Read Khiamniungan Naga Amos 6 Bible Online

Amos 6 - Khiamniungan Naga bible

Amos 6

¹Asam Zion nai tsüomeikü kihtsünso naiuso Samaria nai aalokü noitsünso khaiuniahoi nou ahalou-iau khutsünso, naiuso asam Israel mele nai asong khaiunia nouso thaiutha inyate!

²Khukü Kalne noknio tü lüthap. Nung ainou Hamat noknio asong dongai lükhu, naiuso nungthanko Filistia nai Gat noknio ai lüsao. Nungso Yihudahai naiuso Israelhai nokshing nouso tü meijing süne? Ngüso goh haoson asam haoson tü songtso süne?

³Aküothe ajekhaiu nou shiji ta ngiotsün tü asamüh ah, ta thalouau tsümong- chio, lüko asam chhisiya tsangkü nung ajekhaiu shimkü kanjikanji.

⁴Chaiou then nouso chiai saiau aiutsün naiuso jangtso si onnemok thso nyih hekü sümaihetsünso thaiutha inyate!

⁵Davidüh jihang nouso shansantsünli asamüh lüko shansanau aiuji, naiuso nungso kokiang nai khongkü hangau aiuji.

⁶Asamüh theng chiukao meankü shiuji, naiuso angannyam ameiting nou kankeiji, lüko Israel lotheantsün thaiutha to asam tsümongsaiu.

⁷Nungtiphe asam chongtingau thekü thaloukü khuwan-e. Asam sümai naiuso hoitsokam nouso yankü khuwane.

⁸Akhengting APAOU nou nung ngiomong shingkü lotsüokü ngioji. “Ngo Israel khaiunia bülomtsün chinyanji.Ngo ngüso noknio ateng naiuso nungko noitsün alum sunkü ehoi hau kiu-e.”

⁹Tsamkhaiu tsak ko khaiunia che poikü noi nai, ngüso eane.

¹⁰Ean nou tsammong ongko sauüh nung meakhantaiu chhisiya thsale loji, apaüh nung ee mea tsam ainou kengchiai kankü shi-e. Nung khaiunia noulu tsamai sauhai poitaim ngüso tü jonkü ngio-e, “Nungai niko hakü amao noishimo?” Nungaih sangh tsaküh “Tsünoi- shi!” ta thalakü ngio-e. Nungaih nung tsammong nou ngio-e, nyankü anoi! Samüh APAOU nian tsüjonsanau noin.

¹¹Tilai APAOU nou ngiokhem nouso kiu-e, tsamnio si tsamthso nouso lüko nelangkü thiopekkane.

¹²Mokthso nouso lung nouso chiai jingau shio-e süne? Khaiunia nou jangtsopong lokü khiamnok khutpekkau shio-e süne? Külüko asamüh ngiotsüo nou she au iula-i, naiuso ayamtha nou tsüthakü hau iula-iji.

¹³Lodebar hai noksong thaloutsün thaiutha asam bülomkü bümji. “Karnain thalouau asam oukong saiusioumkü noiküla,” ta asam bülomji.

¹⁴Akongting APAOU Goa nou ngioji, “Israel khaiuniaso, ngo asam goumchi thalouküta kihlouwanau gohmao süpaihoi tsak hongji. Ngüsoüh asam ajenapki Hamat Aoyan ainou ajepekki Araba haiutso saokü thangmang-e.”