Read Khiamniungan Naga Haove 10 Bible Online

Haove 10 - Khiamniungan Naga bible

Haove 10

¹APAOU nou Mosa tü ngiom,

²“Khaiuniahoi jonkamau naiuso asaothang nouso laopengao thaiutha welutao tangkason nou langtsün poipoi nime lüshan.

³Tilai poipoi nime nou thalaiukü mate, hoikam athum Ngo noitsün Nejenkhio koukhan dongko ni lemkü kamshi-e.

⁴Lüko tilai poipoi tsaklu mate, naito kau pungkü ainou aheihoi lu ni lemkü kamshi-e.

⁵Tilai nung poipoi atao leletkü mate, ajepek nai saotaiu nouso kau hoi tsalo-e.

⁶Tilai atao müjam nung poipoi letletkülu mate, ajepekki nai saotaiu nouso kau hoi tsalo-e. Nungtiphe atao letletkü mattsün sang nou to asaothang laopenganao noi-e.

⁷Lüko hoikam athum kamshi-iao naito atao laiukü matau noin.

⁸Nung poipoi nouso mesonhoi Aron thsosoüh mat au noin.” “Nung ashiao noitsün atao apem thaiutha kankeiau don yam ngiokhem nouso noin.

⁹Tilai asam meshen goumchi mongko ehli noi-e, niko li au shitsün ainou ni achija soloau noitsün ko ehlitsün thaiutha ii hanao nung poipoi mat au noin. Ngo, APAOU, asam Goa nou asam ehoi ainou kipsane.

¹⁰Naiuso loüh amongling tao-alei yan sümai taoko, naiuso amao don yam sümai nouso taoko asamüh tilai ajahtsün chaithio naiuso aalo chaithio kiu-e, nung taoko nung poipoi nouso mat ao noin. Nungai Ngo asam hachu-e. Ngo, APAOU, asam Goa noin.”

¹¹Nepon nouko alei nime ajekhaiu eknime nouko Israel haiüh Ijip wankü khuküta, APAOU noitsün Nejenkhio khütha ainou thengmia nou soian,

¹²küta Sinai liutsa ainou Israel hai ngüso süme tsalo. Nung thengmia nou Paran liutsa nai saokü noi.

¹³Ngüso Mosa tsangkü APAOU nou thoiluttsünli tsalokü khu,

¹⁴ngüso tsalotsün tao pungkü nai alingthat taiutsünli nouko khukü noiküla. Chongting nai Yihuda kau ngüso nisan khemko tsalokü khu, hoihoi lingkü, Aminadab thso Nashonüh heikü khu.

¹⁵Isakar kau mongko Zuar thso Nethanel ahei noiküla,

¹⁶Zebulun kau mongko Helon thso Eliab ahei noiküla.

¹⁷Amkham Nejenkhio nou laopeng küta, Gershon naiuso Merari kau nou nung pilokü khu.

¹⁸Nungthanko, Shedeur thso Elizurüh niakü Reuben kau asaothang nisan ko hoihoi ta tsalo.

¹⁹Zurishadai thso Shelumiel nung Simeon kau ongai nou ahei noiküla,

²⁰Gad kau ongai Deuel thso Eliasap nung ahei noiküla.

²¹Nungthanko Kohat kau Levi hai asio jengtsaiu nouso kankü tsalo. Ngüso nungthan asaothang tsaloshi- tsün shisao naito, Nejenkhio nou loüh lahshanankü noiküla.

²²Nungthanko Amihud thso Elishamaüh niakü hoihoi Efraim kau saothang nisan khemko tsalo.

²³Manase kau ongai Pedazur thso Gamaliel ahei noiküla;

²⁴naiuso Benjamin kau ai Gideoni thso Abidan ahei noiküla.

²⁵Aphiting nai Dan kau saothang nisan khemko ahoi nou tsalo, naiuso nung hoi khaiuko ahei Amishadai thso Ahiezer noiküla. Nung süpaihoi nou aphihoi nouso tü hüjeikü noiküla.

²⁶Asher kau mongai ahei nou Okran thso Pagiel noiküla.

²⁷Naptali kau ko ahei nou Enan thso Ahira noiküla.

²⁸Ti taoko Israel hai ngüso saothang laopeng küta tsalo-e, ngüso ahoi ahoi yangkü lingthiokü kha ai khutsún nungti noiküla.

²⁹Mosaüh apa kaio Midian hai nou Jethro thso Hobab tü ngiom, “APAOU nou sam hau kiuao thaloutaiutsün athang thaiutha sam lo tsaloau noin. Apaüh Israel hai shingkü khu-i-e ta thalo-iu, nungtiphe sam ko ashi, naiuso samüh asamko sam shingkü khutsün haoson noiha-e.”

³⁰Hobabüh thalakü ngiom, “Nyah, Ngo achetsinyim goumchi nai laokü khuwanji.”

³¹Mosaüh ngiom, “Tsüojinyangkü sam lalean,” “Liutsa nai sam saothang samüh tilai shane ni nung ngeji, naiuso ni sam yamnia ao theau shio-e.

³²Ni sam ko khuha naito, samüh niko APAOU nou sam hau ouk haoson kiutsün ko ni haoson noiha-e.”

³³Tilai khaiuniahoi nou asio king Sinai wankü khu, ngüso samnyi yam tsakei. Ngüso shamau athang tsak eploau thaiutha APAOU Athalou-e Paidan asaita ngüso khako khukü noi.

³⁴Asaothang pungkü ainou ngüso tsalo taoko anyi taoko ngüso khütha nai APAOU thengmia noiküla.

³⁵Tilai Athalou-e Paidan nou akhu au tsalo-e, Mosaüh ngio, “O APAOU, tsaküta, a-ehoiso akhupengi, naiuso ni tü chinyantsünso akhako akhupengi!”

³⁶Naiuso nung laotsün taoko apaüh ngiom, “O APAOU, Israel hai pothso heng si heng dongai laokü ashi!”