Read Khiamniungan Naga Haove 12 Bible Online

Haove 12 - Khiamniungan Naga bible

Haove 12

¹Mosaüh Kus hai menyiu tsak tsamsigoh yang, naiuso nung thaiutha ko Miriam si Aron ne namnam.

²Ngüneüh ngiom, “APAOU nou Mosa tsangkülu chiteji süne? Apaüh sam tsangkü lüko tsüchite süne?” APAOU nou ngüneüh ti ngiom, nung lula.

³(Goumchi khaiunia apem khengai Mosa atsamlotsün khaiunia tsak noiküla.)

⁴Alekta APAOU nou Mosa si Aron naiuso Miriam sotü ngiom, “Ngo asam khaiunia süme nouso Ngü noitsün Nejenkhio nai shi-iao aiuji.” Ngüso khu,

⁵nungai APAOU nou thengmia kheam tsak nai noikü saoküta Nejenkhio bekhan dongko tsakü jonkü ngiom, “Aron! Miriam!” Nungai nung khaiunia nime nou ne kha ai shin,

⁶küta APAOU nou ngiom, “Ngo ti ngio-e, nung lo anglu! Tilai asam ongko e-pohoi noiküla, Ngo ngüso tü jüchija atsangshei sungkü han naiuso ngüsoko mea mean nai chite.

⁷Tilai Ngo, Ngü yathsüotsün Mosa ko chiteji, nung amomo noin, Ngo apa jü khaiunia Israelhai khaiuko ataotum theau taiukiukü noin.

⁸Nungtiphe Ngo apatü athat nai tsüdekü tsangsheikü nai khasikha ko chiteji, apaüh Jüpem lüko epiu! Nungaito asamüh Ngü yathsüotsün Mosa thako titi chitesomji?”

⁹APAOU ngüso thako mongmat sung, küta apa pungekü khuwan,

¹⁰naiuso thengmia nou Nejenkhio nou wankü khuwan, nungai Miriam khun alekta jeekia nou meanan naiuso nyinli thaiukü iula. Tilai Aronüh Miriam tü thap, nungai apa jeekia nou meankü ep,

¹¹apaüh Mosa tü ngiom, “O jü APAOU, sam ün mainga chhisiya naiuso samüh sunhetsün angei shioko sam hau angja lakiu-i.

¹²Meshen nyiu thai ainou chettsün taoko nyih apaitso tsühakü chettsün khaiunia tsakli apa e khaiunia la iula-i ta ngo ni tü kojaji.”

¹³Nungtiphe Mosa APAOU dongai nung ngio kankü khuküta, “O Goa, apa alomei!” ta vekü ngiom.

¹⁴APAOU nou thalakü ngiom, “Apa poüh apa khanai lei thoplutnai, apa amiam nai chinyatnyi pamkü tsünoi-e süne? Nungtiphe apa anojet tsak asaothang nai kiapjeikü awan, küta nungphiai apa nialokü shiao shio-e.”

¹⁵Miriam, asaothang nai chinyatnyi kiapjeikü wan, naiuso apahoi nai nialokü moshikün lektso khaiuniahoi nou nungkolu noi.

¹⁶Nungai ngüso Hazerod ainou tsalokü khuküta Paran liutsa nai asaothang shankü noi.