Read Khiamniungan Naga Amos 2 Bible Online

Amos 2 - Khiamniungan Naga bible

Amos 2

¹APAOU nou ngioji, “Moab khaiunia nousoüh lolokü angei sunlou, nung thaiuthako ngo ngüso hau angja kiuaolu noin. Tiautenai ngüsoüh Edom hai nokpao ün uo nouso tsüwesankü luo-au iulakü jekthiowan.

²Ngo Moab hai goh chiai in hongkü Keriot hai ehü-puo nouso jekthiowane. Ehli sangngem naiuso süpaihoi nousoüh wekü jangong- matngem taoko Moab hai nouso ethiowane.

³Ngo Moab hai nokpao naiuso nung goumchi nai ahei nouso chikü loatkü wane.”

⁴APAOU nou ngioji, “Yihuda khaiunia nousoüh lolokü angei sunlou, nung thaiuthako ngo ngüso hau angja kiuaolu noin. Ngüsoüh jü atsande nouso lochi lotsao, naiuso jü athoilut nouso tsükankei. Ngüso pao- siposoüh yathsüokü shitsün yaang goa nousoüh lo ngüso ayam tsüthakü nai nialoukü khuwan.

⁵Nungtiphe ngo Yihuda chiai in hongkü Yiru- salem ehü-puo nouso jekthiowane.”

⁶APAOU nou ngioji, “Israel haiüh lolokü angei sunlou, nung thaiuthako ngo ngüso hau angja kiuaolu noin. Tiautenai ngüsoüh chailaiu tham- shiao tsüshiokünso akausai tsüsun- kün khaiuniahoi naiuso hokkhut nime mai kiuao tsüshiokün tsosilu hoi nouso sua au janthiowan.

⁷Ngüsoüh tsaosilao nouso ngam- thiowanji, naiuso tsosilu nouso tü tsüwesankü kankeiji. Athso nou si apo nou ne nemtso sua menyiuthso tsamki tsak ko lu emkü, jü asio nian nou lochinyanji.

⁸Amkham thang pungkü nai pohaiüh tsosilu hoi ainou chailaiu liko lotsün neshe chiai saiji. Ngüso ko chailaiutsünso ainou lotsün theng ngüsoüh Goa amkham tsamai nai shiuji.

⁹“Külüko, jü khaiuniaso, nung asam thaiutha ko lu cedar pai nousoli laiukü, naiuso lampai nousoli kongkü noitsün Amor hai ngo moisemkü lomokiu.

¹⁰Ngo asam Ijip ainou niasan, pon aopüle liutsa lang yankü niakei, naiuso Amor hai goumchi asam tengkam au kiu.

¹¹Ngo asam thsoso ajantso e-po au, naiuso oum hoi ajantso Nazarite hau chosan. Israel khaiuniaso, nung atsüo tsüdeso? ta Ngo, APAOU nou ngioji.

¹²Lüko asamüh Nazarite hoi hau theng shiu-i, naiuso e-po nousoüh jü ngiongem tsüchite au ngiokhem kiu.

¹³Naiuso lo ngo, asam goh ai thoi-iane, naiuso jangtso nou tenkeitsün tsamkei nou chih nou lekü kan nai ngemtsünli asam ngete.

¹⁴Akhaolaoting nou lüko thakhuau tsüshio-e, naiuso oukong khaiunia nouso oukong lüko mowane, naiuso süpaihoi nousoüh meshen aa lüko kipsan louau tsüshio-e.

¹⁵Uokop pai semtsünso lüko tsakü noiau tsüshio- e, akhaolaoting mokthso chiai moknoitsün khaiunia nouso lüko ngüso aa kipsanlouau tsüshio-e.

¹⁶Nungh ajekhaiu ko nai mongnyanting süpai nouso ngüso dun letaiuküta jingkü khuwane,” ta APAOU nou ngiowaniu.