Read Khiamniungan Naga Amos 1 Bible Online

Amos 1 - Khiamniungan Naga bible

Amos 1

¹Tekoa noksong ainou onnemok jimtsün Amos ngio nungso noin. Goh haium shiau pon nime khako, tilai Uzzia nung Yihuda nai nokpao noiküla, naiuso Jehoas thso Jeroboam nung Israel nai nokpao noiküla, nung taoko Goa nou Israel thaiutha Amos hau nungso atsangshei kiu:

²Amosüh ngiom, “Zion king ainou APAOU ngaoji; Yirusalem ainou apa sangh ahmokli hongji. Thsanyan nouso wonkü khuwanji, naiuso Karmel king ai noitsün khengliu nouso shei-anji.”

³APAOU nou ngioji, “Damaska khaiuniahoi nousoüh lolokü angei sunlou, nung thaiuthako ngo ngüso hau angja kiuao lu noin. Tiautenai ngüsoüh Gilead hai tü pha pokü tsümeitingkü chhin.

⁴Nungtiphe Hazael Nokpaoüh lataiutsün nokpao tsam chiai ngo in nou honge naiuso Benhadad Nokpao ün ehüpuo nouso ngo jekthiowane.

⁵Ngo Damaska hai noknio bekhan nouso lapekke naiuso Avem Tsamei nai kihtsünso naiuso Betheden nokpao komane. Siria khaiunia nouso Kir hai goumchi ai sua au thaloukü khuwane.”

⁶APAOU nou ngioji, “Gaza khaiuniahoi nousoüh lolokü angei sunlou, nung thaiuthako ngo ngüso hau angja kiuaolu noin. Ngüsoüh melethum kankü khukü Edomhai hau sua au janthiowan.

⁷Nungtiphe ngo Gaza noknio lungpe chiai in honge, naiuso nung noknio ehüpuo nouso jekthiowane.

⁸Ngo Asdod naiuso Askelon noknio nouso ün nokpao lowane. Ngo Ekron noknio hau angja kiu-e, naiuso poitaiukü noitsün Filistia hai apem eane.”

⁹APAOU nou ngioji, “Tair khaiuniahoi nousoüh lolokü angei sunlou, nung thaiutha ko ngo ngüso hau angja kiuaolu noin. Ngüsoüh Edomhai melethum thaloukü kankü khuwan, naiuso ngüsoüh yamke ngiomongshinge taiutsün tsükankei.

¹⁰Nungtiphe ngo Tair hai noknio lungpe nouso chiai in hongkü ehü puo nouso jekthiowane.”

¹¹APAOU nou ngioji, “Edom haiüh lolokü angei sunlou, nung thaiutha ko ngo ngüso hau angja kiuaolu noin.Tiautenai ngüso deisinioso Israel hai tü ngüsoüh sah lokkü komkei, naiuso ngüso hau atsüojinyang tsühan. Ngüso mongmat sungtsün athat tsüyang naiuso ngüso mongmat tilaitso tsüsaiolishi-i.

¹²Nungtiphe ngo Teman hai noknio chiai in hongkü Bozra ehüpuo nouso jekthiowane.”

¹³APAOU nou ngioji, “Ammon khaiunia nousoüh lolokü angei sunlou. Nung thaiutha ko ngo ngüso hau angja kiuaolu noin. Goumchi apia thalouau ngüsoüh ehlitsün taoko Gilead nai pem tsükengkü noitsün menyiuhoi lüko kopekkü chhin.

¹⁴Nungtiphe ngo Rabba noknio lungpe nouso chiai in nou hongkü nungko noitsün ehüpuo nouso jekthiowane. Nungaih ehli taoko ekhong khongkü, ah-ou- ahsheih thatü thsüokü shitsünli eh nou li-e.

¹⁵Nungaih nokpao naiuso apa khemko noitsün asonghoi nouso thaloukü ngüso goumchi ainou kankü khuwane.”