Read Khiamniungan Naga Amos 5 Bible Online

Amos 5 - Khiamniungan Naga bible

Amos 5

¹Israel khaiuniaso, ngo asam chiai meashap jih hangluttsün tü anglu:

²Asangting menyiu Israel loianiu, apa loto tilaitso tsüchu shi-e! Apa goh ai aodangkü le-an, naiuso apa tentsaau sau tsünoi.

³Akhengting APAOU nou ngioji, “Israel nai noknio tsaküh süpai hoi heng tsak hongpeng, lüko tsom tsaklu laokü yashin, amao noknio tsaküh süpai tsom tsak hongpeng, lüko che lu laokü yashin.”

⁴APAOU nou Israel khaiuniaso tü ngioji, “Jüdongai ashi, naiuso asam aa noi-e.

⁵Amkham au Bersheba nai lakhu. Ngü Bethel nai epao lakowe- Bethel nung ti tsü-iula-e, Gilgal nai lakhu- tiautenai nung khaiuniahoi thaloukü khuwanaulu noin.”

⁶APAOU dongai lükhu, naiuso asam aa noi-e. Asam tsükhukü naito, Israel khaiuniaso chiai apa in khekkü sao-e. Nung in nou Bethel khaiuniahoi jekthiowane, naiuso sau khaiuniaüh nung in lonyatau tsüshio-e.

⁷Asam ngiotsüo nou tsütsüokü hau iula-itsün khaiunia- hoi nou ngüsoüh epao noitsün tsüepikü kausaiattsünso inyate!

⁸APAOU nou Pleiades naiuso Orion kianthsüo nouso shan, Apaüh anyakhem nou anyi hau iula-iji, naiuso anyi nou asoh iula-iji. Apaüh khiamnok khiam nouso kamshi-iküta nungso goumchi nou tü thsalutkiuji. Apa nian APAOU noin.

⁹Apaüh oukong nouso naiuso ngüso ehüpuo nouso chiai alothe kankü shiji.

¹⁰Asam ngiotsüo tsüdekün tü khengshitsünso, mikhemthang nai khakhakü chitetsünso tü chinyanji.

¹¹Asamüh tsosilu hai thangmang naiuso ngüso khülam kaulouwan. Nungtiphe asamüh lungtsam amei lahtsün nai asam tsükih-e, tsüde- künai sainaoshep eiu thatü meikü a-taiutsün ainou theng tsüshiu-e.

¹²Asamüh angei sunhetsün naiuso ngiokhem lothetsün ti chantso nung ngo ngeji. Asamüh khaiunia ameihoi jeiat-iji, nekhem paopei nou louji, naiuso tsosilu haiüh epau noitsün ayam nouko tsüepiji.

¹³Nungtiphe sauhai nungtin atao tsümeikünko nyankü noianji, nung ayangloutsün chhi amei tsak noin.!

¹⁴Asam aa noiau ti tsümei nung tsüde, lüko ayamtha nou ti noin nung chhiau ayang lünoi. Nungaito Akongting APAOU Goa nou asamüh ngiotsünli atsüoting asam ko hakü noi-e.

¹⁵Ti tsümei nung lüchinyan, ti amei nung lütsüojin, naiuso mikhem noikham nai ngiotsüo nou shiolouau lükowe. Tsüngean nung mele apoitaiu khaiunia nouso tü APAOU nou atsüojinyang noi-e sao.

¹⁶Nungtiphe Akhengting APAOU nou ngioji, “Noknio sonkeng nai mongsaiukü shaptsün noi-e. Sauhai amongsaiu au amai kiuwankü taium, nungso ko hakü eiu-a khaiunia nouso lüko mongsaiu ha-e.

¹⁷Sainaoshep eiu apem nai amongsaiutsün noi-e. Nung chikü ngo asam hau angja kiu au noitsün shioko thawao-e” ta APAOU nou ngiowaniu.

¹⁸Asam APAOU ajekhaiu tü mong- pikü yangkü taiutsünso thaiutha inyate! Nung ajekhaiu asam thaiutha ti khekkü noi-e! Nung ajekhaiu asam thaiutha awon tsüdekü anyakhem noi-e.

¹⁹Nung ajekhaiu khaiunia tsak chongkhao ainou khulükhun lüko, shap tsak phete-iushitsün khekkü noi-e! Tsüdekünai khaiunia tsak apa tsamai shiküta dio ai nou tü than nai pao tsak nou haiutsün khekkü noi-e!

²⁰APAOU ajekhaiu nou awon tsüdekü anyakhem kankü shi-e, nung ajekhaiu nyakhemkü lu noi-e.

²¹APAOU nou ngioji, “Ngo asam ün donyam sümai nouso chinyanji; ngo nungso jeiao tsüshio.

²²Tilai asamüh ngü hau ajah chaithio naiuso eheshiu chaithio nouso kankü shi-e, ngo nungso tsülou-e.

²³Asam jihang sangngem alaowan, ngo asam poipoi ngem tü ang-au tsümongchio.

²⁴Nunglikoto ngiotsüo nou haiungan tsak khekkü atsang-i, naiuso tilaitso tsüapkün haiu tsak khekkü asio nou atsang-i.

²⁵“Israel khaiuniaso, ngo asam liutsa nai pon aopüle niakei taoko aloat chaithio naiuso eheshiu chaithio nouso ngo asam tü tsüsao.

²⁶Lüko lo, asam nokpao sotsom goa Sakkut, naiuso asam ün kianthsüo goa Kaiwan, sübao asamüh amkham nungso asamüh pi-au noin.

²⁷Nungtiphe asam Damaska yankü goumchi tsak ai thaloukü khuwani-e,” ta APAOU Akongting Goa nou ngioji.