Read Khiamniungan Naga Amos 7 Bible Online

Amos 7 - Khiamniungan Naga bible

Amos 7

¹Akhengting APAOU ainou ngo atsangshei tsak ep. Nungko Nokpao ün haoson tsokap nou lamlouwankütün phiai jongkuhoi asong tsak sungi naiuso nungko tsosun nyimsanau yachushikü noi taoko jongku hoi asong tsak APAOU nou sungitsün atsangshei ngo ep.

²Ngü eptsün atsangshei nouko goumchi nai thsanyan asangnya apem jongku hoi nousoüh hean, nungaih ngo ngiom, “Akhengting APAOU, akhaiuniaso hau awankiu! Ngüso titi aasane? Ngüso thatü hen naiuso tsaosilaokü noin!”

³APAOU nou apa mongyang li-eshikü ngiom, “Ni epkü shitsün nung tsüthawao-e.”

⁴Akhengting APAOU ainou ngo loüh amao atsangshei tsak epshi. Nungh atsangshei nouko APAOU nou apa khaiuniaso in nou angjakiuau khemloutsün ngo ep. Nung in nou goh kheiai khiamnok asong nou chethe-an, küta goh nou lüko chetheanau yachu.

⁵Nungaih ngo ngiom, “Akhengting APAOU, Alaolo! Akhaiuniaso titi aasane? Ngüso thatü hen naiuso tsaosilaokü noin!”

⁶APAOU nou loüh apa mongyang li-eshikü ngiom, “Ni epkü shitsün nung lüko tsüthawao-e.”

⁷Ngo loüh APAOU ainou atsangshei tsak epshi. Nung atsangshei nouko athat auo nou thatkü lahtsün dioai phiko ngo apa tsanoikü ep; naiuso apa phako athattsün auo nou tsak semkü noiküla.

⁸Apaüh ngü tü sang, “Amos, ni ti epji?” Ngo thalakü ngiom, “Athattsün auo tsak epji.” Nungaih apaüh ngiom, “Jü khaiuniaso nung athat chiai sheikü noitsün dioai tsak khekkü noin ta hanau ngo nung kankeiji. Ngüso angja kiuao nou thaiutha loto ngo jümong tsüli-eshi-e.

⁹Isak thsaosithsoüh amkhamkü noitsün athang nouso lothean-e. Israel hai ün asiothang nouso thathekü lean-e, Naiuso Jeroboam Nokpao lingkü shitsün ngo lothonan-e.”

¹⁰Bethel hai meson Amaziaüh Israel hai Nokpao Jeroboam dongai nung hong: “Khaiuniahoi ongko Amosüh ni thako mongthat tsümeikü thatji. Apaüh chitetsün ngio nousoüh shingkhannio nou lotheane.

¹¹Apaüh nungti ngioji: ‘Jeroboam Nokpao nung ehli nai loatane, naiuso Israel khaiunia nouso ngüso goumchi ainou thaloukü khuwane.’”

¹²Loüh Amaziaüh Amos tü ngiom, “E-po, nungüh saiuwaniu! Yihuda goumchi ai laokü khukü ni nungai lüchim. Nung thaiutha ni hau amai nou ngüso hau lükiu-i.

¹³Loto Bethel nai khapiam ngio langioshi. Tiautenai nung Nokpao ün amkham athang, mele amkham tsam noin.”

¹⁴Amosüh thalakü ngiom, “Ngo amaihe khapiam ngiotsün e-po tsüde. Ngo thainian paotsangtsün tsak noin, naiuso ngo phiu-pai nouso tü paotsangji.

¹⁵Lüko APAOU nou ngü onnemok jimtsün chhi ainou nialou küta apa khaiunia Israel tü khapiam ngio ngioau lükhu ta hong.

¹⁶Nungtiphe lo APAOU nou ngiotsün anglu: Ni ngü tü khapiam ngiotsün alaowan, naiuso Israel khaiunia nouso thako lawelutshi ta ngioji.

¹⁷Nungtiphe Amazia, APAOU nou ni tü ngioji, ‘Atsammongnyiu sonkeng nai ajisiwop chhitsün tsak iula-e, naiuso athsoso ehli nai loatkü wane. Agoumchi paithatane, küta amaohai hau kiuwane, naiuso apim lüko goa tsüngekünso goumchi ai eane. Naiuso Israel khaiunia nouso meshen goh ainou megoh ai thaloukü khuwane.’”