Read Khiamniungan Naga Haove 13 Bible Online

Haove 13 - Khiamniungan Naga bible

Haove 13

¹APAOU nou Mosa tü ngiom,

²“Israel kau chekü nime nouso pungkü ainou ahei tsak tsak chosan küta Ngo tisübao Kanan goumchi Israelhai hau kiuji nungai khukü thapau ngüso akauthahoili lühong.”

³Mosaüh angiotsün angkü Paran liutsa ainou aheihoi nungso hongkü noiküla: [Kau] — [Ahei] Reuben — Zakkur thso Shammua Simeon — Hori thso Shaphat Yihuda — Jefune thso Kaleb Isakar — Yosep thso Igal Efraim — Nun thso Hoshea Bejamin — Raphu thso Palti Zebulun — Sodi thso Gaddiel Manase — Susi thso Gaddi Dan — Gemali thso Amiel Asher — Maikel thso Sethur Napthali — Vopsi thso Nabi Gad — Makhi thso Geuel

¹⁶Mosaüh goumchi tü thapau akauthahoi hongtsün nungso noiküla. Apaüh Nun thso Hoshea nian nung Yihusua ta li-ekiu.

¹⁷Tilai Mosaüh ngüso hong, apaüh ngüso tü ngiom, “Nung ainou ajepekki nai lünap, küta king goh nai lüsungh.

¹⁸Nung goumchi ti inli, nungai khaiunia titso kihkü noin? naiuso ngüso titithatso kongkü noin nung lüthaisan.

¹⁹Goh nou mei si tsümei, naiuso nungai noitsün khaiuniahoi noksong süne noknio nai kihji nung lüthaisan.

²⁰Goh nou tsahkü süne tsüde naiuso pai si aou noi süne tsünoi lüthaisan. Küta nungai eiusantsün pai eiu ajantso kankü ashi” (Nung ah tao sainaoshep semtsün atao noiküla)

²¹Nungtiphe ngüso Hamat Aoyan dongai nai sungkü, Zin liutsa ainou Rehob saokü goumchi nou tü kautha.

²²Ngüso chongting nai ajepekki goumchi nai khu küta Hebron ai shin, nungai Ahiman, Sheshai naiuso Talmai kau oukongting Anakim tü chetsinyimtsünso kihküla. (Hebron nung to Ijip nai Zoan ainou pon chinyat khako shantaiukü noiküla)

²³Ngüso Eskol tsamei ai shin, nungai ngüsoüh sainaoshep paikia tsak lethsangkü eiutsün thamsan küta api ao pai tsatthiokü ngüsoüh nung pihlo. Ngüsoüh loüh sasashep, naiuso phiushep ajantso kankü shin.

²⁴(Nung athang nou tü Eskol Tsamei ta jonkü noiküla, tiautenai nungai Israel haiüh sainaoshep apung tsak hesanan.)

²⁵Ajekhaiu aopülenyi nung goumchi thapekkü thapküta phiai akauthahoi

²⁶Mosa, Aron naiuso Israel hoikam Paran liutsa Kades nai noi taoko laokü shin. Ngüsoüh epkü shitsün chiten, nungko aikü pai eiu nou kankü shin.

²⁷Ngüsoüh Mosa tü ngiom, “Samüh goumchi nou tü sailu-iu, naiuso nung goh nou tsahkü naiuso meikü noin ta epsan; naiuso nung ainou nungko pai-eiu ajantso noin.

²⁸Lüko khaiunia sauhai nungai kihji, ngüso oukongkü noin, naiuso ngüso noknio nouso thatü thsüokü meikü pejeikü noin. Nungtü simkü akonghoi thsüokü tsaokü samüh nungai ep.

²⁹Amalek hai nung goumchi ajepekki nai kihkü noin; Hit hai, Jebus hai, naiuso Amorhai king goh nai kihkü noin, naiuso Kananhai Mediteranian khiamnok sai ai naiuso Yordan haiukok nai kihkü noin.”

³⁰Kalebüh Mosa thako namnam- tsün khaiuniahoi nou tsamlokü iula-i küta ngiom, “Lo samüh nung khaiunia nouso koman küta goh nou loau noin, tiautenai samüh nungso shiolowaniu.”

³¹Lüko khaiunia sau Kaleb ko khuhakü noiküla apaüh ngiom, Tsüde, samüh ngüso komheao momai, nungai noitsün khaiuniahoi nou sam tü simkü oukong noin.

³²Nungtiphe ngüso Israel khaiunia ongko ngüsoüh sailutsün goh thaiutha atsüotsüdekün ngiongem lopeng. Ngüsoüh ngiom, “Nung goumchi nou nungai kihtsün khaiuniahoi tsadaotso eheshiu saiukü tsüsungh. Samüh eptsün khaiuniahoi nou konsitheng nai laiu laiukü hoi jije noin.

³³Naiuso loüh nungai akengtinghoi nouso lüko ep, nungso Anak thsaosithsoso noiküla. Sam ngüso khako to jongku ehenthso tsakli yangji, naiuso nungli samüh ngüso tü thappao noin.”