Read Khiamniungan Naga Obadia 1 Bible Online

Obadia 1 - Khiamniungan Naga bible

Obadia 1

¹Edom hai thaiutha Akhengting APAOU nou Obadia tsangkü kiutsün khapiam ngio nung noin. “Lükhemlou! Edom haiko ehli au khuko!” ta APAOU nou apa ngiongem kankü mele nouso dongai hongtsün, samüh lula-iu.

²APAOU nou Edomhai tü ngioji, “Ngo ni outsükongkü iula-i-e, khaiunia pungkü nou ni lochi lotsao-e.

³Ni bülomtsün nou ni sapthio-iu. Anoknio lung nou pejeikü noin, atsam king nai shantaim, naiuso ni ‘Sauüh ngü teniau shio-e?’ ta ngioji.

⁴Ni atsam kianthsüo ongai letche apli tsokkü shankü noilüko, külüko ngo ni tenikü wane.

⁵“Tilai asoh kao nouso shiji, ngüsoüh ti mongchioji nunglu ngüsoüh louji. Tilai khaiuniahoi nousoüh sainaoshep lokamji, ngüsoüh asaita thsaokülu poianji. Lüko a-ehsoühto ni moisemkü lomowane.

⁶Esau thsaosithsoso tengkam kamheaniu.

⁷Ni ko nokmei noitsünsoüh ni sapthio-iu; ngüsoüh ni agoumchi ainou komshi-aniu. Ni ko nokmei noitsünsoüh ni lo shiolouwaniu. Ni ko heshiutsün haimeisoüh ni thalouau jin tsak jintaiu-iu. ‘Apa da akausai noitsün chikü tiai?’ ta athaiutha ngüsoüh ngioji.

⁸“Oh Edomhai hau angja kiutsün ajekhaiu ko, apa ün ange amon nouso lomo kiu-e, naiuso ngüso mongthat mongsai apem moisemkü mowani-e.

⁹Teman hai ehli khaiuniahoi nouso lekkate, naiuso Edom nai noitsün süpaihoi apem loatkü wane.

¹⁰“Tiautenai asam deisinio Yakob thsaosithsoso asamüh kauatkü loatphe, amiam nou ni kappokke naiuso asaita hau thaiutha ni lomowane.

¹¹Ehoi nousoüh ngüso bekhan lotheantsün ajekhaiu ko ni soiloukü tsa-an. Yirusalem jengtsaiu kankü khuwan küta ngüso mongko janthatloutsün mesanhoi tsümeikü noitsün.

¹²Yihuda nai adeisinioso aküo tsümeikü lothetsün tü ni tsünyaikiuao noiküla. Ngüso mowantsün ajekhaiu ko ni tsümonglingau noiküla. Ngüso angja taoko nai ni ngüso tü tsünyailutau noiküla.

¹³Omhetsün tü monglingau naiuso aküothe ajekhaiu nai ngüso ün memei jengtsaiu nouso lowanau, jü khaiuniaso noknio ai ni tsünapau noiküla.

¹⁴Akhulükhunau kowetsünso thalouau ni yamjung nouso ai tsütsaau meiküla. Ngüso angja ajekhaiu nouko nai, ni ehoi nouso hau ngüso tsükiuwanau meiküla.

¹⁵“Ngo APAOU nou mele nouso chikü mi khemau ajekhaiu nou shimkü noin. Edomhai ni ti chhin nung ni tü chhishi-e. Ni ti kiutaim nung ni laokü epshi-e.

¹⁶Jü asio king chiai jü khaiuniasoüh akhosak angja thengkam tsak shiu-iu. Lüko loüh aya nou tü tekkü akhosak angja thengkam chenpa mele nouso chikü nou shiu-e; ngüsoüh nung shiukhem küta ngüso mowane.

¹⁷Lüko Zion king nai ajantso thakhu-e, naiuso nungh asiothang tsak noi-e. Naiuso Yakob kau nou nung gohthang ngüso haoson tengkam eppe.

¹⁸Yakob naiuso Yosep khaiuniaso in khekkü noi-e; in nou chihkhaiudong nyaiheantsün khekkü, ngüsoüh Esau khaiuniaso lomowane. Esau thsaosithsoso tsaktso tsü aasane ta, Ngo APAOU nou ngiowaniu.

¹⁹“Yihuda ajepekki ainou khaiuniahoi nousoüh Edom thalou-e, ajenap kinghok khaiunia nousoüh Filistia hai shiolou-e; Israel khaiunia nousoüh Efraim naiuso Samaria goh haoson thalou-e. Benjamin khaiunia nousoüh Gilead gohthang thalou-e.

²⁰Ajenapki Israel ainou thaloukü khuwantsün süpaihoi nouso, laokü yashiküta ajenapki Zarefat saokü Foinicia shiolou-e. Yirusalem ainou thaloukü khuwantsünso sauhai Sardis ai noin, ngüsoüh Yihuda ajepekki nai noitsün noksong nouso shiolou-e.

²¹Yirusalem ai noitsün khaiuniahoi nousoüh Edom shiolouküta nung chiai nokshing-e. Naiuso nungko APAOU apa pem Nokpao noi-e.”