noi-e; naiuso dan nouso theng naiuso olip-khiam nou ngeshikü miane.

²⁵Jongku hoi nou asam chih hethiowan nou ngo laokü kiushi-e. Asam dongai jongku nouso hongshitsün ngo noiküla.

²⁶Lo asamüh heau saiukü eppe, naiuso mongtsame. Asam hau athanga chhi chhikiutsün APAOU, asam Goa, asamüh lomsane. Jü khaiuniaso loto tilaitso tsülochi lotsao shi-e.

²⁷Lo yaküto Israel, ngo asam ongko noin ta asamüh nge-e, naiuso nung ngo APAOU asam Goa noin naiuso amao tsünoishi. Jü khaiuniaso loto tilaitso tsülochi lotsao shi-e.

²⁸“Nungphiai ngo jü Onthso khaiunia pungkü chiai kheplutkiu-e: asam thso melothso naiuso menyiuthso nousoüh jü ngiongem wepenge; petche nousoüh mia miane, naiuso asam oumhoi nousoüh atsangshei eppe.

²⁹Nung taoko ngo jü Onthso tsamki nouso melo menyiu chikü chiai lüko kheplutkiu-e.

³⁰“Maou naiuso goumchi nai nungh ajekhaiu ko ngo alotsüo nouso hane; nungko she lopengtsün, in, naiuso inkhao thengmia nouso noi-e.

³¹APAOU alekkat ajekhaiu asong moshikün khako, aje nou awon tsükiushi-e, naiuso alei nou sheli aseng iula-e.

³²Lüko APAOU tü ahalou sangtsünso chikü kipsane. APAOU nou ngiotsünli, ‘Yirusalem nai noinso ajantso thakhu-e; sauhai ngo chosan ngüso a-sane.’”