Read Khiamniungan Naga Amos 4 Bible Online

Amos 4 - Khiamniungan Naga bible

Amos 4

¹Asam Samaria menyiu hoiso, asam Bashan haiüh tsadsantsün jangtso nousoli tsakeikü noitsünso, asamüh tsaosilao hai thang thiowanji, tsosilu hai thangmangji, naiuso asamüh asam tsammongposo tü asam hau theng senlutkü anoi ta saotsünso nung anglu!

²Akhengting asio APAOU nou thaloutsünli, “Asam ngoutaison nou khuolokü khuwanau ajekhaiu nouso shi-e; asam khaiunia pungkü ngoutaison nou ngou tsak khuolotsün khekkü noi-e.

³Asam thaloukü dioai satkü noitsün ashimting nai tenloukü shiküta yakshi-ane.”

⁴Akhengting APAOU nou ngioji, “Israel khaiuniaso, asamüh chhikü lu the-e tünaito, Bethel asiothang nai lükhu küta angei lüchhi! Gilgal ai lükhu naiuso asam oukong chikü nou angei lüchhi! Ahom tsütokü aloat chaithio au thainian nouso kankü ashi, naiuso samnyap nou pungkü apa ekwe kankü ashi.

⁵Asam themtsai Goa hau nianlomkiu chaithio kiulutkü lünoi, naiuso asamüh apoisan chaithio kankü shitsün thaiutha koikü lüpumde! Tiautenai asamüh nungtin chhiau aiujiphe.

⁶“Asam noknio nouso chikü dongai naiusile kankü shitsün nung ngo, külüko asam jü dongai laokü tsüshi.

⁷Tilai asam chihsam khiamsamsoüh ah-ou thatü pokü noitsün tao ngo lolaokü wan. Ngo noknio tsak chiai ah-ou nou hong, lüko amao tsak dongai to tsühong. Ah-ou nou eiu tsak chiai oulut, lüko amao eiu tsak nouto wai-an.

⁸Khiamle nou thajeiankü noknio ajantso, noknio ajantso ai khiam epao yangkü noknio tsakai khu, lüko nungkoüh ashiuao saiukü tsüep. Nungti lüko asam jü dongai laokü tsüshi.

⁹“Asam chihsam khiamsam wonkü khuwanao ngo ajekting ahsheih tsak hong. Jongku nousoüh asam aimong nouso, sainaoshep eiu nouso, phiu-pai nouso, naiuso Olip pai nouso apem heankhem. Nungti lüko asam jü dongai laokü tsüshi.

¹⁰“Ngo Ijip nai hongtsün khekkü imkia tsak asam dongai hong. Asam oum khaiuniahoi nouso ngo ehli nai loatkü wan, naiuso asam mokthso nouso kankü khuwan. Asam saothang nai ngo meachoi nyam nou asam ngan mian-i. Nungti lüko asam jüdongai laokü tsüshi.

¹¹“Sodom naiuso Gomorra lotheantsünli ngo asam ajantso lotheaniu. Asam sauhai aasan, ngüso to in ainou inchan taishitsün ajahpai tsak khekkü noiküla. Nungti lüko loüh asam jüdongai laokü tsüshi ta APAOU nou ngioji.”

¹²Nungtiphe “Israel khaiuniaso, ngo asam hau angja kiuao noin, naiuso ngo ni tü nungti chhiau noi nou shioko jü mikhem ko phete au asam khemloukü lünoi!”

¹³King nouso naiuso ahsheih nouso Goa nou shan. Apaüh yangtsünso apaüh khaiunia hau nge-iji; apaüh anyi nou asoh hau li-eji. Goumchi atsokting nouso chiai apa tsakeiji. Apa nian: APAOU Goa Akongting noin!