Read Khiamniungan Naga Yoel 3 Bible Online

Yoel 3 - Khiamniungan Naga bible

Yoel 3

¹APAOU nou ngioji, “Nung taoko nai ngo Yihudahai naiuso, Yirusalem hai hau akeng aküo nou kiushi-e.

²Ngo mele apem niakamküta ngüso mikhemtsün Tsamei nai nialoukü shi-e. Nungko jü khaiuniaso tü chhitsün apem thaiutha ngüso tü mikheme. Ngüsoüh Israelhai gohmao shingkhannio nouso ai pengpun-in, naiuso jü Israel goumchi paithatlowan.

³Suo nouso sauhaiüh thalou-eko ta ngüsoüh phong dekü khem. Ajisiwop chhi naiuso theng tuhshiu au, alitaiu nou thamanau thaiutha ngüsoüh melothso, naiuso menyiuthso nouso sua au janan.

⁴“Tair hai si Sidon hai naiuso Filistia hai khiamkhan chikü, asamüh ngütü ti chhiau koweji? Ngo chhitaiutsün tso tsak thaiutha asamüh thamshi-e süne? Asam ayang nungti naito, ngo asam hau liukü thamshi-e!

⁵Asamüh jü tang- kason naiuso chaiou lakkeng louwan naiuso, jü memei jengtsaiu nouso asam ün amkham tsam nai kan- thiowan.

⁶Asamüh Yihudahai naiuso Yirusalem hai ngüso shingkhannio ainou laiukü khukü Grik hai hau janthiowan.

⁷Asamüh ngüso janthiowantsün athang nouso ainou ngo niasan shi-e, Asamüh ngüso tü titi chhin nungti ngo asam tü chhi shi-e.

⁸Ngo asam thso melothso naiuso menyiuthso nouso Yihudahai hau janane, naiuso ngüsoüh loüh laiukü nai noitsün Sabi hai hau janshi-e ta Ngo, APAOU nou ngiowaniu.

⁹“Asamüh mele nouso ongko nung lüwelut: ‘Ehli au thaiutha lükhemlou; asam lengsiya nouso lüjon; asam süpaihoi chikü kamlouküta khaai lükhu!

¹⁰Asam kensichap sah au lülang naiuso, paichomsah amon nouso laih au lülang. Tsaosilao hai lüko eh liao noin.

¹¹Asam chenpa mele nouso chikü tsamei nai liukü akamshi.’” O APAOU, ni asüpaiso ngüso tü po-au ahong.

¹²“Mele nouso, Mikhem Tsamei nai kamshiau khemlouau noin. Nungko Ngo APAOU nou, chenpa mele nouso chikü mi kheme.

¹³Ngüso thatü tsümeiting; be-eiuyam taoko chihpai lamthiotsünli ngüso lamthiokü lüwan, theng nou mongeshikün lektso miankü noitsün sainaoshep, noipektsün nai shep noipektsün khekkü ngüso lünoipekkan.”

¹⁴Hengsiheng mikhem tsamei nai noin, nungai APAOU ajekhaiu shakta shi-e.

¹⁵Aje naiuso alei nyakhemkü iula, naiuso loto kianthsüo nousoüh, ngüso awon tsükiushi.

¹⁶Zion king ainou APAOU sangh ahmokli ngemji, Yirusalem ainou apa sangh ahmokli ngemji, naiuso goum naiuso aün saiusaiuji. Lüko apaüh meshen khaiuniaso kiplou-e.

¹⁷“Nungailu Israel, ni Ngo APAOU a-Goa ta nge-e. Ngo jü asio king Zion nai kihji. Yirusalem nung asio noknio tsak noi-e; nung nokmao haiüh loto tilaitso tsüshiohe shi-e.

¹⁸“Nung taoko king nouso sainaoshep eiu nou miane, naiuso king pungkü nai jangtso nouso eppe; naiuso Yihudahai haiungan chikü nai khiam saiukü noi-e. APAOU Amkham Tsam ainou haiu tsak chetsane, naiuso nungüh Akacia Tsamei ta tsapenkiu-e.

¹⁹“Ijip singtso goh tsak hau iula-e, naiuso Edom atheao tsümeikü lotheantsün tsak iula-e, tiautenai ngüsoüh Yihuda goumchi komhean, naiuso aphio tsünoikün khaiunia nouso loatan.

²⁰Ngo aloatpao nouso tü phao shanshi-e; ngo aphio nouso tsüpoitaiu-e. Lüko Yihuda naiuso Yirusalem asaita kihlutkü noi-e, naiuso Ngo APAOU, Zion king nai kih-e.”