Read Khiamniungan Naga Amos 9 Bible Online

Amos 9 - Khiamniungan Naga bible

Amos 9

¹APAOU nou amthang dongko tsataiukü ngo ep. Apaüh ngiokhem kiukü ngiom, tsamthum haiuhaiu-iau amkham tsam kheam- khaiu nouso tü thsüokü lüthio. “Nungso thiopek küta khaiuniahoi nouso khaiu nai lüsalut-i. Naiuso apoi nouso ngo ehli nai loatkü wane, nungko saulünou tsüthakhu-e.

²Ngüsoüh ngüso yam eanhai goumchi ai saokü yamthio lüko, ngo ngüso thalou-e. Ngüso aün ai sungan lüko, ngo ngüso ten-ikü wane.

³Ngüso Karmel kingchong nai pamlou lüko, ngo ngüso tü yame naiuso ngüso thalou-e. Khiamnok athanting nai ngüso ngü ainou pamkü noilüko, ngo khiam thainian nouso ta ngüso tü jeiao ngio-e.

⁴Ngüso ehso tsangkü ngüso thaloukü khuwan nai, ngo ngüso loatkü wanau ngiokhem kiu-e. Ngo ngüso ahalouau tsüdekü ngüso lomowanaubao yanglouwaniu.”

⁵Akhengting APAOU nou goumchi nou tü thanji, naiuso nung haiuhaiuji; nungko noitsün chikü mongsaiuji. Nail Haiu khekkü goumchi athum asung asao ta lemlemji.

⁶APAOU nou apa tsam aün nouso ai lahji, naiuso goum nou chiai athanya nou shantaiuji. Apaüh khiamnok nouso jonkamji, küta nungso goum nou da thsalutji. Apa nian APAOU noin!

⁷APAOU nou ngioji, “Israel khaiuniaso, ngo Sudan hai tü yangtsünli ni tü lüko yangji. Ngo asam Ijip ainou niasantsünli, Filistia hai Kret ainou, naiuso Siria hai Kir ainou, ta nialoukü shin.

⁸Ngo Akhengting APAOU nou Israel angei nokshing tü thapji, naiuso ngo nung goumchi ainou lomokü wane. Lüko ngo Yakob thsaosithsoso apem to tsülomo-e.

⁹“Israel khaiunia nouso tsop nai chih nyaotsün khekkü saiukü nyaoau ngiokhem kiu-e. Atheau tsünoikünso singanau ngo mele nouso ong ainou Israel hai tü saiukei-e.

¹⁰‘Goa nou sam dongai to ti angja tsüshi-i-e ta ngiotsünso chikü jü khaiuniaso ong ainou angeihoi nou ehli nai loatkü wane.’”

¹¹APAOU nou ngioji, “Loithioküta nyiankü noitsün tsam tsak khekkü David nokshing ngo shanshiau nung ajekhaiu tsak shiji. Ngo nung dioai nouso piamkü nai noikü shitsünli lomeikü shanshi-e.

¹²Nungtiphe Israel khaiunia, poikü noitsün Edom hai goumchi sübao ataojam ngü nou noiküla, nung mele nouso apem shiolou-e, ta nung athawao-iau noitsün APAOU nou ngioji.”

¹³“Be-eiuyam tao mosaokün khako chih nou liukü nyananau, naiuso theng shanau atao mosaokün khako sainaoshep nou liukü eiusanau, ajekhaiu nou shiji,” ta APAOU nou ngioji. “King asong nousoüh theng anyating chani-e; naiuso choi nouso chikü chiai nung tsangkü sao-e.

¹⁴Ngo jü khaiuniaso ngüso gohthangai laokü niajikan-e. Nungko ngüso ün lotheankü noitsün noknio nouso shanshiküta kih-e. Ngüsoüh ai nouso ai-e, naiuso nungko sungtsün pai-eiu nouso he-e.

¹⁵Ngo jü khaiuniaso ngüso hau kiutaiutsün gohthang nai thome, naiuso loto ngüso müjam tsüseksanshi-e” ta APAOU Goa nou ngiowaniu.