Read Khiamniungan Naga Amos 8 Bible Online

Amos 8 - Khiamniungan Naga bible

Amos 8

¹Akhengting APAOU ainou ngo loüh atsangshei tsak ep. Nung atsangshei nouko shepkim tsak noiküla.

²APAOU nou sangkü ngiom, “Amos, ni ti epji?” Ngo thalakü ngiom, “Shep naptsün kim tsak epji.” APAOU nou ngü tü ngiom, “Jü khaiunia Israel thaiutha athon shikü noin. Loto ngüso angja kiuao thaiutha jümongyang tsüli-eshi-e.

³Nung ajekhaiu ko nai nokpao tsamai jih hangtsün nung mongsaiukü shaptsün sangau iula-e. Nungko ee mea nouso athang apemai noi-e. Nungsoh tsüsingiokü nyankü yakkane.”

⁴Asam angjahoi ngamthiowan- tsün naiuso shingkhannio nai tsaosilao hai lomoau kowetsünso nung anglu:

⁵Asamüh asam chija ngioji, “Samüh sam chihsikhiam janlouau asio ajekhaiu nouso tilailu tsüyanlükhunanikü taiuji. Samüh chaijan tsaloushiau Yihuda Anounyi nou tilai thone? Nungaito samüh amai phopkü saokü, yaang tsoithat thatkü, samko tuh au shitsünso tü kausaikü chhiau shio-e.

⁶Samüh whet tso akeng nou chai piakü he janau shio-e.Samüh tsosiluhai apa chailaiu thamshiau tsüshiokün, naiuso hokkhut tuh luaotso tsüshiokün tü yamlükhun küta apa sam sua au tuhlou-e.”

⁷APAOU, Israel Goa nou ngiomongshingkü ngio-iu, “Ngo ngüso tsümeikün chhisiya nouso tilaitso tsübeane.

⁸Goum nou haiu haiu-e, naiuso nungh goh nai kihtsün khaiunia pungkü ayangelat nai noi-e. Shingkhannio athum nou saiu saiu-e, nungh Nail Haiu asung asao ta haiukeitsün khekkü noi-e.

⁹Aje nou anyiwem napani-au naiuso goum nou anyi tao nyakhemani-au atao nou shiji ta Ngo Akhengting APAOU nou ngiowaniu.

¹⁰Ngo asam sümai nouso ehpungetsün atao au, naiuso asam amongling jih hang nouso mongkiakü shapau iula-i-e. Ngo asam khaiu iuwanikü nethe tenkü meshen thsosa ean taoko posinyiu mongsaiutsün khekkü iula-i-e. Nungh ajekhaiu nou athon saokü khosakkü noi-e.

¹¹“Ngo goumchi nai naiusile tsak hongau atao nou shiji. Khaiuniahoi nou tü naiu-e, lüko chih naiu tsüde, ngüso tü le-e, lüko khiam nou letsün tsüde. Ngüso nung APAOU ainou Ngio thaiutha naiusile-e, ta Ngo, Akhengting APAOU nou ngioji.

¹²Khaiuniahoi nouso Khiamnok ainou khiamnok saokü, naiuso ajenapki ainou ajepek saokü tsakei-e. Ngüsoüh APAOU ainou ngiongem tü alumai yame, lüko ngüsoüh nungh tsüeppe.

¹³Nungh ajekhaiu ko oukongkü noitsün pühe si mesohoi lüko a-le nou loithiowane.

¹⁴Sauhaiüh ‘Dan hai goa’, tsüdekünai ‘Bersheba hai goa nianko’ ta Samaria hai sotsom goa nouso nianko ngiomong shingkü ngioji, nung khaiunia nouso loiane naiuso müjam tsüchushi-e.”