Read Khiamniungan Naga Yona 1 Bible Online

Yona 1 - Khiamniungan Naga bible

Yona 1

¹Nyitso APAOU nou Amittai thso Yona tü,

²“Nineve noknio asong ai lükhu, küta nung noknio thako wekü lüngio; tiautenai nung noknio ko noitsün khaiunia nousoüh tsümeikü chhitsün jüdongai sungngoi-iu” ta chitekü ngiom.

³Lüko Yona, APAOU ainou khulükhunau yam mao ai tsaloukü khuwan. Apa Joppa ai saonai, nungko Spain ai khuau kheng tsak ep, naiuso kheng mai kiukü, APAOU ainou khulükhunkü noiau, apa khaiuniahoi nouso ongko noilou.

⁴Lüko APAOU nou khiamnok nai ah-ou-ahsheih asongting tsak hong, naiuso nung ah-ou-ahsheih thatü thsüophe kheng nou pai-anau chomkü iulakü noiküla.

⁵Kheng niatsünso lekkatkü khaiunia pungkü nou momo goa tü ahalouau thaiutha wekü jonau ngiom. Nungaih kheng intso lohekkü iula au thaiutha ngüsoüh akantsün jengtsaiu nouso khiamnok nai yakthiowan. Nungtaoko Yona to khengthan nai niongao chiikü saikü noiküla.

⁶Nungaih kheng niakeitsün ahei nou apa nungko epkü ngiom, “Ni nungko sainoikü ti chhiji? Achu küta a goa tü ahachu thaiutha misao lüsao. Tsüngean, apaüh sam tü tsüojinyangkiukü sam kipsanau shiom.”

⁷Kheng niatsünso tsaküh tsak tü sangkü ngiom, “Sam nung angja nai naptsün sau aphio tsangkü ta epsanau samüh phong deko.” Ngüsoüh phong de nai Yona nian sungkü noiküla.

⁸Nungtiphe ngüsoüh apa tü ngiom, “Naito lo, nung sam hau achite! Nung thaiutha aphio nou sauüh lou-e? Ni nungko ti chhiji? Ni ti sübao shingkhannio ainou shikü noin? Ni ti mele hai?”

⁹Yonaüh thalakü ngiom, “Ngo Ibri hai tsak noin.” “Goum naiuso khiamnok shantsün aün Goa, APAOU nou tü ngo amkhamji.”

¹⁰Yonaüh ngüso hau apa APAOU ainou khulükhunanji ta chite. Nungaih kheng niatsünso lekkat- kü apa tü ngiom, “Nung chhisiya ahat au nou chhi noin!”

¹¹Nung taoko ah-ou-ahsheih thatü thsüojikan, nungtiphe kheng niatsünsoüh apa tü sangkü ngiom, “Nung ah-ou-ahsheih lolao au samüh nia tü ti achhi ta?”

¹²Yonaüh thalakü ngiom, “Ngü khiamnok nai ayakthiowan, nungaito ah-ou-ahsheih nou tsamloukü shi-e. Nung athsüoting ah-ou-ahsheih asam tü thawaotsün jü aphio noin ta ngo ngeji.”

¹³Nungliko, kheng niatsünsoüh ngüso oukong apemüh kheng nou haiukuk nai niakü shiau kowe. Lüko ah-ou-ahsheih nou loüh tekkü thsüo thsüokü iulawan, naiuso ngüso tiai khushiau tsüshio.

¹⁴Nungtiphe ngüsoüh APAOU tü wekü ngiom, “O, APAOU, nung khaiunia aa nou thaiutha ko sam aa nou lalomowankiu ta samüh ni tü misaoji! Oh, APAOU, nung chhi chikü thaiutha ni thsale noin; nung ni chhitsün noin.”

¹⁵Nungaih ngüsoüh Yona thalouküta khiamnok nai yakthiowan, naiuso jamaolu nung ah-ou-ahsheih nou tsamkü iula.

¹⁶Nung chhi tsangkü kheng niatsünso APAOU lün thatü hatkü iula, naiuso ngüsoüh aloat chaithio nouso kiukü apa yathsüoau thalou.

¹⁷APAOU ngiokhem tsangkü ngou asong tsaküh Yona laiuloukü mioli kü wan, naiuso nung ngou thaimongai apa samnyi naiuso samsoh noiküla.